Kukavua bu tshidimu tshimue ne tshitupa katshia Yone Mubatiji wamanyisha muvua Yezu Muana wa mukoko wa Nzambi. Pavua Yezu mutuadije mudimu wende wa kuyisha, bamue bantu ba meji mimpe, bu mudi: Andele, Simona Petelo, Yone, pamuapa Yakobo (muanabu ne Yone), Filipo, ne Batolomayo (uvuabu babikila kabidi ne: Natanaele), bakalua bayidi bende. Mu kupita kua matuku, bantu bakuabu ba bungi bakalonda Kristo.​—Yone 1:45-47.

Mpindieu Yezu ukadi pa kusungula bapostolo bende. Nebikale balunda bende ba pa muoyo ne neabalongeshe malu a pa buawu. Kadi kumpala kua Yezu kubasungula, wakaya ku mukuna, pamuapa uvua pabuipi ne Mbuu wa Galela, uvua kawuyi ntanta mule ne Kapênuma. Udi usambila butuku bujima, pamuapa ulomba Nzambi meji ne diambuluisha. Dituku diakalonda, kubikilaye bayidi bende bonso ne kusungulaye bayidi 12 bua bikale bapostolo.

Yezu wakasungula basambombo batukadi batele, kusungulaye kabidi Matayi, uvuaye mubikile ku nzubu wa dilambuila bitadi. Kusungula bakuabu batanu aba: Yudasa (udibu babikila kabidi ne: Tadayo, “muana wa Yakobo”), Simona muena Kanâna, Tomase, Yakobo muana wa Alafayo, ne Yudasa Isakaliote.​—Matayi 10:2-4; Luka 6:16.

Yezu ukavua muenze ngendu ne bapostolo 12 abu ne mubamanye bimpe. Ba bungi ba kudibu bavua balela bende. Yakobo ne Yone bavua bana ba muntu ne bavua pamuapa bana ba mamuende mukuabu wa Yezu. Bilondeshile bamue bantu, Alafayo uvua muanabu ne Jozefe tatuende mudishi wa Yezu, nanku mupostolo Yakobo muana wa Alafayo uvua mua kuikala muana wa tatuende mukuabu wa Yezu.

Bushuwa, Yezu kavua ne lutatu lua kuvuluka mêna a bapostolo bende to. Kadi wewe udiku mua kuavuluka anyi? Umue mushindu udi mua kukuambuluisha nkuvuluka ne: kudi Simona ibidi, Yakobo ibidi, ne Yudasa ibidi. Simona (Petelo) udi ne muanabu Andele, ne Yakobo (muana wa Zebedayi) udi ne muanabu Yone. Eu ke mushindu muimpe wa kuvuluka mêna a bapostolo muanda mukulu. Mu banayi bakuabu mudi: mulambuishi wa bitadi (Matayi), muntu wakalua kuelesha mpata (Tomase), muntu uvuabu babikidile muinshi mua mutshi (Natanaele), ne mulunda wa Natanaele (Filipo).

Bapostolo 11 mba mu Galela, ku ba-Yezu. Natanaele ngua mu Kana. Filipo, Petelo, ne Andele mba mu Betesaida. Petelo ne Andele bakalua kuya ku Kapênuma, muaba uvua Matayi mua kuikala musombele. Yakobo ne Yone bavua pabu basombele muntu amu anyi bavua pabuipi ne Kapênuma, ne bavua benza mudimu wa diloba pabuipi apu. Bidi bimueneka ne: Yudasa Isakaliote, uvua mutungile Yezu, ke mupostolo umuepele uvua mufumine mu Yudaya.