Padi Yezu umanya ne: Bafalese ne bena dia Helode badi bela tshifufu bua kumushipa, udi umbuka ne bayidi bende baya ku Mbuu wa Galela. Misumba ya bantu idi ilua kudiye ifumina ku nseke yonso: mu Galela, mu tshimenga tshia Tulo ne tshia Sidona bidi ku muelelu kua mâyi, ku est kua Musulu wa Yadene, mu Yelushalema, ne ba kuinshi ku sud mu Idumeya. Yezu wakondopa bantu ba bungi. Nunku, bantu bavua ne masama makole bakadifinya bua kufika kudiye. Bakaya ne disanka dionso bua kumulenga, kabayi bindila bua yeye abalenge to.​—Mâko 3:9, 10.

Bu muvuaku misumba ya bantu ya bungi menemene, Yezu wakambila bayidi bende bua bamukebele buatu bukese bua basemene ndambu mu mâyi bua misumba ya bantu kayimufinakaji to. Uvua kabidi mua kubalongeshila mu buatu anyi kuya muaba mukuabu ku muelelu kua mâyi bua kuambuluisha bantu ba bungi.

Muyidi Matayi wakamona ne: mudimu wa Yezu uvua ukumbaja “tshivuabu bambe ku butuangaji bua muprofete Yeshaya.” (Matayi 12:17) Mmulayi kayi uvua Yezu mukumbaje muaba au?

“Monayi! Muena mudimu wanyi undi musungule, undi munange, undi muanyishe! Nenteke nyuma wanyi pambidi pende, nealeje bisamba tshidi kulumbuluisha kuakane. Kakutanda, anyi kuela mbila, peshi muntu kakumvua dîyi diende mu misesu minene. Kakuzaza dilenge didibu baboze, kakujima mukaba wa muendu udi ufuima too ne padiye ukokesha bua kutuala kulumbuluisha kuakane. Bushuwa, bisamba nebitekemene mu dîna diende.”​—Matayi 12:18-21; Yeshaya 42:1-4.

Bushuwa Yezu ke muena mudimu uvua Nzambi munange ne wanyisha. Yezu wakaleja patoke tshivua buakane bulelela buvuabu banyangakaja kudi bilele bia ntendelelu wa dishima. Bu muvua Bafalese batumikila bibi Mikenji ya Nzambi bilondeshile mmuenenu wabu, kabavua nansha mua kuambuluisha muntu uvua usama dituku dia Nsabatu to! Yezu wakaleja buakane bua Nzambi patoke, ne wakaleja kabidi ne: nyuma wa Nzambi uvua pambidi pende pavuaye mumbushe bujitu bua bilele bivua kabiyi biakane buvua bantu bambule. Bua bualu ebu bamfumu ba bitendelelu bakakeba kumushipa. Bibi bia dikema!

Mêyi a ne: “kakutanda, anyi kuela mbila, peshi muntu kakumvua dîyi diende mu misesu minene” adi umvuija tshinyi? Padi Yezu wondopa bantu, kena ubanyishila bobu anyi bademon bua ‘kuambila bantu bualu buende to.’ (Mâko 3:12) Kavua musue bua bantu bamanye malu avua amutangila pa kuenda kuamanyisha mu misesu ne dîyi dikole anyi ku diambuluisha dia ngumu ya dishima ivua bantu basue kuambilangana to.

 Yezu wakatuadila kabidi bantu bavua mu ngumvuilu wa mu tshimfuanyi bu dilenge divuabu baboze, basendamije ne batshibuile panshi mukenji wa busambi. Bantu aba bavua bu mukaba wa muendu uvua ufuima, bavua matuku a ndekelu a muoyo wabu matue ku tshibungubungu. Yezu kavua muzaze dilenge divuabu baboze anyi mujime mukaba wa muendu uvua ufuima to. Kadi uvua ujula bapuekele bimpe menemene ne luse ne dinanga. Bushuwa, Yezu ke muntu uvua bantu mua kutekemena!