Kira-kira udah setaun setengah belalu pengudah John Pemaptisa madahka Jesus nya Anak Bedus Petara. Lebuh Jesus berengkah ngereja pengawa nginjil, bisi beberapa iku orang nyadi murid iya, iya nya Andrew, Simon Peter, John, engka James (menyadi John), Philip, enggau Bartolomew (ke mega dikumbai Natanel). Nyau kelama, bisi mayuh agi orang berengkah nitihka Kristus.—John 1:45-47.

Diatu, Jesus deka milih bala rasul iya. Sida deka begulai rapat enggau Jesus sereta nerima latih ti istimewa ari iya. Tang sebedau Jesus milih bala rasul iya, iya ngagai siti bukit ke engka semak enggau Tasik Galili enggau Kapernaum. Ba dia, Jesus besampi sepemanjai malam. Iya engka minta penemu-dalam sereta berekat ari Petara ke pemutus iya. Ba hari siti, iya ngangauka bala murid iya lalu milih 12 iku ari sida nyadi bala rasul iya.

Kelimpah ari enam iku ke udah dipilih ba pun tadi, Jesus mega udah milih Matthew, siku pengumpul chukai nyadi rasul iya. Jesus mega milih lima iku da agi orang nyadi rasul iya. Iya milih Judas (ke mega dikumbai Tadius enggau “anak James”), Simon ke ransing, Thomas, James anak Alfius, enggau Judas Iskariot.—Matthew 10:2-4; Luke 6:16.

12 iku rasul tu udah begulai nginjil enggau Jesus, lalu iya ngelala sida enggau manah. Sekeda ari bala rasul Jesus nya kaban belayan iya empu. James enggau John nya petunggal Jesus. Pia mega, sekeda orang pechaya Alfius nya menyadi lelaki Josep, iya nya apai Jesus. Enti pia, anak Alfius iya nya rasul James, mega petunggal Jesus.

Jesus tentu senang deka ingat nama semua bala rasul iya. Tang baka ni enggau nuan? Siti chara ke ulih nulung nuan ingat, iya nya bisi dua iku ke benama Simon, dua iku benama James, lalu dua iku da agi benama Judas. Simon (Peter) bisi siku menyadi lelaki ke benama Andrew. Lalu James (anak Sebedi) bisi siku menyadi lelaki ke benama John. Nya meh chara kena ngingatka nama lapan iku ari bala rasul Jesus. Empat iku da agi rasul Jesus nya siku pengumpul chukai iya nya Matthew, siku agi ke deka kakang ati enggau Jesus iya nya Thomas, siku agi ke dikangau di baruh pun kayu iya nya Natanel, sereta kaban Natanel ke benama Philip.

Sebelas iku bala rasul Jesus datai ari Galili, iya nya endur asal Jesus. Natanel datai ari Kana. Philip, Peter, enggau Andrew datai ari Betsaida. Nyau kelama Peter enggau Andrew mindah ngagai Kapernaum, iya nya endur alai Matthew diau. James enggau John mega diau ba Kapernaum tauka ba endur ke semak dia. Lalu seduai iya ngereja pengawa berikan semak endur nya. Pia mega bisi Judas Iskariot, ke deka nyual Jesus. Semina iya aja rasul ke datai ari Judea.