Pengudah Jesus nemu orang Parisi enggau raban nembiak Herod deka munuh iya, iya enggau bala murid iya ngagai Danau Galili. Maya nya, mayuh orang ari serata endur datai ngagai Jesus. Sida datai ari Galili, endur ke ngelingi Tirus sereta Sidon, ari seberai Sungai Jordan, Jerusalem, enggau Idumea. Jesus ngeraika mayuh orang ke sakit. Ketegal nya, orang ke sakit raya nyau berebut deka negu iya.—Mark 3:9, 10.

Maya nya, bisi mayuh amat orang. Nya alai, Jesus ngasuh bala murid iya nyediaka perau mit ngambika orang mayuh enda ngempit iya. Enggau nya, Jesus ulih ngajar orang mayuh ari perau nya tauka ngagai endur bukai ngambika ulih nulung mayuh agi orang.

Siku ari murid Jesus, iya nya Matthew madahka pengawa Jesus “ngamatka jaku ti udah disebut nengah Nabi Isaiah.” (Matthew 12:17) Nama jaku benabi ke dikeamatka Jesus?

“Tu nembiak Aku ti udah dipilih Aku. Aku sayau sereta gaga ati ke iya! Aku deka meri iya kuasa kudus Aku, lalu iya deka madahka reti atur ti lurus ngagai orang ari semua bansa. Iya enda bekelikuh tauka merakka nyawa, lalu nyawa iya nadai didinga ba sebelah jalai besai. Iya enda ngindik rumput ti layu, tauka madamka api kelita ti kelap-kelap, datai ke iya mujur mai atur ti lurus. Endang amat, orang ari semua bansa deka andalka nama iya.”—Matthew 12:18-21; Isaiah 42:1-4.

Jesus meh nembiak ke dipilih Petara. Maya nya, adat ke diajarka pengarap pelesu udah nyarutka runding orang pasal atur ti lurus. Taja pia, Jesus enggau terang madahka reti atur ti lurus. Orang Parisi ngena Adat Petara enggau chara ti enda lurus laban sida nitihka chara diri empu. Sida indah enggai nulung orang ke sakit maya Hari Sabat! Tang, Jesus nunjukka kuasa kudus Petara bisi ba iya. Lalu ari utai ke digaga iya, Jesus nunjukka nama reti pengelurus Petara. Enggau tu, Jesus ngelepaska orang ari adat pengarap pelesu ti enda lurus sereta balat ngenusahka. Nya meh kebuah tuai pengarap keran deka munuh Jesus. Naka meh penyai sida!

Nama reti “iya enda bekelikuh tauka merakka nyawa lalu nyawa iya nadai didinga ba sebelah jalai besai”? Lebuh iya ngeraika sesiku orang, Jesus enda ngasuh orang nya tauka bala melikat ti jai “madahka pasal iya ngagai  orang bukai.” (Mark 3:12) Tu ketegal, Jesus enggai orang nemu pasal iya laban sida ninga cherita ke ditusui sereta dikerembaika orang mayuh. Cherita ke baka nya kekadang enda entu betul sereta udah diubah.

Jesus mega madahka pesan ti ngelantangka ati ngagai sida ke baka rumput ti layu ke diindik orang. Situasi sida mega baka api kelita ti kelap-kelap ke nyauka padam. Jesus enda ngindik sida tauka madamka api sida. Jesus nulung sida enggau siru sereta penuh pengerindu. Ketegal nya, orang ke lemi sereta ditekan bulih pengering ari Jesus. Nya alai, orang ari semua bansa ulih manggaika harapan sida ba Jesus!