Etena kakandeye ɔnɛ Afarisɛ la aseka Hɛrɔdɛ wambowɔtwɛ sheke dia mbodiaka, Yeso nde l’ambeki ande wakatshu otsha lo Ndjale ka Ngalileya. Elui wa weke w’anto wakaye oma lo ahole tshɛ, oma la Ngalileya, oma la Tura ndo Sidɔna, esomba wele l’omamu w’ashi, oma lo lɛkɛ la ɛstɛ l’Ɔkɛdi wa Jɔrdana, oma la Jɛrusalɛma, oma la Idumeya etale efula lo sidɛ. Yeso akakɔnɔla anto efula. Etombelo waki la dui sɔ ele, anto waki la hemɔ ya wolo wakasusanaka dia ntshɔ le nde. Aha la nkonga dia nde mbananda, vɔ wakasasɛ dia mbonanda.​—Makɔ 3:9, 10.

Elui w’anto waki efula ka mamba, diakɔ diele Yeso akatɛ ambeki ande dia mbosukanyiyɛ waato wa tshitshɛ dia nde mimɔ oma l’okongo ko mimɔ lo mpika. Ndo nto, nde okoka mbowaetsha oma lo waato kana ntshɔ lo dihole dikina dia nyomotokimayiya anto akina.

Ombeki Mateo mbutaka dia olimu waki Yeso akakotsha “kɛnɛ kakatama lo tshimbo y’omvutshi Isaya.” (Mateo 12:17) Prɔfɛsiya kakɔna kakakotsha Yeso lanɛ?

“Eenda, okambi ami wamomɔsɔna, wokami ngandji ndo wamometawɔ. Dimi layodja nyuma kami le nde, ndo nde ayewoya wedja kɛnɛ kalembetshiya losembwe. Nde hatowana l’anto, hatohangɔhangɔ ndo ndooko onto layoka dui diande l’ɛsɛsɛ wa weke. Nde hatohembola sɔpɔ diakawaminola ndo nde hatodima oshinga wa tala wotadimala polo lam’ayondela losembwe dimɛna. Lo mɛtɛ, wedja wayonga la elongamelo lo lokombo lande.”​—Mateo 12:18-21; Isaya 42:1-4.

Ekɔ mɛtɛ dia Yeso ekɔ okambi walangema ndo wetawɔma le Nzambi. Yeso akɛnya hwe kɛnɛ kele losembwe la mɛtɛ lakanganyiyama oma lo mbekelo y’ɛtɛmwɛlɔ wa kashi. Wakakambaka l’Ɛlɛmbɛ wa Nzambi lo yoho yele keema la losembwe ndo lo yoho yawɔ hita, Afarisɛ takawakokaka kaanga nkimanyiya onto lele la hemɔ lushi la Sabato! Lo mɛnya hwe losembwe laki Nzambi ndo mɛnya dia nyuma kaki Nzambi kekɔ le nde, Yeso akatshungola anto oma lo mbekelo ya kɔlɔ yaki wotsho le wɔ. L’ɔtɛ wa dikambo sɔ, mbakayange ewandji w’ɔtɛmwɛlɔ dia mbodiaka. Ande dikambo dia lonyangu lee!

Kakɔna kalembetshiya ɛtɛkɛta w’ɔnɛ “nde hatowana l’anto, hatohangɔhangɔ ndo ndooko onto layoka dui diande l’ɛsɛsɛ wa weke”? Etena kakandakɔnɔlaka anto, Yeso konangaka dia vɔ kana ɛdiɛngɛ “mbutɛ anto akina.” (Makɔ 3:12) Nde konangaka dia anto mbeka akambo wendana  la nde lo tshimbo ya piblisite ya l’ɛsɛsɛ kana oma l’akambo wele komonga mɛtɛ wakawataka l’enyɔ.

Ndo nto, Yeso akɛmbɛ losango l’esambelo le anto waki lo yoho ya didjidji oko sɔpɔ diambominɔma, diambokotama ndo diambɔtɛtshatɛtshama. Vɔ waki oko oshinga wa tala wotadimala. Yeso kominola sɔpɔ diambɔtɛtshatɛtshama kana nima oshinga wa tala wotadimala. Koko la kɛtshi ndo la ngandji tshɛ, nde akakeketsha akanga wa memakana. Lo mɛtɛ, Yeso ekɔ onto lakoka wedja monga l’elongamelo le nde!