Laho ma Jesus tu Kapernaum dung marjamita ibana di dolok. Disi, pajumpang ma Jesus dohot piga-piga halak Jahudi na sinuru ni perwira ni Rom.

Marsahit na posi do naposo ni perwira i, jala nunga naeng mate. Nang pe ndang halak Jahudi perwira i, alai dipangido ibana do asa diurupi Jesus ibana. Dipaboa halak Jahudi i ma tu Jesus naung peak naposo ni perwira i di jabu, ndang boi meret, jala mansai hansit do dihilala. (Mateus 8:6) Dielek-elek halak Jahudi i ma Jesus jala ninna ma, “Urupi ma ibana, ai holong do rohana tu bangsonta jala ibana do na pajongjongkon sinagoganami.”​—Lukas 7:4, 5. 

Alani i, pintor laho ma Jesus tu jabu ni perwira i. Alai tingki di dalan dope, pajumpang ma nasida dohot dongan ni perwira i. Dipaboa ma tu Jesus tona ni perwira i na mandok, “Tuan, unang pola loja ho, ai ndang tama ahu manjalo ho di jabungku.” (Lukas 7:6, 7) Hata on patuduhon, serep do roha ni perwira i! Jala ndang songon halak Rom na asing i ibana, na kejam tu hatobanna.​—Mateus 8:9.

Diboto perwira i do na so olo halak Jahudi mardongan dohot halak na sian bangso na asing. (Ulaon ni Apostel 10:28) Alani i do ra asa disuru perwira i angka donganna laho pasahathon tonana tu Jesus na mandok, “Holan dok pe hatam, malum do i naposongki.”​—Lukas 7:7.

Longang ma roha ni Jesus mambege i jala didok ma, “Situtu do na hudok on tu hamu, gari di Israel ndang jumpang ahu dope halak na songon on balga ni haporseaonna.” (Lukas 7:9) Dung mulak angka donganna i tu jabu ni perwira i, diida nasida ma nunga malum be naposona i.

Dung dipamalum Jesus na marsahit i, dipangke Jesus ma na masa i laho patuduhon na boi do halak sian bangso na asing mandapot pasu-pasu. Didok Jesus ma, “Torop do halak sian timur dohot sian barat na laho ro jala rap mangan dohot si Abraham, si Isak dohot si Jakkob di Harajaon banua ginjang i.” Alai aha do na masa tu halak Jahudi na so porsea? Jesus mandok, “Sampathonon do [nasida] tu luar, tu haholomon. Disi ma nasida mangangguhi jala muruk situtu.”​—Mateus 8:11, 12.

Tutu, tu halak Jahudi do parjolo dilehon Debata hasangapon laho mamarenta rap dohot Kristus di Harajaon i. Alai molo ndang diargai halak Jahudi i, ndang dijalo Debata nasida. Alani i, lehonon ni Debata ma hasangapon laho rap mamarenta dohot Kristus “di Harajaon banua ginjang” i tu bangso na asing.