Benɛ Yesu gbe e Yoku ɔ Nɔ Fiɛɛmi ɔ nya a, e pue nɔ kɛ ho Kapernaum ya. E lejɛ ɔ sumi pɛ nɛ Yuda ma nimeli komɛ ba e ngɔ. Roma asafoatsɛ ko nɛ e pi Yuda no lɛ e tsɔ mɛ Yesu ngɔ.

Roma ta bulɔ nɔkɔtɔma nɛ ɔ ngɛ nyɔguɛ ko nɛ e be he wami kulaa nɛ e miɔ nɛ e ma gbo. E ngɛ mi kaa ma je no ji asafoatsɛ nɛ ɔ mohu lɛɛ, se e suɔ nɛ Yesu nɛ ye bua lɛ. Yuda bi ɔmɛ de Yesu kaa nyumu ɔ nyɔguɛ ɔ “fɔɔ si ngɛ we mi kɛ hulemi hiɔ nɛ e hí nɔ́ ko peemi.” E maa pee kaa hiɔtsɛ ɔ ngɛ nɔ́ nae wawɛɛ. (Mateo 8:6) Yuda ma nimeli ɔmɛ tu asafoatsɛ ɔ he munyu kpakpa kɛ tsɔɔ Yesu ke: “Nyumu nɛ ɔ, ke o pee nɔ́ nɛ ɔ ha lɛ ɔ, e sa lɛ, ejakaa e suɔ wɔ Yuda bi ɔmɛ; wa kpe he ɔ po lɛ nɛ e ma ha wɔ.”​​—Luka 7:4, 5.

Enɛ ɔ he ɔ, Yesu kɛ ma nimeli ɔmɛ ho asafoatsɛ ɔ we mi ya. Benɛ e piɛ bɔɔ nɛ a maa su we ɔ mi ɔ, nyumu ɔ tsɔ e huɛmɛ nɛ a kɛ Yesu ya kpe nɛ a de lɛ ke: “Nyɔmtsɛ, koo hao o he. I sɛ kaa i haa nɛ o baa ye we mi. Jehanɛ se hu, i le kaa e sɛ kaa imi nɛ ɔ, i baa o ngɔ.” (Luka 7:6, 7) Nyumu nɛ hɛɛ blɔ nya ngua nɛ ɔ ngɛ he si bami nitsɛ! Enɛ ɔ tsɔɔ kaa nyumu nɛ ɔ ngɛ slɔɔto kulaa ngɛ Roma bi nɛ a peeɔ a nyɔguɛhi basabasa a a he.​​—Mateo 8:9.

Asafoatsɛ ɔ le paa kaa Yuda bi kɛ ma je li bɔɛ. (Bɔfo Ɔmɛ A Ní Tsumi 10:28) Eko ɔ, enɛ ɔ lɛ ngɛ nyumu nɛ ɔ juɛmi mi loko e de e huɛmɛ ɔmɛ kaa a ya de Yesu ke: “Moo lɛɛ moo tu munyu, kɛkɛ ye nyɔguɛ ɔ ma ná he wami” ɔ nɛ.​​—Luka 7:7.

Benɛ Yesu nu munyu nɛ ɔ, e pee lɛ nyakpɛ, nɛ e de ke: “I ngɛ nyɛ dee ke, i nɛ hemi kɛ yemi kaa kikɛ nɛ ɔ hyɛ; dɛbi, ngɛ Israel tete po i nɛ hyɛ.” (Luka 7:9) Benɛ asafoatsɛ ɔ huɛmɛ ɔmɛ ya su we ɔ mi ɔ, a ya na kaa nyɔguɛ nɛ jinɛ e be he wami ɔ ná he wami nɛ e ngɛ saminya.

Benɛ Yesu tsa hiɔtsɛ ɔ ta a, e ngɔ he blɔ ɔ kɛ ma nɔ mi kɛ ha mɛ kaa Mawu maa jɔɔ ma je li nɛ a ngɛ hemi kɛ yemi ɔ. E de mɛ ke: “Nihi babauu maa je beleku kɛ bonyoku kɛ ba, nɛ a kɛ Abraham, kɛ Isak, kɛ Yakob ma ba ye ní ngɛ hiɔwe matsɛ yemi ɔ mi.” Se Yuda bi nɛ a be hemi kɛ yemi ɔ nɛɛ? Yesu de ke, ‘a ma sake mɛ kɛ fɔ tsu ɔ se ngɛ diblii kpii ɔ mi; nɛ a ma fo ya, nɛ a ma kpe a lungu nya ngɛ lejɛ ɔ.’​​—Mateo 8:11, 12.

Lɔ ɔ he ɔ, ke Yuda bi nɛ a ha mɛ he blɔ kaa a ba piɛɛ Yesu he kɛ ye matsɛ ngɛ hiɔwe ɔ kplɛɛ we he blɔ nɛ ɔ nɔ ɔ, a ma kua mɛ. Se ma je li ɔmɛ lɛɛ, a ma he mɛ atuu, nɛ a kɛ Yesu maa ye matsɛ “ngɛ hiɔwe matsɛ yemi ɔ mi.”