Kenca dung ipeseh Jesus Kotbahna i Deleng, lawes ia ku Kapernaum. Piga-piga peminpin agama Jahudi ndahi ia ku je. Kalak e isuruh sekalak perwira Roma.

Budak si ikelengi perwira e sangana sakit janah nandangi mate. Aminna pe perwira e labo kalak Jahudi, tapi idaramina penampat Jesus. Ikataken kalak Jahudi e man Jesus maka budak perwira e “paksana ampar i rumah erkiteken lumpuh, mekelek kel iakapna.” (Matius 8:6) Ikataken kalak e ka maka perwira e cocok kel isampati Jesus, ning kalak e, “Keleng atena bangsata janah ibangunna ingan pulung kalak Jahudi man kami.”​—Lukas 7:​4, 5.

Minter lawes Jesus ras kalak e ku rumah perwira ndai. Sanga kalak e nggo ndeher, isuruh perwira e teman-temanna ngataken, “O Pak, la padah latih iakapndu, sebap la aku metunggung ngalo-ngalo kam i rumahku. Eme sebapna la kuakap metunggung bangku ndahi kam.” (Lukas 7:​6, 7) Aminna pe lit jabatenna, meteruk ukur kel ia! Si e mbuktiken maka la seri perwira e ras kalak Roma si deban si kejam man budak-budakna.​—Matius 8:9.

Iteh perwira e maka kalak Jahudi la nggit erteman ras kalak si labo Jahudi. (Perbahanen Rasul-Rasul 10:28) Banci saja perban si e me maka isuruh perwira e temanna ngerana man Jesus, nina, “Sitik saja gia kam ngerana pasti malem nge budakku e.”​—Lukas 7:7.

Luar biasa akap Jesus megi si e, emaka nina, “Lenga pernah aku jumpa bas Israel kalak si bage kel belinna kinitekenna.” (Lukas 7:9) Sanga mulih teman-teman perwira e, idah kalak e budak si sakit ndai nggo malem.

Kenca ipepalemna budak e, igunakenna kesempaten e ngataken maka kalak si labo Jahudi pe ipasu-pasu adi erkiniteken. Nina, “Nterem pagi reh arah timur ras barat nari janah kundul ras Abraham, Isak, bage pe Jakup i bas Kerajan surga.” Uga kerna kalak Jahudi si la erkiniteken? Nina Jesus, “Iambekken ku darat ku ingan si seh kel gelapna. I je me ia tangis janah erderep ipenna ban suina.”​—Matius 8:​11, 12.

Emaka itulak me kalak Jahudi si la ngaloken kesempaten guna merentah radu ras Kristus bas Kerajan Dibata. Tapi kalak si labo Jahudi ialo-alo pagi kundul ras ia “i bas Kerajan surga.”