Higa achiel gi nus koro osekalo nyaka ne Johana Jabatiso nyis jopuonjrene ni Yesu e Nyarombo mar Nyasaye. Ka Yesu chako tije ne Nyasaye, nitie joma chunygi ni kare ma ne obedo jopuonjrene. Jogo gin Andrea, gi Simon Petro, gi Johana ma samoro en Jakobo (owadgi Johana), gi Filipo, kod Bathlomeo (ma bende iluongo ni Nathaniel). Bang’ kinde, nitie jomoko mang’eny ma bende ne obedo jolup Kristo.​—Johana 1:45-47.

Koro sani Yesu dwaro yiero jootene. Magi biro bedo joma chiegni kode ahinya kendo obiro miyogi tiegruok makende. Kata kamano, ka pok oyierogi, Yesu dhi e got moro. Nyalo bedo ni en got man machiegni gi Nam Galili, ma ok obor gi Kapernaum.Yesu lemo kuno otieno mangima, kendo nyalo bedo ni okwayo mondo Nyasaye oguedhe kendo omiye rieko. Kinyne, oluongo jopuonjrene ire kendo oyiero 12 kuomgi mondo obed jootene.

Kuom jopuonjre 12 ma oyierogo, auchiel kuomgi osehul nyingegi e chak sulani. Machielo en Mathayo ma Yesu noluongo ka nie ofis mar josol osuru. Abich mamoko gin, Judas (ma bende iluongo ni Thadayo kata “wuod Jakobo”), gi Simon ma jakinda, gi Thoma, gi Jakobo wuod Alfayo, kod Judas Iskariot.​—Mathayo 10:2-4; Luka 6:16.

Nyaka chop sani ji apar gariyogi osebedo ka wuotho gi Yesu, kendo ong’eyogi maber. Thothgi gin wedene. Nenore ni Jakobo gi Johana gin kaka owete Yesu. To ka dipo ni Alfayo ne en owadgi Josef wuon Yesu kaka jomoko paro, to mano nyiso ni jaote Jakobo ma wuod Alfayo en kaka owadgi Yesu.

En adier ni Yesu nong’eyo nying jootene. Kata kamano, be in inyalo paro nyinggi? Gima nyalo konyi paro nyinggi en ng’eyo ni ariyo kuomgi iluongo ni Simon, ariyo iluongo ni Jakobo, kendo ariyo iluongo ni Judas. Simon (Petro) nigi owadgi miluongo ni Andrea, to Jakobo (wuod Zebedi) nigi owadgi miluongo ni Johana. Ng’eyo mano nyalo konyowa paro nying joote aboro mag Yesu. Ang’wen modong’ gin, (Mathayo) jasol osuru, (Thoma) jal ma bang’e dhi bedo gi kiawa e wi Yesu, (Nathaniel) jal ma ne oluong ka en e tiend yath, kod (Filipo) osiep Nathaniel.

Joote apar gachiel wuok Galili ma en alwora mar dalagi Yesu. Nathaniel wuok Kana. Filipo, Petro, kod Andrea gin Jo-Bethsaida. Bang’ kinde, Petro gi Andrea ne odar mi gidhi Kapernaum, kama nenore ni Mathayo ne odakie. Jakobo kod Johana bende odak Kapernaum kata nyalo bedo ni gidak kamoro machiegni gi kanyo, kendo ne gin gi ohandgi mar lupo machiegni gi alworano. Judas Iskariot ma bang’e ne ondhogo Yesu, e ma nenore ni en jaote kende ma thurgi ne ni Judea.