KAPITE 33
Neʼe Ina Fakahoko Te Lea Fakapolofeta ʼa Isaia
-
ʼE ʼEFIHIA IA SESU ʼI TE HAHAʼI TOKOLAHI
-
ʼE INA FAKAHOKO TE LEA FAKAPOLOFETA ʼA ISAIA
ʼI te iloʼi e Sesu te fakatuʼutuʼu ʼae ʼa te kau Faliseo pea mo natou ʼae neʼe lagolago ki te faʼahi ʼo Helote ke natou matehi ia ia, neʼe alu ai mo ʼana tisipulo ki te Tai ʼo Kalilea. Neʼe fakatahi age kia te ia te hahaʼi kaugā malie mai te ʼu koga meʼa kehekehe: mai Kalilea, mo te ʼu kolo ko Tile mo Sitoni, mo te ʼu kolo ʼi te faʼahi esite ʼo te Vai Tafe ʼo Solotane, mo Selusalemi pea mo Itumeo, ʼi te potu saute. Neʼe fakamalolo e Sesu te hahaʼi tokolahi, ʼo ʼefihia ai ʼi te hahaʼi ʼae neʼe tau mo te ʼu mahaki faigataʼa. Neʼe mole natou fakatalitali ke fa age kia natou, kaʼe neʼe natou faigaʼi ke natou fakaovi ʼo fa kia te ia.—Maleko 3:9, 10.
ʼI te kaugā malie ʼaupito ʼo te hahaʼi, neʼe kole e Sesu ki ʼana tisipulo ke natou teuteuʼi he kiʼi vaka, ke feala hana fakamamaʼo mai te kauvai pea ke ʼaua naʼa ʼefihia ʼi te hahaʼi. Neʼe toe feala ai foki hana akoʼi te hahaʼi mai te vaka peʼe ke fealuʼaki ʼi te kauvai ʼo tokoni ki te hahaʼi.
Neʼe tohi e te tisipulo ko Mateo neʼe fakahoko e Sesu ʼaki tana gaue “te folafola ʼae neʼe fai e te ʼAtua ʼaki tana polofeta ko Isaia.” (Mateo 12:17) Ko te lea fakapolofeta fea ʼae neʼe fakahoko e Sesu?
“Ko ia taku tagata faifekau ʼae neʼe au filifili, toku ʼofaina ʼae ʼe au fiafia ai! ʼE au foaki anai kia ia toku laumalie pea ʼe ina fakaha anai ki te ʼatu puleʼaga te ʼuhiga moʼoni ʼo te faitotonu. ʼE mole fakatupu kē anai, ʼe mole kalaga anai pea ʼe mole logo anai he tahi ki tona leʼo ʼi te ʼu ala lalahi. ʼE mole ina moloki anai te kaho ʼae kua mapelu, pea ʼe mole ina matehi anai te vavae malama ʼae ʼe mu veliveli, ʼo kaku ki tana fakahoko ia te faitotonu. ʼE falala moʼoni anai te ʼatu puleʼaga ki tona huafa.”—Mateo 12:18-21; Esaia 42:1-4.
ʼE mahino ia, neʼe ko Sesu te tagata faifekau ʼofaina ʼae neʼe fiafia ai te ʼAtua. Neʼe fakaha lelei e Sesu pe kotea te faitotonu moʼoni, ʼae neʼe mole kei mahino lelei ki ai ʼihi ʼuhi ko te ʼu talatisio fakalotu ʼae neʼe hala. Neʼe manatu hala te kau Faliseo ʼo ʼuhiga mo te maʼuliʼi ʼo te Lao ʼa te ʼAtua, ʼo mole natou fia tokoni pe la ʼi te ʼaho ʼo te Sapato ki he tahi neʼe mahaki. Kaʼe neʼe fakaha lelei e Sesu te faitotonu ʼa te ʼAtua pea mo te nofo ʼa te laumalie ʼo te ʼAtua ia te ia, ʼo ina fakaʼateainaʼi te hahaʼi mai te kavega mamafa ʼo te ʼu talatisio ʼae ʼe mole faitotonu. Koia ʼae neʼe fia matehi ai e te kau takitaki lotu ia Sesu. ʼI meʼa fakaʼofaʼofa foki!
Kotea te fakaʼuhiga ʼo te ui ʼae “ ʼe mole fakatupu kē anai, ʼe mole kalaga anai pea ʼe mole logo anai he tahi ki tona leʼo ʼi te ʼu ala lalahi”? Moka fakamalolo e Sesu te hahaʼi, neʼe ina fakatotonu age kia natou, peʼe ki te ʼu temonio, “ke ʼaua naʼa natou palalau ʼo ʼuhiga mo ia.” (Maleko 3:12) Neʼe mole ina loto ke fai he ʼu kalaga logoaʼa ke iloʼi ai ia ia, peʼe ke ʼave keheʼi e te hahaʼi he ʼu logo ʼo ʼuhiga mo ia.
Neʼe toe tala foki e Sesu te logo fakalotofimalie kia natou ʼae, ʼi hona aluʼaga fakata, neʼe hage ko he kaho kua mapelu pea neʼe moloki. Neʼe natou hage ko he vavae malama ʼe mu veliveli. Neʼe mole moloki e Sesu te kaho ʼae kua mapelu pea neʼe mole ina matehi te vavae malama ʼae ʼe mu veliveli. Kaʼe, ʼaki tana agalelei pea mo tona ʼofa, neʼe feala kia Sesu ke ina fakalotomalohiʼi te kau agavaivai. ʼE mahino ia, ʼe feala ke falala moʼoni te ʼatu puleʼaga kia Sesu!