Papichile nobe mwaka umo ne kichika kufuma kimye Yoano Mubatizhi kyo aambile pe Yesu amba ye Mwana Mukooko wa Lesa. Yesu byo atatwile mwingilo wanji wa kusapwila, banabalume bamo baikele baana banji ba bwanga. Bano banabalume bajinga ba Andeleo, Shimona Petelo, Yoano kampe ne Yakoba (kolojanji Yoano), Filipa ne Batolomo (watelwanga’mba Natanela). Mu kuya kwa kimye, bavula benungileko kwi abo mu kulondela Kilishitu.—Yoano 1:45-47.

Byonkabyo, Yesu winengezhezhe kusala batumwa banji. Bano bo baikele balunda nanji bo afunjishe bya kwingila mwingilo. Bino saka akyangye kwibasala, Yesu wayile ku mutumba, kampe kwipi na Kalunga ka Ngalilea ne muzhi wa Kapenama. Waikele bufuku bonse na kulomba. Kyamweka walombelenga maana ne kuba’mba Lesa amubile bibusa. Byo bwakile, waichile baana banji ba bwanga kabiji mwi abo wasajilemo batumwa 12.

Yesu wasajile batanu na umo batongolwa peulupo, kubikapo ne Mateo waingilanga mwingilo wa busonkeshi. Bakwabo batanu bo asajile bajinga Yudasa (watelwanga’mba Tadeusa kabiji amba “mwana Yakoba”), Shimona Kananiya, Tomase ne Yakoba mwana Alefesa, ne Yudasa Isakaliota.—Mateo 10:2-4; Luka 6:16.

Bano batumwa 12 baendelenga ne Yesu kabiji wibayukile bingi bulongo. Bamo bajinga balongo banji. Yakoba ne nkasanji Yoano bajinga bankasa ne kolo ne Yesu mu jivumo jikwabo. Kabiji inge kya kuba Alefesa ne Yosefwa shanji Yesu bajinga bankasa ne kolo byonka bilanguluka bamo, ko kuba’mba mwana wa kwa Alefesa aye mutumwa Yakoba wajinga nkasa ne kolo ne Yesu mu jivumo jikwabo.

Yesu kechi kyamukatazhanga kuvuluka mazhina a batumwa banji ne. Nanchi mwakonsha kwiavuluka nyi? Kimo kyakonsha kwimukwasha ke kuvuluka kuba’mba pajinga ba Shimona babiji, ba Yakoba babiji, ne ba Yudasa babiji. Kabiji Shimona (Petelo) ne Andeleo bajinga bankasa ne kolo, Yakoba (mwana Zebede) ne Yoano nabo bajinga bankasa ne kolo. Kuyuka bino kwakonsha kwimukwasha kuvuluka mazhina a batumwa batanu na basatu. Kabiji bakwabo bana bajinga musonkeshi (Mateo), awa wazhinaukile (Tomase), ye baichile wajinga munshi ya kichi (Natanela) ne mulunda nanji (Filipa).

Batumwa jikumi na umo bafumine ku Ngalilea, nyaunda mwajinga muzhi mwaikalanga Yesu. Natanela wafumine ku Kena. Filipa, Petelo ne Andeleo bafumine ku Beteseda, kabiji palutwe kacheche Petelo ne Andeleo bavilukijile ku Kapenama, kabiji kyamweka ko kwaikalanga Mateo. Yakoba ne Yoano nabo baikalanga mu Kapenama nangwa kwipi na Kapenama, kabiji bakwatanga masabi. Kyamweka Yudasa Isakaliota wasolwele Yesu ye yenkatu mutumwa wafumine ku Yudea.