PES 36
Ñane bisônda a ñunda hémle keñi
-
NGWÉLÉL ÑANE BISÔNDA A MBÔÔP
-
I BET BA GWÉ HÉMLE B’A BA NSAIBAK
I mbus Nkwel wé ngii hikôa, Yésu a nke tison Kapernaum. Nyoo, ngim mimañ i Lôk Yuda i nkôôge nye bebee. Ñane bisônda Lôk Rôma nu a yé libôga lipe nyen a ñom bo.
Ngwélél ñane bisônda a nkon ngandak, a yé ki bebee ni nyemb. To hala kiki ñane bisônda a ta bé man Lôk Yuda, a nyéñ le Yésu a hôla nye. Lôk Yuda i nkal Yésu le ngwélél ñane bisônda a “niñi i ndap, a nla bé telep, a nkon iloo héga.” (Matéô 8:6) Minhôôlak mi bôt mi Lôk Yuda mi nkal Yésu le ñane bisônda a kôli ni mahôla, ba ntoñol le: “A ngwés litén jés, nye ki nyen a bi ôñôl bés ndap bibégés.”—Lukas 7:4, 5.
I mbus, Yésu a nyodi ni bôt ba inyu ke mbai ñane bisônda. Kiki ba yé bebee, ñane bisônda a ñép mawanda mé i kal le: “A Isañ mbai, u tééñga bañ nyuu, inyule me kôli bé leege we i ndap yem. Jon me nhoñol bé le me kôli lo i weeni.” (Lukas 7:6, 7) Kinje bipôdôl bi suhulnyuu inyu mut a meya a nti bioda! Hala a ñunda ki lelaa mut nu a yé maselna ni Lôk Rôma i i bé bep sélés bagwélél bap.—Matéô 8:9.
Ibabé pééna ñane bisônda a nyi le Lôk Yuda i nkeñgle bakén. (Minson mi baôma 10:28) Bebek inyu hala nyen ñane bisônda a ñom mawanda mé i kal Yésu le: “We pot ndik buk, nkol wem w’a témbna mbôô wé.”—Lukas 7:7.
Yésu a yé nhelek ni jam a yé i nok, a nkal le: “Me nkal bé le, to i Israel, me ma tehe bé nya soso hémle ini.” (Lukas 7:9) Kiki ba yé témb i ndap ñane bisônda, mawanda ma ñada le i ngwélél a konok ngandak, a mbôôp.
Kiki Yésu a mélés mut nunu, a nke ni bisu i kal le yak bet ba ta bé Lôk Yuda, inyu hémle yap b’a kôhna bisai, a nkal le: “Ngandak y’a lôl i pes likôl ni i hiôñg inyu lo je i nlélém téblé ni Abraham ni Isak ni Yakôb i Ane i ngii.” Kii i ga pémél Lôk Yuda i i gwé bé hémle? Yésu a nkal le ‘b’a leñ bo ikété jiibe li mbégdé. Nyoo nyen b’a ee, ba jek masoñ.’—Matéô 8:11, 12.
Jon ba ga kat Lôk Yuda i i bi tjél nsébla u u bi bôk u léña bo inyu kôdôl Ane ni Kristô. Ndi bakén ba ga sébla i yén i téblé ni Yésu i “Ane ngii.”