Imwin ana Kabwarabwara i aon te Maunga Iesu, ao e a nako n te kaawa ae Kaberenaum. A kawaria ikai tabeman aia unimwaane I-Iutaia ake a kanakoaki iroun teuae kaokoro arona ma ngaiia ae mataniwia tau­tian Rom.

E kakaiaki aorakin ana toro te mataniwi aei ae tangiraki irouna ao e a kaani mate. E ngae ngke te tautia teuaei ae te Tientaire, ma e ukoukora buokana mairoun Iesu. E tuangaki Iesu irouia I-Iutaia taekan ae, “e wene n aoraki n te auti [ana] toro bwa e mate rabwatana, ao e rangi n rawawata iai.” E bae ni korakora marakina. (Mataio 8:6) A kaungaa Iesu aia unimwaane I-Iutaia bwa e tau ni buokaki te mataniwi aei ao a kangai: “E tangiriia ara botannaomata ao e katea ara tinakoka ikai.”​—Ruka 7:4, 5.

E nako naba ngkekei Iesu ma unimwaane ni kawara ana auti te mataniwi aei. Ngke a a uakaan ma ana auti ao e a kanakoia raoraona te mataniwi arei bwa e na kangai nakoina: “Te toka, tai katabeko, bwa I aki tau bwa ko na rin i aani batau. Anne bukina ae I aki tau iai bwa N na kawariko.” (Ruka 7:6, 7) Ai nanorinanora te mwaane aei ae taneiai n tuangia aomata te bwai ae a na karaoia! Ao e oti naba aroni kao­ko­ron teuaei ma kaain Rom ake a kakarawawataia tooro.​—Mataio 8:9.

Akea te nanououa bwa te mataniwi aei e ataa ae a aki iraorao I-Iutaia ma aika tiaki I-Iutaia. (Mwakuri 10:28) Tao n iangoan aei irouna, e a tuangia raoraona bwa a na kaumaka Iesu ni kangai: “Ko na tii taetae, ao e a marurung naba au toro.”​—Ruka 7:7.

E mimi Iesu ngke e ongo aei ao e taku: “I tuangingkami bwa I tuai ni kunea i Iteraera te aomata ae korakora ana onimaki n aron teuaei.” (Ruka 7:9) Ngke a a oki rikaaki raoraon teuaei nakon ana auti, ao a noria bwa e a marurung ngkai te toro are rangi n aoraki.

Ngke e a tia Iesu ni karaoa te mwakuri ni kamarurung anne, e a kamanena te tai aei ni kamatoaa bwa a kona ni kakabwaiaaki naake tiaki I-Iutaia man aia onimaki ni kangai: “A na mwaiti aomata mai mainiku ao maeao, ake a na roko n tekateka n rarikiriki n te taibora ma Aberaam, ao Itaaka, ao Iakoba, n te Tautaeka n Uea ae bwaini karawa.” Ma tera aroia I-Iutaia ake a aki onimaki? E taekinna Iesu bwa “a na tewenakoaki n te roo are i tinaniku natin te Tautaeka n Uea, ike a na tang ma n tenai bukini mwangaia ibukini bwaran nanoia.”​—Mataio 8:11, 12.

Ngaia are a na boni katinanikuaki I-Iutaia ake a aki butimwaea tibwangaia are a anganaki moa ae kaainakin te Tautaeka n Uea ma Kristo. Ma a na butimwaeaki Tientaire bwa a na tekateka n rarikiriki n ana taibora “n te Tautaeka n Uea ae bwaini karawa.”