Kenca iteh Jesus maka ibunuh kalak Parisi ras pengikut partai Herodes ate kalak e ia, lawes Jesus ras murid-muridna ku Lawit Galilea. Enterem kel jelma ngikutken ia. Kalak e rehna arah erbage-bage daerah. Lit si reh arah Galilea nari, Jerusalem, Idumea selatan, daerah timur Lau Jordan, arah kota Tirus ras Sidon si lit i deher lawit. Enterem kalak si ipepalem Jesus. Emaka rehen kalak si mekelek pinakitna ndahi Jesus. Minter ate kalak e njemak Jesus, lanai kalak e sabar nimai Jesus si njemaksa.​—⁠Markus 3:​9, 10.

Perban teremna kel jelma, ipindoken Jesus man murid-muridna gelah isikapken kalak e sada perahu si kitik gelah banci ia ndauh arah tepi nari janah la ia kicat. Selain si e, banci ka ia ngajar arah perahu e ntah pe miser ia ku ingan si deban i pantai e guna nampati terbuen kalak.

Itulis Matius maka kai si ilakoken Jesus e erban “kai si nggo ikataken arah Nabi Jesaya” terjadi. (Matius 12:17) Nubuat si apai si ilakoken Jesus?

“Enda me persuruhenKu si nggo Kupilih, ia me si Kukelengi janah si ngena ateKu! Kubereken me kesahKu man bana, janah ia me si erbanca jelas erti keadilen man bangsa-bangsa. Labo ia pagi rubat ntah pe serko, bage pe la pagi terbegi sorana i pasar-pasar si mbelin. Buluh si nggo mbengkuk la ipenggelkenna, sumbu lampu si milep-ilep la imatekenna, seh asa menang ibanna keadilen e. Situhuna, i bas gelarna me pagi bangsa-bangsa erpengarapen.”​—Matius 12:​18-​21; Jesaya 42:​1-4.

Pastilah Jesus persuruhen si ipilih Dibata e. Icidahken Jesus alu jelas keadilen situhu-tuhu, si nggo icedai kebiasan agama palsu. Erkiteken iban kalak Parisi Undang-Undang Dibata menurut perukuren kalak e, emaka la kalak e nggit nampati kalak sakit bas wari Sabat! Guna mbuktiken keadilen Dibata ras ncidahken maka i bas Jesus lit kuasa Dibata, ibebaskenna kalak si itaban kebiasan si salah e. Erkiteken si e, ibunuh peminpin-peminpin agama atena Jesus. Lanai tanggung kejamna!

Kai maksudna “labo ia pagi rubat ntah pe serko, bage pe la pagi terbegi sorana i pasar-pasar si mbelin”? Sanga ipepalemna kalak, la ipediat Jesus kalak e ntah pe malekat jahat ‘nceritaken kerna ia.’ (Markus 3:​12) La ate Jesus ia itandai kalak arah cerita-cerita i pasar-pasar ntah pe nina ku nina.

Selain si e, ipebetehken Jesus atena berita si ngapuli man kalak si rate mesui si ikataken bagi buluh si mbengkuk. Kalak e bagi sumbu lampu si milep-ilep. Tapi alu lembut, perkeleng, janah beluh, isampatina kalak si lemah e. Tuhu-tuhu Jesus ngenca si banci jadi pengarapen man bangsa-bangsa!