Laaca ti sábadu zeʼ Jesús ra sinagoga, zándaca maʼ nuube Galilea. Raqué biiyabe ti hombre nabidxi ti chú náʼ (Lucas 6:6). Cabeza si ca escriba ne ca fariseu xi guni Jesús. ¿Xiñee yaʼ? Rihuinni ca racaláʼdxicaʼ gúnicaʼ xiixa ora gunabadiidxacaʼ Jesús: «¿Ñee zanda gusiándacabe tuuxa sábadu la?» (Mateo 12:10).

Riníʼ ique ca líder stiʼ ca religión stiʼ ca judíu riʼ, ora si nuu guendanabani stiʼ tuuxa ra naxoo nga zanda gusiándacabe laa dxi sábadu, peru qué zanda diʼ quixhe chaahuiʼ binni dxita ladi tuuxa pa bireeni de lugar o guchéndacabe venda ra gucaná tuuxa. Rihuinni ca qué lica rizaalaʼdxiʼ ca judíu riʼ pa cayacaná pobre hombre que, sínuque cuyúbicaʼ ximodo cuʼcaʼ xqueja Jesús.

Bidii Jesús cuenta xii ngue racalaʼdxiʼ ca judíu que gúnicaʼ. Nanna Jesús maʼ gudiʼdiʼ súcabe de modo riníʼ íquecabe ne maʼ qué rinándacabe modo ná Stiidxaʼ Dios guni binni dxi sábadu (Éxodo 20:8-10). Guietenaláʼdxinu, cadi primé biaje guiníʼcabe cadi jneza ni cayuni Jesús. De raqué, biʼniʼ Jesús xiixa ni bichiichiʼ laacabe. Gudxi Jesús hombre nabidxi náʼ que: «Biasa ne bizuhuaa galahuiʼ riʼ» (Marcos 3:3).

Para biiyadxí Jesús ca escriba ne ca fariseu que, ne gúdxibe laacaʼ: «Pa nápatu ti dendxuʼ ne ñábame ndaaniʼ ti barranca sábadu, ¿ñee qué niguunatu ne nibeetu laame la?» (Mateo 12:11). Nánnanu risaca ti dendxuʼ purtiʼ zanda guidoome, nga runi guirutiʼ qué zaná gusaana laame ndaaniʼ ti barranca ne dede sti dxi nindee laame, purtiʼ zándaca gueeda gátime ne guiniti bueltu stícabe. Ne Stiidxaʼ Dios runi mandar binni gapaʼ ca maniʼ ni napa ra lidxi (Proverbios 12:10).

Biquiiñeʼ Jesús ejemplu riʼ para gudxi laacabe: «¡Jma risaca ti hombre que ti dendxuʼ! Nga runi, zanda gaca ni jneza sábadu» (Mateo 12:12). Nga runi, cadi cucheené diʼ Jesús ley stiʼ sábadu pa gusianda hombre huará que. Bisihuinni Jesús riá hombre huará que, ne jneza modo bicábibe ca líder stiʼ ca religión que. Nga runi, qué nidxélacaʼ xi nicábicaʼ Jesús ne maʼ qué niniʼcaʼ gastiʼ.

Despué biiyadxí Jesús laacabe, ne guizáʼ guyuu triste purtiʼ nabé naguidxi ladxidóʼ ca líder stiʼ ca religión, óraque gudxi Jesús hombre huará que: «Bisigaanáʼ» (Mateo 12:13). Ne ora bisigaanáʼ hombre que, oraqueca bianda. Cumu maʼ biándabe la? guizáʼ biéchebe, peru ¿xi biʼniʼ ca escriba ne ca fariseu que yaʼ?

Lugar de ñéchecaʼ purtiʼ bianda hombre que, laga bireecaʼ ne nagueenda guca reunircaʼ «né ca ni nuu lu partidu stiʼ Herodes para guiníʼ stiidxacaʼ ximodo guuticaʼ Jesús» (Marcos 3:6). Ridúʼyanu, nuu caadxi saduceu lade partidu stiʼ Herodes. Cadi tobi si nuu ca saduceu ne ca fariseu purtiʼ gadxé ni runi crecaʼ, peru cumu nanalaʼdxiʼ guiropaʼ grupu riʼ Jesús la? nga runi riuucaʼ tobi si.