Yoovira eyaakha ni emeya ovinyerya vaavale Yohani Mpatisi aamutheten’yeiye Yesu ntoko Epucepuche ya Muluku. Vaavaa Yesu aapacenryeiye muteko awe wa vanlakani, alopwana awiiveleela yaahikhala amuhuserya awe, ntoko Antreya, Simoni Petro, Yohani, akhweya Yakopo (munna a Yohani), Filipi, ni Partalomeyu (iichaniwatho Natanayeli). Mu elukuluku yeeyo, ancipale yaahiphitaana mu omuchara Kristu.—Yohani 1:45-47.

Vano Yesu ori ooreheryeya wi aathanle arummwa awe. Ala anahaala okhala asinthamwene awe awaacameleya nave anahaala waakhela ovyakiha wavameekhaaya. Nyenya ahaakumve waathanla, Yesu onnaya omwaako, akhweya waacamela o Eniya yo Kalileya waacamela o Kafarnau. Owo onnamaliha ohiyu woothene avekelaka, mwawooneya amvekaka Muluku miruku ni mareeliho. Nihiku noocharela owo onnawiichana amuhuserya awe nave onnaathanla 12 wi ekhale arummwa awe.

Yesu onnaathanla athanu nammoha aromoliwe woopaceryani, hiiha ntoko Mateu yoowo Yesu aamwichanneiye va nipuro na oliviha musokho. Akina athanu athanliwe, ti Yuta (oniichaniwatho Tateu ni “mwana a Tiyago”), Simoni o Kanani, Tome, Tiyako mwaana a Alfewu, ni Yutasi Iskariyoti.—Mateu 10:2-4; Luka 6:16.

Oothene yaala 12 ahintoko weeca ni Yesu, nave owo ohaasuwela phaama. Akina a yaawo amusi awe. Anna Tiyako ni Yohani mwawooneya asinna oohima oopacerya a Yesu. Nave ntoko akina anuupuwelaaya, Alfewu aari munna a Yosefe, tiithi aamphunwe Yesu, voocharela mwaana a Alfewu, murummwa Tiyako, ari munna oohima a Yesu.

Mwawooneya, Yesu, haanono nikacamiho na wuupuwelela masina a arummwa awe. Apwanne munnawerya wuupuwela? Echu emoha eni yookhaviheryeeni ori wuupuwela wi aakhalavo eeli aniichaniwa Simoni, eeli aniichaniwa Tiyako, ni eeli aniichaniwa Yuta. Simoni (Petro) ookhalano munnawe Antreya, nave Tiyako (mwaana a Sepetewu) ookhalano munnawe Yohani. Ola mukhalelo wa wuupuwela masina a arummwa athanu nararu. Akina asese onaphitaanyerya mulipa a musokho (Mateu), mmoha yoowo ohoolo waya aakhwile minikwa (Tome), mmoha iichaniwe mmwirini (Natanayeli), ni nthamwene a Natanayeli (Filipi).

Arummwa khumi nammoha anarweela o Kalileya, elapo ya Yesu. Natanayeli onarweela o Kanani. Filipi, Petro, ni Antreya anarweela o Petisaita. Petro ni Antreya moovira wa elukuluku annathaamela o Kafarnau, weiwo mwawooneya aakhaleiyewo Mateu. Tiyako ni Yohani anakhalatho weiwo naari waacamela o Kafarnau, nave yanampaka nakoso waacamela weiwo. Yutasi Iskariyoti, yoowo ohoolo waya aamutuminhe Yesu, enooneya wi ti murummwa mmoha pahi onarweela o Yuteya.