Jesusajj yatiyañ qalltkäna ukhajja, suma chuymani jaqenakat waljaniw discipulopar tukupjjäna, sañäni: Andrés, Simón Pedro, Juan, inas Santiago (jupajj Juanan jilapänwa), Felipe, Natanael (Bartolomé sat sutimpi uñtʼatarakïnwa). Qhepatjja Jesusan discipulonakapajj waljanëjjapjjänwa (Juan 1:45-47). Jesusajj Diosan Corderopawa sasin Bautisir Juanajj siskäna ukhatjja, mä mara chikataniw pasjjäna.

Jesusajj apostolonakapar ajlliñwa amtäna. Uka apostolonakaw Jesusamp chik sarnaqapjjañapäna, yatiyañatakejj sumwa Jesusajj jupanakar wakichtʼañapäna. Ukampis apostolonakapajj khitinakäpjjanis uk janïr ajllkasajja, Jesusajj mä qolluruw saräna, uka qollojj Galilea Qotatsa Capernaúm markatsa janiw jayankpachänti. Jesusajj apostolonakaparu sum ajlliñatakisa, Diosan bendicionap katoqañatakisa arum paqaraw oración luräna. Qhepürusti Jesusajj discipulonakaparuw jawsäna, jupanakat 12 ajllïna.

Nayrïr parrafon qhanañchaniwayktan uka sojjta chachanakaruw Jesusajj apostolopäpjjañapatak ajllïna. Ukatjja impuesto cobriri Mateo chacharus ajllirakïnwa. Ukjjarusti phesqa chachanakampiruw Jesusajj ajllïna: Judas (jupajj Tadeo satarakïnwa, ‘Santiagon yoqapa’), cananita Simón, Tomás, Santiago (Alfeon yoqapa) ukhamaraki Judas Iscariote (Mateo 10:2-4; Lucas 6:16).

Uka 12 apostolonakapajj Jesusamp chikaw yaqha markanakar sarapjjäna, Jesusajj jupanakar sum uñtʼarakïna. Yaqhepajja familiaranakapäpjjänwa. Santiagompi Juanampejja Jesusan dueño primonakapäpjjänwa. Maysa toqetjja, Jesusan uywiri awkipajj mä arunjja José chachajja Alfeon jilapänwa sasaw yaqhepajj sapjje, ukhamäspa ukhajja Alfeon Santiago yoqapajja Jesusan primopäspänwa.

Jesusajj apostolonakapan sutinakapjja sum amtäna. ¿Jumajj amtaraktati? Sutinakap amtañatakejja akaw yanaptʼätam: paniniw Simón satäpjjäna, paniniw Santiago satäpjjäna, paninirakiw Judas satäpjjäna. Simón (Pedro) apostolojja Andrés sutini mä jilanïnwa, Zebedeon yoqapäki uka Santiagosti Juan sutini mä jilanirakïnwa. Uk yatiñaw kimsaqallqo apostolonakan sutinakap amtañataki yanaptʼätam. Yaqha pusi apostolonakan sutinakapajj akanakawa: Mateo, jupajj impuesto cobrirïnwa; Tomás, qhepatjja jupajj pächasïnwa; Natanael, Jesusajja juparojj mä higos árbol kʼuchunkaskäna ukhaw jawsäna; Felipe, jupajj Natanaelan amigopänwa.

Tunka mayani apostolonakajja Galileatäpjjänwa, Jesusasa ukanarakwa jakäna. Natanaelajja Caná markatänwa. Felipe, Pedro, Andrés jupanakajja Betsaida markatapjjarakïnwa, Pedrompi Andresampisti Capernaúm markaruw qhepat jakasir sarjjapjjäna, Mateojj uka markanwa jakarakpachäna. Santiagompi Juanampejja Capernaúm markana jan ukajj uka marka jakʼanwa jakapjjpachäna, jupanakajj chawlla katuripjjänwa. Amuyatajja, Judas Iscariote, khititejj Jesusar aljantkäna ukakiw Judeatäpachänjja.