Papera gore no mweji mutandhatu Johani Mubhabhatiji naapera kuzivisa Jesu inga Bvuta ra Mwari. Jesu paakatanga mushando wake, vandhu vanganani vanoda kuziva cokwadi, vakava vajiji vake, vandhu vakadari inga Andereya, Simoni Pedhru, Johani kangaije na Jakobe (munukuna wa Johani), Firipi na Bhatoromeu (anozivikazve inga Natanaeri). Ngo kufamba ko nguva, vazinji vakazobatana na ivona kuti vatevere Kristu.—Johani 1:45-47.

Wari Jesu ari kuda kugaja vapostori vake. Ivona vaizoshanda ngo phedo kamare na Jesu, vecipuwa rovejo inosisira maningi. Manji acito avasana, Jesu anokhwira pa dundhu, kangaije phedo no Jombe ro Garireya, phedo no Kafarnaume. Anopeja usiku hwese eciita mukumbiro, ecikumbira uzivi no makomborero a Mwari. Njiku yakatevera wodaninja vajiji vake perapo wosana 12 pakati pavo kuti vave vapostori vake.

Jesu anosana vatandhatu vaperaya kunangwa pomwe na Mateu, wainga ecishabisa paakadaninjwa. Vamweni vashanu vakazosanwa, vainga dungwa ra Judha (waidaninjwazve kuti Tadheu, mwana wa Jakobe), Simoni, muKanani, Tomasi, Jakobe, mwana wa Arfeu, na Judha Iskariote.—Mateu 10:2-4; Luka 6:16.

12 ava, vakambofamba na Jesu, zve iyena anonasa kuvaziva. Vamweni vainga ukama hwake. Jakobe na Johani, vainga vanukuna va Jesu vana va mamudoko wake. Vamweni vanodavira kuti Arfeu i hama ya Jasefa, baba wakarera Jesu. Ngo kudaro, mupostori Jakobe, mwana wa Arfeu, zvingaita kuti ave munukuna wa Jesu, mwana wa bamudoko wake.

Zviri pambhene kuti Jesu aanesehwi ngo kuziva ma zina o vapostori vake. Imwimwi anomunesera here? Cingamubesera kuti mutame kukanganwa, kuceukija kuti pano vapostori vaviri vanodaninjwa kuti Simoni, pano vaviri vanodaninjwa kuti Jakobe, na vavirizve vanodaninjwa kuti Judha. Simoni (Pedru) ano munukuna anodaninjwa kuti Andereya; Jakobe (mwana wa Zebedheu) ano munukuna anodaninjwa kuti Johani. Kuziva izvi kunomubesera kueujira mazina o vapostori vasere. Asi paciri kucota varongomuna vanozwi: Mateu (mushabisi), Tomasi (wakazokanakanaya), Natanaeri, (wakadaninjwaya pasi po muti) na Firipi (shamwari ya Natanaeri).

Vapostori gumi na umwe ngo vo kuGarireya, kwakakurira Jesu. Natanaeri ngo wo ku Kanaa. Firipi na Andereya vanobva ku Bhetsaidha. Pedro na Andereya vakazothutha voenda ku Kafarnaume, kangaije kwakaenda kogara Mateu. Jakobe na Johani vanogaravo ku Kafarnaume kana kuti phedo no kondhoyo zve ivona vaiita basa ro kuveja. Zvinoita inga kuti Judha Iskariote, wakazotengesaya Jesu, wainga ega basi wo kuJudheya.