Yesu byo ayukile’mba Bafaliseo ne baana ba bwanga ba kwa Heloda bakeba kumwipaya, aye ne baana banji ba bwanga bafumineko ne kuya ku Kalunga ka Ngalilea. Mabumba a bantu kufuma monse mu Ngalilea, mizhi ya mu Tila ne Shidona ne ku lubaji lwa ku musela wa Mukola wa Yodano, ku Yelusalema, ne ku Idumea ku kabeta ka ku bulenge baishile kwi aye. Yesu wabukile bantu bavula kya kuba ne bonse bajinga na bikola byakatazha baishilenga koaji. Kechi bapembelejilenga’mba ebakwate ne, abo baishilenga ko aji na kumukwata.—Mako 3:9, 10.

Na mambo a kuba jibumba jakijishemo kubaya, Yesu waambijile baana banji ba bwanga kumuletela bwato kuba’mba akanjilemo ne kwibushinjika kufuma ku kitulu, pa kuba’mba jibumba jibule kumubunga. Kabiji wakonsheshe kwibafunjisha saka aikala mu bwato nangwa kuya ku mpunzha ikwabo yajinga kwipi na kitulu kuba’mba akwashe bantu bavula.

Mwana wa bwanga aye Mateo wamwene’mba mingilo ya kwa Yesu yafikizhe “akya kyaambiwe kupichila mwi ngauzhi Isaya.” (Mateo 12:17) Ñanyi bungauzhi Yesu bo afikizhe?

Wafikizhe bungauzhi bwa kuba’mba: “Talai! Kalume wami ye nasala, ye natemwa, kabiji mo mmwena lusekelo! Nabika mupashi wami pe aye, ne aye ukabuula bisaka bya bantu jishinda jaoloka ja kubilamo bintu. Aye kechi ukatoboka nangwa kutama muteto ne, kabiji kafwako ukomvwa jiwi janji mu mikwakwa ikatampe ne. Jitete jafyotoka kechi ukejichimuna ne, nangwa muzhinge ufutumuka kechi ukamuzhimya ne, poso akafikizhe bunchibamambo bwaoloka. Kine, bisaka bya bantu bikaketekela mu jizhina janji.”—Mateo 12:18-21; Isaya 42:1-4.

Yesu ye kalume ye batemwa kabiji Lesa mo amwena lusekelo. Kabiji Yesu wamwesheshe byafwainwa kwikala bunchibamambo bwaoloka bwa kine, bo bafile ku mafunjisho a bupopweshi bwa bubela. Na mambo a kubula kwingijisha bulongo Mizhilo ya Lesa, Bafaliseo kechi bakwashanga muntu wakolwa pa juba ja Sabado ne. Pa kumwesha bunchibamambo bwaoloka bwa Lesa ne kumwesha kuba’mba mupashi wa Lesa wajinga pe aye, Yesu wakasulwile bantu ku bisendwa bya bisho bya bantu byatama. Kino kyo kyalengejile bantangi ba bupopweshi kukeba kumwipaya. Byo kyataminepo.

Nanchi byambo bya kuba’mba “aye kechi ukatoboka nangwa kutama muteto ne, kabiji kafwako ukomvwa jiwi janji mu mikwakwa ikatampe ne” byatala mu ka? Byo abukilenga bantu, Yesu kechi waswishanga bantu nangwa bandemona “kumusolola ku bantu” ne. (Mako 3:12) Kechi wakebelenga bantu kufunda pe aye mu mikwakwa kupichila mu kutaya mbila nangwa bantu kwamba masawakya a bubela pe aye ne.

Kabiji Yesu wasapwijilenga byambo bya lutekenesho ku bantu bo bafyotwele nobe jitete jo bachimuna ne kunyantaula. Bajinga nobe muzhinge ubena kufutumuka ujitu pepi kuzhima. Yesu kechi wachimwine jitete jo bafyotwele nangwa kuzhimya muzhinge wafutumukilenga ne. Bino na mambo a lusa ne butemwe, aye wainwinenga bulongo bakimote. Kine, Yesu ye muntu bantu ye bafwainwa kuketekela.