KABETÔLÔ 36
Évete bezimbi ja liti ngule mbunan
-
MBO ÉSAÉ ÉVETE MONE BEZIMBI A NTO MVO’É
-
E BA BE BILI MBUNAN BA YE BI BIBOTAN
Éyoñ a maneya bo Ékate mame ya Nkôle yôp, Yésus a ke tisone ya Capernaoum. Valé, betebe ôsu ya Bejuif ba subu nye bebé. Môte ya ayoñ afe nnye a nga lôme be: évete mone bezimbi ya Rome.
Mbo ésaé évete bezimbi ja dañe nye’e a kon abui a, a nto bebé ya wu. Akusa bo évete bezimbi é ne mone Gentil, ja sili Yésus mvolan. Bejuif ba kate Yésus na, mbo ésaé môt ate “a bôô si e nda, nyôle ñyemelan (a kon abui)”, a a ju’uya fe a mintaé. (Matthieu 8:6, Mfefé Nkôñelan) Betebe ôsu ya Bejuif ba jô Yésus na, da yiane na a volô évete bezimbi éte, be kate’e nye na: “A nye’e ayoñe dangan, e nye fe a nga lôñe aba Zambe dangan.”—Luc 7:4, 5, Mfefé Nkôñelan.
Été été, Yésus ba betebe ôsu ya Bejuif ba téé, a ke nda évete bezimbi. Éyoñe ba kui bebé nda, évete bezimbi ja lôme bemvôé bé be zu jô nye na: “A Nti, te wo nyoñ abime nju’u te, amu me nji bo e nyô a yiane na ô nyiin andile dame si. Amu ajô te fe me nga bo teke buni na me ne nyô a yiane zu be wo.” (Luc 7:6, 7, Mfefé Nkôñelan) Za aka’a éjote nyule môt a maneya yembane na a ve mebendé a liti bôte bevo’o di! Jam ete da tu’a liti nsela’ane a ne zañe môt ate a Beromain ba tibili bebo bisaé bap.—Matthieu 8:9.
Évete bezimbi ja yeme na Bejuif be ne teke yeñ a bôte ya meyoñe mefe. (Mam Minlôman 10:28) Éko éziñ amu nalé, évete bezimbi ja lôme bemvôé bé be jô Yésus na: “Jô’ôk ajô, a mbo ésaé wom a ye bo mvo’é.”—Luc 7:7, Mfefé Nkôñelan.
Yésus a kam éyoñ a wô’ô jam ete, éyoñ éte a jô na: “Ma jô mia de na: To’o Israël été, me nji koon avale ngule mbunan di.” (Luc 7:9, Mfefé Nkôñelan) Éyoñ a kôlôya nda be évete bezimbi, bemvôé bé ba koone na mbo ésaé a mbe a konô’ô abui a nto nya mvo’é.
Éyoñe Yésus a nga saé môt ate, a nga bi fane ya liti na, bôte ya meyoñe mefe be bili mbunan, ba ye bi bibotan a jô’ô na: ‘Abui bôt da ye so jôbe da tôô a jôbe da dim, a nyoñe bito abô’ô bidi ba be Abraham, Isaac a Jacob éjôé ya yôp.’ Mfa’a Bejuif ki be nji buni? Yésus a jô na: “Ba ye wuaban e dibi e n’atan: e wôé nye a ye bo miñyôn a nlatane mesôñ.”—Matthieu 8:11, 12, Mfefé Nkôñelan.
Ajô te, Bejuif be ne bemie jale be nji kañese fan é nga taté vebane be be na be bo benyoñe ngape ya Éjôé ba be Krist, ba ye wuabane nseñ. Ve Begentil ba ye nyoñeban a tabe tebele wé, “Éjôé ya yôp.”