Iesu ia kamonai Farisea taudia bona Heroda ena orea taudia be ia hamasea dalana idia palanilaia neganai, ia bona ena hahediba taudia be Galilea Gohuna dekenai idia lao. Gabu ibounai amo hutuma be ia dekenai idia mai—Galilea, kone badinai idia noho siti, Turo bona Sidono, Ioridane Sinavai ena ist kahana, Ierusalema, bona Idumea ena saut kahana amo. Iesu ese gorere taudia momo ia hanamoa. Unai dainai idia gorere bada taudia be Iesu idia hagegea. Idia naria lasi ia ese idia ia dogoatao totona, to ia dogoatao totona ia kahirakahira idia lao.​—Mareko 3:9, 10.

Hutuma bada idia mai dainai, Iesu ese ena hahediba taudia ia hamaoroa bouti maragina ta do idia hegaegaelaia, unai amo kone amo do ia daudau bona hutuma ese do idia hagegea lasi. Danu, bouti amo idia ia hadibaia eiava kone kahirakahira gabuna ta dekenai ia lao diba, ma haida ia durua totona.

Hahediba tauna Mataio ia gwau Iesu ese ia karaia gaukara be “Dirava ese peroveta tauna Isaia amo ia gwauraia herevana” ia hagugurua. (Mataio 12:17) Iesu be edena peroveta herevana ia hagugurua noho?

“Itaia! Egu hesiai tauna, lau abia hidi tauna unai. Ia lau lalokau henia, bona ia lau lalonamo henia. Ia dekenai egu siahu do lau henia bona bese idauidau dekenai hahemaoro maoromaoro ena anina do ia hahedinaraia. Do ia hepapahuahu lasi, eiava do ia boiboi lasi. Bona dala badana dekenai ta ese ena gadona do ia kamonai lasi. Ia ese siriho manokana do ia makohia lasi bona lamepa ena wiki mai ena kwalahu do ia habodoa lasi ela bona mai kwalimu ida hahemaoro goevana ia karaia. Oibe, iena ladana ese bese idauidau dekenai helaro do ia henia.”​—Mataio 12:18-21; Isaia 42:1-4.

Oibe, Iesu be Dirava ese ia lalonamo henia hesiai tauna. Ia ese hahemaoro maoromaorona ia gwauraia hedinarai, to tomadiho koikoi edia sene karadia ese unai idia hunia. Farisea taudia ese Dirava ena Taravatu be sibodia edia dala hegeregerena idia badinaia dainai, Sabati ai gorere tauna ta idia durua lasi! To Iesu ia hahedinaraia ia be lauma helaga ia abia, bona ena kara amo Dirava ena matanai ia maoro hahemaoro goevana ia hahedinaraia. Unai dala amo ia ese sene karadia edia taravatu amo taunimanima ia ruhaia. Unai dainai tomadiho gunalaia taudia idia ura Iesu idia hamasea. Edia kara be dika momokani!

Inai hereva, “do ia hepapahuahu lasi, eiava do  ia boiboi lasi. Bona dala badana dekenai ta ese ena gadona do ia kamonai lasi” ena anina be dahaka? Iesu ese gorere taudia ia hanamoa neganai, idia—eiava demoni—ia oda henia “ia do idia gwauraia hedinarai lasi.” (Mareko 3:12) Ia ura lasi taunimanima be mai rege bada ida iena kara be dala badana dekenai idia boiboilaia, eiava idia mogea sivaraidia amo ia idia dibaia.

Danu, Iesu be lalometau taudia ia hagoadaia sivaraina ia abia lao, idia be ia moru siriho manokana bamona, bona lamepa ena wiki mai ena kwalahu bamona. Iesu be unai siriho manokana ia makohia lasi eiava lamepa ena wiki mai ena kwalahu ia habodoa lasi. To mai lalokau bona hebogahisi ida manau taudia ia hagoadaia. Momokani, bese ibounai ese Iesu idia abidadama henia diba!