Kɛ Zezi wieli Ɲanmiɛn ndɛ’n i kan’n, ɔ jasoli oka’n su lɛ ɔli Kapɛɛnaɔmun. Zuifu’m be kpɛnngbɛn’m be nun wie’m be toli i lɔ. Bian kun yɛ ɔ sunmannin be-ɔ. Bian sɔ’n ti Rɔmunfuɛ’m be sonja ya su kpɛn kun. Ɔ timan Zuifu.

Bian sɔ’n le i junman difuɛ kun m’ɔ klo i kpa-ɔ. Sanngɛ i junman difuɛ sɔ’n i wunnɛn’n wa yoli i ya kpa, ɔ maan ɔ o wie bɛ su. Kannzɛ sonja ya su kpɛn sɔ’n timan Zuifu’n, sanngɛ ɔ kunndɛ kpa kɛ Zezi yo i ye. Zuifu’m be seli Zezi kɛ bian’n i “junman difuɛ’n la awlo lɔ, w’a bubu, yɛ ɔ su wun i ɲrun kpa.” (Matie 8:6) Be srɛli Zezi kɛ ɔ yo bian’n i junman difuɛ’n i juejue. Be waan sɛ ɔ yo sɔ’n, ɔ ti kpa. Be seli Zezi kɛ: “Ɔ klo e nvle’n, kpɛkun i yɛ ɔ kplannin e Ɲanmiɛn sulɛ sua’n niɔn.”​​—Liki 7:4, 5.

Be ja nun lɛ’n, Zezi nin Zuifu’m be kpɛnngbɛn’m be toli be ti sonja ya su kpɛn’n i awlo lɔ. Kɛ ɔ ka kan bé wá jú lɔ’n, bian sɔ’n sunmɛnnin i janvuɛ mun naan be wa se Zezi kɛ: “Baba, nán kle ɔ wun yalɛ. Afin n timan sran mɔ a nin i awlo lɔ kɔlɛ fata-ɔ. I sɔ’n ti yɛ n buli i kɛ min nin ɔ wun lɔ kɔlɛ’n fataman’n niɔn.” (Liki 7:6, 7) I m’ɔ ti kpɛn’n, ɔ kɛnnin i wun ase dan. W’a yoman kɛ Rɔmunfuɛ onga’m be sa. Be liɛ’n, be buman be junman difuɛ’m be sran.​​—Matie 8:9.

Sonja ya su kpɛn’n seli Zezi ekun kɛ: “Ɔ li kan ndɛ kun, kpɛkun min junman difuɛ’n yó juejue.” (Liki 7:7) Sonja ya su kpɛn’n si kɛ Zuifu’m be nin be nga be timan Zuifu’n be sanman nun. Atrɛkpa’n, i sɔ’n ti yɛ ɔ sunmɛnnin i janvuɛ mun kɛ be ko kan ndɛ sɔ’n be kle Zezi’n niɔn.​​—Sa Nga Be Yoli’n 10:28.

Ɔ maan bian’n i ndɛ sɔ’n boli Zezi nuan. I sɔ’n ti’n, ɔ seli kɛ: “Ń kán klé amun kɛ Izraɛli nvle’n nun bɔbɔ’n, m’an wunman sran fi m’ɔ lafi Ɲanmiɛn su dan kɛ bian nga sa-ɔ.” (Liki 7:9) Kɛ sonja ya su kpɛn’n i janvuɛ’m be sali be sin i awlo lɔ’n, be wunnin kɛ i junman difuɛ’n w’a yo juejue.

Kɛ Zezi wieli abonuan sa sɔ’n i yo’n, ɔ seli kɛ be nga be timan Zuifu bɔbɔ’n, Ɲanmiɛn kwla yo be ye wie. I waan: “Sran sunman bé fín wia afiliɛ nin wia atɔliɛ lɔ bé bá. Kpɛkun be nin Abraamun, nin Izaaki, nin Zakɔbu bé wá trán tabli sin ɲanmiɛn su lɔ Famiɛn diwlɛ’n nun.” ?Yɛ Zuifu nga be lafiman Ɲanmiɛn su’n, be liɛ’n yó sɛ? Zezi waan “bé tó be yí gua su lɔ aosin’n nun. Lɔ yɛ bé sún, bé dí be je-ɔ.”​​—Matie 8:11, 12.

I sɔ’n kle kɛ Zuifu mɔ be yɛ ɔ fata kɛ be nin Klisi be yo Ɲanmiɛn i Famiɛn diwlɛ’n i nunfuɛ’n mɔ b’a sɔmɛn i sɔ’n nun’n, be su tranman Famiɛn diwlɛ’n nun wie. Sanngɛ be nga be timan Zuifu’n, Klisi wá sɔ́ be nun i tabli’n sin “ɲanmiɛn su lɔ Famiɛn diwlɛ’n nun.”