NDƐ TRE 33
Zezi yiali ndɛ nga Ezai kannin’n i nuan
-
SRAN KPANNGBAN KPA BE BALI ZEZI I WUN WUNLƐ
-
Ɔ YIALI NDƐ NGA EZAI KANNIN’N I NUAN
Kɛ Zezi tili i kɛ Farizifuɛ mun nin be nga be o Erɔdu sin’n, be kunndɛ kɛ bé kún i’n, ɔ nin i sɔnnzɔnfuɛ’m be ɔli Galile Jenvie’n i bue liɛ’n su lɔ. Sran kpanngban be bɛli i wun lɛ. Wie’m be fin Galile mɛn’n nun lɔ. Wie’m be fin Tir nin Sidɔn mɔ be o nzue nuan lɔ’n. Wie’m be fin Zurdɛn nzue ba’n i wia afiliɛ lɔ, yɛ wie’m be fin Zerizalɛmun nin Idime. Klɔ sɔ’m be o be liɛ ngua lɔ. Zezi yoli sran kpanngban be juejue. I sɔ’n ti’n, be nga tukpacɛ kekle kpa o be su’n, be fɔ i su. Be minndɛman kɛ Zezi wunnge be wun lɔ. Sanngɛ be bɔbɔ be kɔ i wun lɔ kɛ bé kó kɛ́n i.—Marki 3:9, 10.
Sran nga be bali’n, be sɔnnin kpa. Ɔ maan kɛ ɔ ko yo naan b’a mianman Zezi fii’n ti’n, ɔ seli i sɔnnzɔnfuɛ’m be kɛ be sie alie kaan kun lɛ be mɛn i naan ɔ fu nun. Asa ekun’n, ɔ kwla tran alie sɔ’n nun kle sran nga be o lɛ’n, be like. Kpɛkun ɔ kwla fa kɔ nzue’n i nuan lɛ mmua lɔ kan naan w’a kle sran nga be o lɔ’n be like wie.
Zezi i sɔnnzɔnfuɛ Matie seli kɛ junman nga Zezi di’n, ɔ yia “ndɛ nga Ɲanmiɛn nuan ijɔfuɛ Ezai kannin’n” i nuan. (Matie 12:17) ?Ndɛ sɔ’n yɛle benin?
Ndɛ sɔ’n yɛ: “Amun nian! Min sufuɛ nga n kpɛli i’n yɛ. Ɔ ti min awlɛn su sran, min klun jɔ i wun! Ń fá min wawɛ’n ń síe i su, yɛ wafa ng’ɔ fata kɛ be yo ninnge mun i nuan su sɛsɛsɛ’n, ɔ́ wá klé nvlenvle mun weiin. Ɔ su siman akplowa, ɔ su kpankpanman, yɛ sran fi su timɛn i nɛn akpɔ dandan nga be o klɔ’n nun’n be su. Ndɛma nga w’a bli’n, ɔ su bumɛn i, yɛ kannin ɲanman m’ɔ fite wɛnsrɛn’n, ɔ su nuɛnmɛn i, lele saan w’a kwla siesie like kwlaa ng’ɔ timan su’n. Nanwlɛ, i dunman nun ti’n, nvlenvle’m be wla’n trán like kpa kun su.”—Matie 12:18-21; Ezai 42:1-4.
Ɲanmiɛn i sufuɛ ng’ɔ kpɛli i’n, yɛle Zezi bɔbɔ. Zuifu’m be Ɲanmiɛn sulɛ wafa’m be su kpɛnngbɛn’m be kpɛli mmla kaka. Ɔ maan nvlefuɛ’m be wunman like nga be flɛ i sa nuan su sɛsɛ yolɛ’n, i wlɛ. Sanngɛ Zezi liɛ’n, ɔ yoli maan sran’m be wunnin i sɔ liɛ’n i wlɛ weiin. Asa ekun’n, wafa nga Farizifuɛ’m be bɔbɔ be klo kɛ bé nánti Ɲanmiɛn Mmla’n su’n yɛ be nanti-ɔ. Be waan sɛ sran kun kpinndinman’n, ɔ fataman kɛ be niɛn i lika Wunmiɛn-lolɛ-cɛn’n nun. Zezi liɛ’n, ɔ kleli kɛ Ɲanmiɛn i wawɛ’n wo i su, yɛ ɔ yoli sa nuan su sɛsɛ kɛ Ɲanmiɛn klo kɛ e yo’n sa. Ɔ maan mmla nga Farizifuɛ’m be kpɛli m’ɔ ti kɛ trɔ wie sa yɛ ɔ o sran’m be ti su’n, Zezi sike jinnin. Sa nga ti yɛ Zuifu’m be Ɲanmiɛn sulɛ wafa’m be su kpɛnngbɛn’m be waan bé kún i’n, yɛ ɔ o lɛ-ɔ. Nanwlɛ, be yako!
Ɲanmiɛn nuan ijɔfuɛ Ezai kannin Zezi i ndɛ seli kɛ: “Ɔ su siman akplowa, ɔ su kpankpanman, yɛ sran fi su timɛn i nɛn akpɔ dandan nga be o klɔ’n nun’n be su.” ?Wafa sɛ yɛ Zezi yiali ndɛ sɔ’n i nuan-ɔn? Kɛ Zezi yoli sran’m be juejue’n, w’a kplinman su kɛ sran sɔ mun annzɛ mmusu’m “be kan naan sran’m be si” kɛ i yɛ ɔ ti Marki 3:12) Asa ekun’n, w’a kloman kɛ bewanbewan ndɛ nga sran’m be kɛn i klɔ’m be su’n, yɛ be jran su fa si i-ɔ. Afin kɛ sran kun kɛn i ndɛ liɛ’n, ɔ kpɛ wie gua nun. Ɔ maan bewanbewan ndɛ nin ndɛ bɔbɔ ba nga Zezi kannin’n annzɛ like ng’ɔ yoli’n, be timan kun mlɔnmlɔn.
Ɲanmiɛn Wa’n niɔn. (Ndɛma nga w’a bli’n, m’ɔ su wa bu’n, yɛle sran nga afɛ o be su’n. Asa ekun’n, sran sɔ’m be ti kɛ kannin ɲanman m’ɔ fite wɛnsrɛn m’ɔ su wa nuan’n sa. Zezi w’a yoman sran sɔ’m be kpokokpoko. Sanngɛ ɔ kloli be, ɔ yoli be ye, yɛ ɔ wlali be fanngan blɛblɛblɛ. Nanwlɛ, sran nga nvlenvle’m be kwla fa be wla guɛ i su’n, yɛle Zezi!