Nĩvavĩtĩte mwaka ũmwe na nyusu kuma Yoana Mũvatisi atavya andũ kana Yesũ nĩwe Kalondu ka Ngai. Yĩla Yesũ wambĩĩe wĩa wake wa kũtavany’a, ve aũme amwe maĩ na ngoo nzeo matw’ĩkie amanyĩw’a make. Aũme asu nĩ Endelea, Simoni Vetelo, Yoana, na nĩvatonyeka Yakovo (mwana-a-inyia wa Yoana) akethĩwa aĩ ũmwe woo, na ĩndĩ Vilivu, na Nathanaeli (ũla weetawa Valitholomayo). Ĩtina wa ĩvinda, ve andũ angĩ aingĩ matw’ĩkie aatĩĩi ma Klĩsto.—Yoana 1:45-47.

Yu ĩvinda nĩyavikie ya Yesũ kũnyuva atũmwa make. Atũmwa asu maaĩle kwĩthĩwa atindany’a ma Yesũ na mesaa kũmanyĩw’a nĩwe kwa nzĩa ya mwanya. Ĩndĩ Yesũ atanamba kũmanyuva, aendie kĩĩmanĩ, na nĩvatonyeka kĩĩma kĩu kĩkethĩwa kyaĩ vakuvĩ na Ũkanga wa Kalilii, na kĩtaĩ vaasa na Kavelinaumi. E kĩĩmanĩ kĩu, nĩwavoyie ũtukũ mũima, na nĩvatonyeka akethĩwa avoyaa nĩ kana Ngai amũnenge ũĩ na aimũtongoesya ainyuva atũmwa make. Mũthenya ũla waatĩĩe, nĩweetie amanyĩw’a make na anyuva 12 katĩ woo matw’ĩke atũmwa make.

Amwe katĩ wa atũmwa ala Yesũ wanyuvie nĩ aũme thanthatũ ala twaweta mwambĩĩonĩ, kwongela Mathayo, ũla Yesũ wamwĩtie e ovisinĩ wa kumĩthya koti. Atũmwa ala angĩ atano Yesũ wanyuvie nĩ Yutasi (ũla weetawa Thatayo na nowe wĩtĩtwe “mwana wa Yakovo”), Simoni Mũkena, Thoma, Yakovo mwana wa Alivaio, na Yutasi Isikalioti.—Mathayo 10:2-4; Luka 6:16.

Yesũ atanamba kũnyuva atũmwa asu 12, nĩwekalanĩtye namo na makathi kũndũ kwingĩ nake, na kwoou nĩwamesĩ nesa. Amwe moo nĩmaileny’e ũndũ nake. Kwa ngelekany’o, Yakovo na Yoana nĩmasyaanĩw’e, na nũndũ veonekana inyia woo asyaanĩw’e na Meli, inyia wa Yesũ, maĩ o ta ana-a-inyia ma Yesũ. Na ethĩwa Alivaio asyaanĩw’e na Yosevu ĩthe wa Yesũ, tondũ andũ amwe maasya, veonekana kana mũtũmwa Yakovo, ũla waĩ mwana wa Alivaio, aĩ o ta mwana-a-inyia wa Yesũ.

Vate nzika, Yesũ ndaĩ aemwa nĩ kũlilikana masyĩtwa ma atũmwa make. Ĩndĩ we no ũmalilikane? Nzĩa ĩmwe ĩtonya ũkũtetheesya kũmalilikana nĩ kũmanya kana ve atũmwa elĩ meetawa Simoni, elĩ meetawa Yakovo, na elĩ meetawa Yutasi. Simoni (ũla weetawa Vetelo) aĩ na mwana-a-inya weetawa Endelea, na Yakovo (mwana wa Sevetii) aĩ na mwana-a-inya weetawa Yoana. Nzĩa ĩsu no ĩkũtetheesye kũlilikana masyĩtwa ma atũmwa nyanya. Ala angĩ ana nĩ mumĩthya wa koti weetawa Mathayo, ũngĩ nĩ Thoma, ũla ĩtina wesie kwĩthĩwa na nzika, Nathanaeli, ũla weetiwe nĩ Yesũ aũngye ungu wa mũtĩ, na mũnyanyae wa Nathanaeli ũla weetawa Vilivu.

Atũmwa ĩkũmi na ũmwe maumĩte Kalilii, na no kw’o Yesũ waumĩte. Nathanaeli aumĩte ndũanĩ ĩmwe ya Kalilii yeetawa Kena. Vilivu, Vetelo, na Endelea maumĩte Vethisaita. Ĩtina wa ĩvinda Vetelo na Endelea nĩmaendie Kavelinaumi, na veonekana Kavelinaumi nĩkw’o kwaĩ mũsyĩ kwa Mathayo. O namo Yakovo na Yoana nĩmatonya kwĩthĩwa mekalaa Kavelinaumi kana vakuvĩ na ndũa ĩsu, na matethasya wĩa wa kũtea makũyũ vakuvĩ na vala mekalaa. Veonekana kana Yutasi Isikalioti, ũla ĩtina wesie kũmũvũnyanĩa Yesũ, nĩwe mũtũmwa ũla waumĩte Yutia e weka.