Palamba enima notyihupe tunde etyi Suau Batisita apopia okuti Sesusi Ondyona ya Huku. Etyi Sesusi ahimbika ovilinga viae, ovanthu ovanyingi ovakuatyili avakala ovalongwa vae, ngetyi Andelee, na Simau Petulu, na Suau, tyafuile na Tiagu (velikwai na Suau), na Filipe, na Batolomeu (tupu wiihanwa okuti o Natanaele). Mokueenda kuomuvo, ovanthu ovakuavo ovanyingi tupu avelipake kumwe novalongwa ovo okulandula Kilisitu. — Suau 1:45-47.

Pahe, Sesusi wafuapo opo aholovone ono apositolu mbae. Ono apositolu ombo mambukala omapanga ae omanene, tupu mevelongesa ovipuka viakolela. Mahi tyina nkhele ehenekoye ono apositolu, Sesusi aende komphunda, tyafuile ikahi popepi Nelunga lyo Ngalileya, popepi no Kafalanau. Akala otyinthiki atyiho nokulikuambela, tyafuile okuita ounongo nononkhano onongwa mba Huku. Etyi kuatya, aihana ovalongwa vae, akoyo-po 12 opo vakale ono apositolu mbae.

Sesusi waholovona ovalongwa epandu tuapopia konthyimbi, na Mateusi, una Sesusi aihanene poseketa yovatanthi velilimu. Ovakuavo vetano akoya ovo Sunda (tupu wiihanwa okuti o Tandeu “omona wa Tiaku”), na Simau omu Kanaa, na Tomasi, na Tiaku omona wa Alufeu na Sunda Isikaliote. — Mateusi 10:2-4; Luka 6:16.

Pahe, ono apositolu ombo 12 ankho valinga oungendi na Sesusi iya ngwe uvei nawa. Ovanyingi puvo ombunga yae. Tiaku na Suau ankho velikwai, tyafuile ankho velilandula na Sesusi mo vohe. Iya ngetyi vamwe vasoka, inkha otyo, Alufeu ankho velilandula na Suse, tate ya Sesusi koutekuli, iya moluotyo omona wa Alufeu, apositolu Tiaku, velilandula na Sesusi mo vohe.

Tyotyili, Sesusi utupu otyitateka tyokulimbwa omanyina ono apositolu mbae. Okuti no ove uvehinangela? Otyipuka tyimwe matyikukuatesako, okuhinangela okuti, vevali ankho vatiwa ovo Simau, vevali ankho vatiwa ovo Tiaku, ovakuavo vevali vatiwa ovo Sunda. Simau (Petulu) ankho una ondenge yae Andelee, iya Tiaku (omona wa Sembendeu) ankho una ondenge yae Suau. Otyo matyikukuatesako okuhinangela omanyina ono apositolu etyinana. Ovakuavo vekuana, umwe puvo ankho omutanthi welilimu (Mateusi), omukuavo oyo una konyima watesile onkhango konthele ya Sesusi (Tomasi), omukuavo oyo una waihanenwe pombuelo yomuti (Natanaele), nepanga lya Natanaele (Filipe).

Ono apositolu 11 ankho ovo ko Ngalileya, otyilongo tya Sesusi. Natanaele ankho owo ko Kanaa. Filipe, na Petulu, na Andelee ankho ovo ko Betesata. Mokueenda kuomuvo, Petulu na Andelee availukila ko Kafalanau, kuna ankho Mateusi akala. Tiaku na Suau, tupu ankho vakala mo Kafalanau ine popepi no Kafalanau, pana ankho vena otyilinga tyokufwa ombisi. Sunda Isikaliote, una konyima walandesa Sesusi, tyafuile oe vala ankho ukala ko Sundeya.