Fariseos chu tiku tatayakgo Herodes makgniputunkgo Jesús. Akxni xla chu xtamakgalhtawakgen katsikgo, ankgo kpupunu xalak Galilea. Akxni chan anta, lhuwa latamanin xalak lakalhuwa kachikinin lakgminkgo Jesús: xalak Galilea, xalak kachikinin Tiro chu Sidón, xalak kilhtutu Jordán, xalak Jerusalén chu Idumea, nema tlakg lakgaju xwi. Xlakata Jesús kamapaksa lhuwa latamanin, tiku tatatlakgo litamakxtumikgo. Lu paksputunkgo pi asta ni kgalhkgalhikgo pi wa Jesús nakaxama (Marcos 3:9, 10).

Wi lhuwa latamanin, wa xlakata Jesús kaskini xtamakgalhtawakgen pi kaputsakgolh akgtum aktsu barco xlakata natamakgatli tsinu chu ni nalakxkitikgo. Chuna tlan nachuwinan lata niku wi aktsu barco chu na’an kxkilhpan pupunu xlakata tlakg lhuwa latamanin nakamakgtaya.

Mateo, chatum xtamakgalhtawakgen, wan pi tuku tlawa Jesús makgantaxti tuku Isaías xlichuwinanit (Mateo 12:7). ¿Tuku lichuwinalh Isaías?

«¡Kaʼakxilhti! ¡Kiskujni tiku klaksakli, lu kpaxki chu lu tlan kimamakgkatsini! Nakmaxki kiʼespíritu chu xla nakamasiyani kachikinin chuna la xlitatlawat tuku xaʼakgstitum. Ni katitalatlawanalh chu ni pixlanka katichuwinalh, nitiku katikgaxmatli xtachuwin kxatilanka tiji. Ni katilaktukxli xatalakchunta kgatit, chu ni katimamixilh akgtum mecha nema jima. Chuna nalikatsi asta akxni liwana namakgantaxti tuku xaʼakgstitum. Xlikana, kxtukuwani nakgalhkgalhikgo kachikinin» (Mateo 12:18-21; Isaías 42:1-4).

Liwana tasiya pi Jesús wa tiku Dios lu paxki chu laksaknit. Xla liwana kamasiyani latamanin tuku tlan chu tuku nitlan, nema tuwa katsikan xpalakata talismanin nema ni xaxlikana. Fariseos ni liwana masiyakgo xLimapakgsin Dios chu lu malakatsalikgo pi asta ni xmakgtayakgolh chatum tatatla komo sábado. Pero Jesús masiya pi kgalhi x’espíritu Dios, chu tuku tlawa limasiya tuku kilhchanima xa’akgstitum. Chuna kamakgtaya latamanin namakgxtakgkgo talismanin nema nixaxlikana. Wa xlakata, xpulalinanin takanajla makgniputunkgo. ¡Nipara maxanankgo! Isaías wa: «Ni katitalatlawanalh chu ni pixlanka katichuwinalh, nitiku katikgaxmatli xtachuwin kxatilanka tiji». ¿La makgantaxti Jesús uma? Akxni Jesús kamapaksa tatatlanin, kalimapakgsi tiku kamapaksa chu demonios pi niti nakawanikgo tiku xla (Marcos 3:12). Xlakata latamanin lakgpalikgo tuku lay, Jesús ni lakaskin nalakgapaskan kaj xlakata tuku wankgo amakgapitsin.

 Jesús na kalini tamakatsinin nema tlan kamamakgkatsini tiku makgkatsikgo la kgantum kgatit nema tachuntanit, nema tukxkanit, tiku xtachuna la mecha nema jima, nema mixma. Jesús ni kachuntami nipara kamamixi latamanin tiku xalaksmalhwa, wata maklakaskin tapaxkit xlakata tlan nakamamakgkatsini. Xlikana pi latamanin tlan nalipawankgo pi xla nakamakgtaya.