Qollun yatichasajja, Jesusajj Capernaúm markaruw saräna. Ukanwa judionakan jilïr irpirinakapat mä qhawqhanejj Jesusar jakʼachasipjjäna. Uka judionakarojj romanonakan ejercitopan mä oficialapaw khitanïna.

Uka oficialan mä munat esclavopaw wali usuntatäna, niya jiwirjamänwa. Uka oficialajj janis judiökchïnjja Jesusan yanaptʼapwa thaqäna. Judionakasti akham sasaw Jesusarojj yatiyapjjäna: “Wali usuntat[aw] tʼaqesiski, janiw sartirjamäkiti, utan jaqontatäskiwa” sasa (Mateo 8:6). Judionakan jilïr irpirinakapajja, Jesusar akham sapjjänwa: “Jupar yanaptʼañamajj wakisiwa, jupajj markasar munasiñampiw uñji, juparakiw sinagogsa nanakatakejj luri” sasa (Lucas 7:4, 5).

Jesusasti ukspachaw judionakan jilïr irpirinakapampejj oficialan utapar saräna. Utar niya jakʼachasipjjäna ukhajja, ejerciton oficialapajj amigonakaparuw khitäna, jupar akham sanipjjañapataki: “Tata, jan utajar jutjjamti, janiw utajar jutañamajj wakiskaspati, nayajj janiw kuna suma jaqëktsa. Ukatwa nayajj juman ukar jan jutkti” sasa (Lucas 7:6, 7). Ukham sasinjja, uka oficialajj wali humilde chuymanïtapwa uñachtʼayäna. Mayni romanonakat sipansa esclavonakapar sumwa uñjarakïna, ukaw qhan amuyasi (Mateo 8:9).

Judionakajj yaqha markankirinakampejj janiw chikachasipjjerïkänti, ukjja ejerciton oficialapajj yatïnwa (Hechos 10:28). Ukatwa uka oficialajj amigonakaparuk khitanpachäna, Jesusar akham sanipjjañapataki: “Jumatejj servirijan qollasiñapatak mä aruksa arsüta ukhajja, jupajj waliptjjaniwa” sasa (Lucas 7:7).

Uka arunak istʼasajj Jesusajj wal musparäna, akham sasaw sarakïna: “Nayajj sapjjsmawa, jupjam taqe chuym Diosar confiyir jaqejj janiw nayatak Israel markan utjkiti” sasa (Lucas 7:9). Oficialan amigonakapajj utar kuttʼjjapjjäna ukhajja, usutäkäna uka esclavorojj kʼumarak uñj-jjapjjäna.

Uka jaqer waliptayasajja, Jesusajj akham sänwa: “Waljaniw inti jalsu toqetsa inti jalant toqetsa jutapjjani; jupanakajj alajjpachankir Reinonwa Abrahanampi, Isaacampi, Jacobumpi mesan qontʼasipjjani” sasa. Ukham sasinjja, jan judiöpki uka jaqenakajj Diosarutï confiyapjjani ukhajja, bendicionanakwa katoqapjjani sañwa munaskäna. ¿Diosar jan confiyiri judionakat Jesusajj kamsarakïnsa? “[Jupanakajj] anqa chʼamakar jaqonukutaw uñjasipjjani; ukanwa jachapjjani, laka chʼakhanakapsa tʼurusipjjani” sasaw säna (Mateo 8:11, 12).

Diosan Reinopan Cristomp chika jan apnaqañ muniri judionakarojja, Diosajj apanukuniwa. Ukampis jan judiöpki uka jaqenakajja, ‘mesanwa qontʼasipjjani’ mä arunjja, “alajjpachankir Reinonwa” qontʼasipjjani.