Jesus tentu lelak laban udah besampi sepemanjai malam sereta milih 12 iku rasul. Diatu hari udah siang, tang iya agi bisi pengering enggau pengeran deka nulung orang. Iya ngereja nya ba siti endur ti bebukit ba Galili, engka enda jauh ari endur iya nginjil ba Kapernaum.

Mayuh orang ke datai ngagai iya datai ari endur ti jauh. Sekeda ari sida datai ari begian selatan, bisi mega datai ari Jerusalem enggau endur bukai ba Judea. Sida ke bukai datai ari Tirus, iya nya nengeri semak enggau tebing tasik, enggau Sidon ke ba begian barat laut. Nama kebuah sida deka betemu enggau Jesus? “Sida datai laban sida deka mendingka iya sereta ngarapka penyakit sida digeraika.” Lalu nya meh utai ke digaga Jesus. Jesus “ngeraika semua sida.” Semua sida ke sakit gerai magang! Jesus mega ngeraika “orang ke dikachau melikat ti jai.”—Luke 6:17-19.

Jesus ngagai endur ti rata ba bukit nya lalu orang begelumu ngelingi iya. Bala murid iya, kelebih agi 12 iku rasul iya, engka ke pemadu semak enggau iya. Semua sida gagit ati deka ninga ajar ari Jesus, laban iya siku pengajar ke ulih ngereja pengawa ajih. Jesus meri jaku ajar ke meri penguntung ngagai bala peninga nya. Kenyau ari nya, mayuh orang bulih penguntung ari utai ke diajar Jesus ba bukit nya. Kitai mega tau bulih penguntung ari ajar nya. Taja pan pemendar ke diajar Jesus nya ajar ti dalam, tang iya ngajar semua nya enggau chara ti mudah dimeretika sereta terang. Maya nya, Jesus mayuh nyebut pasal utai ke biasa ke ditemu orang. Enggau nya, utai ke dipadahka Jesus ulih dimeretika sida ke deka idup nitihka peneka Petara. Nama sekeda poin ti penting ari utai ke dipadah Jesus ke ngasuh jaku ajar nya amat berega?

Semua orang deka gaga ati. Ketegal Jesus nemu utai tu, Jesus nerangka sapa ke amat-amat gaga ati. Jaku Jesus tentu narit ati bala peninga iya. Tang sekeda utai enda dimeretika sida.

Ku Jesus madah: “Gaga ati meh sida ke nemu diri begunaka iring ari Petara, laban Perintah serega endang enggi sida. Gaga ati meh sida ke tusah ati, laban sida deka diperindang. . . . Gaga ati meh sida ke keranka pengelurus, laban Petara deka ngemuaska sida. . . . Gaga ati meh sida ke kena perinsa ketegal ngereja utai ti lurus, laban sida deka bempu Perintah serega. Gaga ati meh kita lebuh orang ngelese, lalu merinsaka kita . . . ketegal aku. Gaga sereta lantang ati meh kita.”—Matthew 5:3-12.

Nama reti ku Jesus lebuh iya nyebut “gaga”? Iya enda merujuk ngagai asai ati ti gaga ke diasaika orang lebuh ngereja pengawa berami gaga ati. Iya ke amat, pengaga ati ti bendar lebih agi ari nya. Pengaga ati ti bendar nyengkaum asai ati ti amat puas, sereta bisi tuju ba pengidup.

Sapa orang ke amat gaga ati? Jesus madahka sida nya orang ke nemu diri begunaka iring ari Petara, nesal ati ke dosa sida, lalu sida ngelala sereta nyembah Petara. Taja pan sida dipegedi tauka diperinsa ketegal ngereja peneka Petara, sida gaga ati laban nemu diri benung ngagaka ati Petara. Lalu Petara deka merekatka sida enggau pengidup ti meruan belama iya.

Tang mayuh orang berunding, nyadi kaya sereta ngulihka penyenang ba pengidup ulih mai pengaga ati ti bendar. Taja pia, Jesus nyebut utai ti enda sejalai enggau runding orang mayuh. Jesus nyebut bida tu kena nulung bala peninga iya berunding. Iya madah: “Tang tulah meh kita ke kaya, laban kita udah ngasaika pengidup ti nyamai enggau pengabis iya. Tulah meh kita ke udah kenyang diatu, laban kita deka lapar. Tulah meh kita ke ketawa diatu, laban kita deka tusah ati sereta nyabak. Tulah meh kita enti semua orang muji kita, laban aki ini sida mega muji bala nabi pelesu.”—Luke 6:24-26.

Nama kebuah orang ti kaya, ti ketawa, sereta nerima puji ari orang bukai nerima tulah? Laban  lebuh sesiku orang ngembuan sereta ngenuluka semua pekara tu, iya engka enda ngemeratka sembah ngagai Petara. Nya alai iya nadai pengaga ati ti bendar. Tang Jesus enda madah, enti sesiku orang nyadi miskin sereta lapar, iya deka gaga ati. Taja pia, orang ti baka tu suah nerima ajar Jesus. Sida mega nerima berekat ke ngasuh sida ngembuan pengaga ati ti bendar.

Jesus benung berunding pasal bala murid iya. Nya alai iya madah: “Kita tu garam dunya.” (Matthew 5:13) Udah tentu, bala murid iya ukai garam ti amat. Tang, garam dikena ngambika pemakai enda jampat jai. Mayuh garam disimpan semak alta Rumah Sembiang, lalu garam mega bisi dikena lebuh meri pemeri ke bukai. Garam mega nunjukka pengelepas ari ulah ti enda lurus sereta utai ti buruk. (Adat Lewi 2:13; Esekiel 43:23, 24) Murid Jesus nya “garam dunya” laban sida nulung orang bukai. Sida nulung orang ngambika nyaga kaul ti manah enggau Petara sereta ngetanka ulah moral ti manah. Nya alai, pesan ari murid Jesus ulih nyelamatka nyawa orang ke ninga.

Jesus mega madah ngagai bala murid iya: “Kita tu penampak dunya.” Orang enda nungkun lampu kelita ngena bakul. Tang ngengkahka kelita nya ba penuduk iya ngambika ulih meri penampak. Nya alai, Jesus meransang bala murid iya: “Awakka penampak kita manchar ngagai orang, ngambika sida meda pemadas pengawa kita lalu ngemuliaka Apai kita ti ba serega.”—Matthew 5:14-16.

Tuai pengarap orang Judah kala nguji deka munuh Jesus, laban sida ngumbai iya ngelanggar Adat Petara. Nyadi Jesus madah enggau terus terang: “Anang ngumbai aku datai deka muai Adat tauka Ajar Sida Nabi. Aku datai ukai deka muai Adat enggau Ajar nya, tang deka ngamatka iya.”—Matthew 5:17.

Jesus amat bebasaka Adat Petara lalu meransang orang bukai ngereja utai ti sama. Jesus madah: “Barang sapa ngelanggar pesan ti pemadu mit tu, lalu ngajar orang ngelanggar pesan nya, iya bedau ulih tama ngagai Perintah serega.” Reti iya, orang nya enda ulih bempu Perintah Petara.  Ku iya agi: “Tang, barang sapa ngasika pesan tu, lalu ngajar orang ngasika pesan tu, ulih tama ngagai Perintah serega.”—Matthew 5:19.

Jesus mega ngutuk ulah ti ulih ngujungka orang ngelanggar Adat Petara. Jesus madah, ba dalam Adat nya bisi nyebut “Anang munuh orang.” Pengudah nya Jesus madah: “Enti kita majak ringat ngagai menyadi kita, kita deka kena pechara.” (Matthew 5:21, 22) Sesiku orang salah enti iya terus ringat enggau orang bukai, laban tu ulih ngujungka iya munuh orang nya. Nya alai, Jesus nerangka utai ke patut digaga sesiku orang ngambika ulih bebaik. Ku iya: “Nya alai lebuh kita mai pemeri ngagai alta, lalu teingatka menyadi kita bisi enda nyamai ati ngagai kita, tinggalka pemeri kita ba mua alta. Mupuk lalu bebaik dulu enggau iya, udah nya baru kita mansang lalu meri pemeri kita.”—Matthew 5:23, 24.

Adat Petara mega nagang orang butang. Jesus madah: “Kita udah ninga jaku ti munyi tu: ‘Anang butang.’ Tang aku madah ngagai kita, barang sapa majak merening ngagai indu enggau ati ti kamah, udah butang enggau indu nya dalam ati iya.” (Matthew 5:27, 28) Jesus ukai nyebut pasal orang ke enda sengaja berundingka ulah ti enda bemoral. Tang Jesus madahka enggau nyemetak, orang ke “majak merening” nya endang amat salah. Pengawa ti baka nya meransang pengingin seks. Udah nya, enti bisi peluang, orang nya deka ngereja ulah ti enda bemoral. Baka ni sesiku orang ulih nyeliahka utai tu? Iya mesti sangggup ngereja nama-nama utai ngambika iya enda ngereja dosa nya. Jesus madah: “Enti mata kanan kita mai kita bedosa, keruk lalu buai iya! . . . Lalu enti jari kanan kita mai kita bedosa, tetak lalu buai iya!”—Matthew 5:29, 30.

Sekeda orang sanggup netak begian tubuh ti dijangkit penyakit ngambika ulih nyelamatka nyawa diri. Jesus madahka amat penting “buai” nama-nama aja, indah utai ti berega ba kitai baka mata tauka jari, ngambika enda berundingka utai ti enda bemoral sereta nerima kesan ari ulah nya. Jesus madahka: “Manah agi kita lenyau jari sepiak ari ke nejuka semua tubuh kita dibuai ngagai Gehena” (Gehena tu endur orang nunu sampah ba luar dinding kuta Jerusalem), ke mai reti pengerusak ti belama iya.

Jesus mega meri jaku lalau pasal utai ke patut digaga kitai enti orang ngemediska ati kitai. Iya madah, “Anang ngelaban orang ke jai, enti orang nampar kuyu kanan kita, awakka iya mega nampar kuyu kiba kita.” (Matthew 5:39) Jesus enda madahka sesiku orang enda ulih ngetanka diri tauka ruang bilik iya lebuh diserang. Tang lebuh sesiku orang ditampar, iya enda balat bakal tauka mati. Nya alai, ‘tampar’ merujuk ngagai jaku jai ari orang bukai. Jesus madahka enti orang deka belaya enggau kitai, enda ngira sekalika iya nampar tauka jai jaku ngagai kitai, kitai enda patut malas iya.

 Jaku lalau Jesus sejalai enggau Adat Petara ke ngasuh kitai rinduka orang bukai. Nya alai, iya madah ngagai bala peninga iya: “Anang ngetu rinduka munsuh kita, lalu besampika sida ke merinsaka kita.” Jesus meri sida kebuah ngereja nya: “Ngambika kita ulih nyadi anak Apai kita ti ba serega. Iya ngasuh mata panas manchar ngagai orang ke jai enggau ngagai orang ke manah, lalu meri ujan ngagai orang ke lurus enggau orang ke enda lurus.”—Matthew 5:44, 45.

Jesus nyimpulka begian tu ba cheramah iya ba atas bukit, ku iya: “Kita patut nyadi sempurna, baka Apai kita ti ba serega, laban Iya nadai nama-nama pengurang.” (Matthew 5:48, nota kaki.) Jesus nadai madah mensia patut nyadi sempurna. Tang enti kitai neladan Petara, kitai ulih nunjukka pengerindu ngagai semua orang indah ngagai bala munsuh kitai. Dalam reti ke bukai: “Anang ngetu kasihka orang, baka Apai kita ti pengasih.”—Luke 6:36.

Seraya Jesus nampung cheramah iya, iya madah ngagai bala peninga iya: “Bejimat, anang ngereja utai ti lurus ba mua orang ketegal deka dipeda sida.” Jesus ngutuk orang ke pura-pura ngapa ngereja utai ti manah ba mua orang. Ku iya: “Lebuh kita nulung orang ke begunaka bantu, anang nyepu terumpit baka ke digaga orang ke pura-pura ngapa.” (Matthew 6:1, 2) Manah agi ngereja utai ti manah lebuh enda dipeda orang.

Udah nya Jesus madah: “Lebuh kita besampi, anang baka orang ke pura-pura ngapa, laban sida rindu bediri lalu besampi ba balai gempuru, enggau ba simpang jalai besai, ngambika ulih dipeda orang.” Tang, ku iya madah: “Lebuh kita besampi, tama meh ngagai bilik kita. Pengudah kita nutup pintu, besampi meh ngagai Apai kita ke enda ulih dipeda.” (Matthew 6:5, 6) Jesus nadai madah enda ulih besampi ba mua orang mayuh, laban iya empu mega kala besampi ba mua orang mayuh. Tang Jesus ngutuk sampi ke disebut orang ke deka minta diri dipuji ba mua orang bukai.

Jesus mega meri jaku lalau tu ngagai bala peninga iya: “Lebuh kita besampi, anang selalu ngulang leka jaku ti sama, baka ke digaga orang ari bansa bukai.” (Matthew 6:7) Jesus nadai madah salah enti kitai selalu besampi pasal utai ti sama. Tang Jesus ngutuk sampi ke dihafal laban orang “selalu ngulang” sampi sida. Udah nya Jesus ngajar chunto sampi ke bisi nyebut pasal tujuh iti peminta ti bebida. Tiga iti peminta ti keterubah bekaul enggau hak Petara merintah sereta peneka Iya. Tu nyengkaum besampi ngambika nama Petara dikuduska, Perintah Iya datai, sereta peneka Iya nyadi. Pengudah besampi pasal tiga iti pekara nya, nya baru kitai ulih besampi pasal pekara diri empu. Chunto iya, kitai ulih besampi minta pemakai ke sehari nya, lalu minta pengampun dosa ari Petara, sereta dilepaska ari penguji.

 Kati reta nya penting ba kitai? Ku Jesus madah ngagai orang mayuh ba dia: “Anang nyimpan reta ba dunya, alai indu gegat enggau tegar deka ngerusak, lalu penchuri tama ngenchuri reta nya.” Jaku Jesus amat masuk akal! Reta ba dunya tu ulih rusak. Reta kitai enda ulih nulung kitai bisi kaul ti manah enggau Jehovah. Nya alai Jesus madah: “Simpan reta ba serega.” Kitai ulih ngereja nya enti kitai ngenuluka pengawa Petara ba pengidup kitai. Nadai orang ulih ngerampas kaul kitai enggau Petara sereta berekat pengidup belama iya jemah ila. Naka meh pengamat jaku Jesus: “Ba dini alai reta kita, ba dia meh alai ati kita.”—Matthew 6:19-21.

Kena nulung bala peninga meretika poin tu, Jesus nyebut pasal siti jaku sempama: “Mata kita baka lampu ke tubuh kita. Nya alai, enti mata kita betatika siti pekara aja, semua tubuh kita deka tampak. Tang enti mata kita amu, semua tubuh kita deka petang.” (Matthew 6:22, 23) Enti mata kitai befungsi enggau manah, iya baka lampu ke meri penampak ngagai pengidup kitai. Tang, mata kitai patut betatika siti pekara aja. Enti enda, kitai deka befokus ngagai utai ti salah ba pengidup kitai. Enti kitai befokus ngagai reta tengkira lalu enda ngenuluka sembah kitai ngagai Petara, ‘semua tubuh kitai deka petang.’ Reti iya, kitai engka berengkah ngereja utai ti jai.

Jesus lalu meri siti chunto: “Nadai orang ulih nyadi ulun dua iku tuan, laban iya deka begedika siku lalu rinduka siku, tauka taluk ngagai siku lalu enda bebasaka siku. Kita enda ulih nyadi ulun Petara, lalu ba maya ti sama nyadi ulun Pengaya.”—Matthew 6:24.

Sekeda orang ke ningaka cheramah Jesus engka irau pasal utai ke diguna sida ba pengidup. Jesus ngasuh sida yakin, sida enda ibuh irau enti sida ngenuluka peneka Petara ba pengidup. Jesus madahka: “Peratika burung ba langit. Sida  nadai betanamka utai, nadai ngetau, tauka besimpanka utai dalam setor. Taja pia, Apai kita ti ba serega nupi sida.”—Matthew 6:26.

Baka ni enggau bungai ti tumbuh ba padang? Jesus madah “indah Raja Solomon ke ngembuan mayuh utai ti manah pan nadai gari ngemanah siti ari bungai nya.” Nama utai ke ulih dipelajar ari nya? “Enti Petara ngari utai tumbuh ba babas, ke idup seharitu lalu ditunu hari siti, endaka Iya mega deka ngari kita?” (Matthew 6:29, 30) Nya alai Jesus meransang bala peninga iya: “Anang irau lalu nyebut: ‘Nama utai ti deka diempa kami?’ tauka ‘Nama utai ti deka diirup kami?’ tauka ‘Nama gari ti deka dikena kami?’ . . . Apai kita ti ba serega nemu kita begunaka semua utai nya. Anang ngetu ngenuluka Perintah Petara enggau pengelurus Iya, lalu semua utai nya deka diberi ngagai kita.”—Matthew 6:31-33.

Bala rasul enggau orang ke lurus ati deka idup enggau chara ti ngelantangka ati Petara. Tang tu enda senang ba sida, laban orang Parisi rindu ngakim orang enggau chara ti jai. Nya alai Jesus madah ngagai bala peninga iya: “Badu agi ngakim ngambika kita enda diakim. Laban chara kita ngakim deka dikena ngakim kita.”—Matthew 7:1, 2.

Jesus madahka siti jaku sempama kena nunjukka penusah ke ulih nyadi enti nitihka chunto orang Parisi ke rindu ngakim orang. Jesus madah: “Orang ke buta enggai nyadi ngiring orang ke buta, enda pia? Enti iya ngereja nya, endaka seduai iya sama labuh ngagai lubang?” Nyadi baka ni bala peninga Jesus patut meda orang bukai? Sida enda patut jampat ngiga penyalah orang bukai laban tu siti penyalah ti besai. Ku Jesus nanya: “Baka ni ku kita tau nyebut ngagai menyadi kita, ‘Menyadi, awakka aku muai repik kayu ari mata nuan,’ tang kita enda meda lumpung kayu dalam mata kita empu. Kita tu orang ke pura-pura ngapa! Buai dulu lumpung kayu ari mata kita empu, nya baru mata kita lansik, lalu kita ulih muai repik kayu ari mata menyadi kita.”—Luke 6:39-42.

Taja pan bala murid Jesus enda ulih ngakim orang enggau chara ti jai, tang sida patut berunding enggau masuk akal. Jesus madah: “Anang meri utai ti kudus ngagai ukui, lalu anang meri batu mutiara ngagai babi.” (Matthew 7:6) Pemendar Bup Kudus amat berega baka mutiara. Enti orang enda menghargai pemendar, bala murid Jesus patut badu nulung sida lalu ngiga orang bukai ke deka ninga.

Jesus nyebut baru ngagai topik besampi, lalu madahka kebuah patut terus besampi. Ku iya: “Anang badu minta, lalu kita deka nerima.” Nyadi, Petara sedia deka nyaut sampi. Tu ulih dipeda ari tanya Jesus: “Kati kita meri batu ngagai anak kita, enti iya minta roti? . . . Enti kita orang ke bedosa nemu meri utai ti manah ngagai anak kita, Apai kita ti ba serega tentu nemu agi meri utai ti manah ngagai orang ke minta ari Iya!”—Matthew 7:7-11.

Udah nya Jesus ngajar chara ngelayan orang bukai: “Kereja ngagai orang baka ke dikedekaka kita kereja orang ngagai kita.” Semua kitai patut nitihka jaku lalau Jesus lebuh kitai ngelayan  orang bukai. Tang tu enda senang dikereja laban Jesus madah: “Tama nengah pintu ti sempit, laban pintu ti besai enggau jalai ti luas nuju ngagai pengerusak, lalu mayuh orang nengah jalai nya. Tang pintu ti sempit, enggau jalai ti mar, nuju ngagai pengidup, lalu semina mimit aja orang tetemuka iya.”—Matthew 7:12-14.

Bisi orang deka nesatka murid Jesus ari jalai ti nuju ngagai pengidup. Nya alai, Jesus meri jaku tangkan ngagai sida: “Bejaga kita ari nabi ti pelesu, ke datai ngagai kita baka bedus, tang iya ti bendar, sida nya serigala ti mangah.” (Matthew 7:15) Jesus mega madah bida entara pun kayu ti manah enggau pun kayu ti enda manah ulih dipeda ari buah iya. Tu sama enggau orang. Kitai ulih ngelala nabi ti pelesu ari ajar sereta utai ke digaga sida. Jesus nerangka, semina madahka diri murid Jesus enda chukup. Tang orang nya patut nunjukka nya ari utai ke digaga iya. Bisi orang madah Jesus nya Tuan sida, tang baka ni enti sida enda ngereja peneka Petara? Jesus madah: “Aku deka nyaut sida: ‘Aku enda ngelala kita! Rari ari aku, kita ke ngereja penyai!’”—Matthew 7:23.

Jesus ngujungka cheramah iya enggau madahka: “Genap iku orang ke ninga jaku aku lalu ngasika nya, baka orang ke pintar, ke nirika rumah iya ba atas batu. Lebuh hari bangat ujan, ai bah nyadi, lalu ribut bepuput mangka ngagai rumah nya, tang rumah nya enda rubuh, laban iya didirika ba atas batu.” (Matthew 7:24, 25) Nama kebuah rumah nya enda rubuh? Laban orang nya “numbak lubang ti dalam lalu nudukka pugu rumah iya ba atas batu.” (Luke 6:48) Semina ninga jaku Jesus enda chukup. Kitai patut bebendar “ngasika nya.”

Taja pia, baka ni enggau orang ke “ninga jaku” tang “enda ngasi”? Iya “baka orang ke beli, ke nirika rumah iya ba atas pasir.” (Matthew 7:26) Ujan, ai bah, enggau ribut ti balat ulih ngasuh rumah nya rubuh.

Orang mayuh kagum enggau chara Jesus ngajar. Tu ketegal utai ke diajar iya datai ari Petara, enda baka tuai pengarap ke bukai. Engka mayuh ari sida ke ningaka Jesus maya nya nyadi murid iya.