Iesu be ena Ororo Harorona ia haorea murinai, Kaperanauma dekenai ia lao. Unuseniai Iuda tau badadia haida be ia dekenai idia lao. Idau bese tauna ese idia ia siaia—ia be Roma ami ofesa ta.

Ami ofesa ese ia lalokau henia hesiai tauna be ia gorere bada bona kahirakahira do ia mase. Ena be unai ami ofesa be Idau Bese tauna, to Iesu ena heduru totona ia noinoi. Iuda taudia ese Iesu idia hamaoroa, unai tauna ena  “hesiai tauna be ia paralais dainai ruma dekenai ia hekure noho, bona hisihisi bada ia mamia.” (Mataio 8:6) Iuda tau badadia ese Iesu idia hamaoroa, unai ami ofesa be heduru ia abia be namo, badina: “Iseda bese ia ura henia bona ia ese iniseniai sinagoga ia haginia.”​—Luka 7:4, 5.

Daudau lasi murinai, Iesu be idia ida unai ami ofesa ena ruma dekenai ia lao. Ruma kahirakahira idia lao noho neganai, ami ofesa ese ena turadia haida ia siaia bona Iesu dekenai idia gwau: “Tau badana e, oi hekwarahi lasi, badina lau hegeregere lasi oi be egu ruma lalonai oi vareai totona. Unai dainai lau laloa lau hegeregere lasi oi dekenai lau mai totona.” (Luka 7:6, 7) Ena be unai ami ofesa be vaia tuari taudia dekenai oda ia henia, to mai manau ida ia hereva! Unai ese ia hahedinaraia ia be Roma taudia amo ia idau, idia be edia hesiai taudia idia kara auka henia.​—Mataio 8:9.

Ami ofesa ia diba Iuda taudia be Idau Bese taudia idia bamoa lasi. (Kara 10:28) Reana unai dainai, iena turadia ia hamaoroa Iesu dekenai do idia gwau: “Oi hereva sibona, bona egu hesiai tauna do ia namo.”​—Luka 7:7.

Iesu be unai hereva dekenai ia hoa bona ia gwau: “Umui lau hamaoroa, Israela dekenai inai bamona abidadama badana lau itaia lasi.” (Luka 7:9) Iena turadia be ami ofesa ena ruma dekenai idia giroa neganai, idia itaia ia gorere bada hesiai tauna be ia namo vadaeni.

Iesu be unai hoa karana ia karaia murinai, ia hahedinaraia, abidadama Idau Bese taudia be hahenamo do idia abia, ia gwau: “Momo be ist bona west kahana amo do idia mai, bona guba Basileia lalonai Aberahamo, Isako, bona Iakobo ida teibolo dekenai do idia helai.” To abidadama lasi Iuda taudia be edena bamona? Iesu ia gwau idia be “murimuri ena dibura dekenai do idia negea. Unuseniai do idia taitai bona edia isena do idia koria.”​—Mataio 8:11, 12.

Iuda bese be Keriso ida Basileia lalonai do idia lohia karana idia abia dae lasi dainai, Dirava ese ia dadaraidia. To Idau Bese taudia do ia abia dae iena pata ai idia helai totona, unai be “guba Basileia lalonai.”