Ing’ei ma Yesu udaru ponji pare iwi got, ecidho i adhura mi Kapernaum. Kinde m’etundo kuca, judong Juyahudi moko ubino ibang’e. Ng’atu m’uorogi utie Jaroma, jadit mir askari, m’utie ngo Jayahudi.

Jaratic pa jadit mir askari m’emaru akeca ubino nitwoyo lee, ma dong’ etie ceng’ini ku tho. Jadit mir askari maeno ma tie jego, ubesayu kony ibang’ Yesu, kadok nwang’u etie ngo Jayahudi de. Juyahudi giyero ni Yesu nia jaratic pa jadit maeno “[u]vuto i ot ku tho ma nego kum dhanu nding’, man esende dit,” ecibedo ve ebino niremo lee mandha. (Matayo 8:6) Judong Juyahudi giyero ni Yesu nia jego maeno uromo jumi ire kony, giwacu kumae: “Emaru thek mwa, man egomo iwa kacokiri mwa en.”​—Luka 7:4, 5.

Ndhundhu nica, Yesu ucoko woth ku judongo maeno, gicidho i pacu pa jadit mir askari. Kinde ma giwok ceng’ini, jego uoro jurimbe ucidh uyer ire nia, “Rwoth, kud isendri giri; kum an aromo ngo nia imond i ot para: kum kumeno ia pido nia aromo ngo m’abin ko i beng’i.” (Luka 7:6, 7) Ka ng’atu ma mio cik iwi jumange uyero lembe ma kumeno, eno nyutho ngo nia etie ku jwigiri? Lembuno ubenyutho nia ng’atu maeno ukoc ku Juroma mange ma gibed gisendo ng’eca ku rac.​—Matayo 8:9.

M’umbe jiji, Jego nino ung’eyo kamaleng’ nia Juyahudi gidikiri ngo ku dhanu mange. (Tic mi Jukwenda 10:28) Saa moko pi lembuno re m’uketho jego maeno uoro jurimbe ucidh uyer ni Yesu nia, ‘yer lembe acel ci, e kum jaratic para bikei.’​—Luka 7:7.

I Yesu uwang’ lii kinde m’ewinjo lembuno, uketho eyero kumae: “Awacu iwu kumae, fodi anwang’u yioyic madit ma kumeni ngo, ungo, i Israel de ngo.” (Luka 7:9) Kinde ma jurimb jego gidok i pacu, ginwang’u nia kum jaratic m’ubino niremo lee ukei.

I ng’eye ma Yesu ukeyo kum ng’atuno, etio ku kaka maeno pi ninyutho nia dhanu ma gitie ngo Juyahudi bende, ma re gitie ku yioyic, gibinwang’u mugisa. Eyero kumae: “Dupa biai yo nyangu ku yo reto bende, man gibibedo piny gikud [Abrahamgi], man Isak, ku Yakobo, i Ker m’i polo.” Pi Juyahudi ma yioyic migi mbe ke? Eyero nia ‘jubibayugi cen woko i mudho, man ywak ku kayu lak de bibedo nuti igi.’​—Matayo 8:11, 12.

Pieno, jubikwero Juyahudi m’atika ma gijolo ngo kaka m’ular umiere igi ma gibed ko i Ker pa Mungu ku Kristu. Yesu bijolo dhanu mi thek mange i dhu meza pare, niwacu “i Ker m’i polo.”