Yezu me manisa kusala Disolo na Zulu ya Ngumba mpi me kwenda na mbanza Kapernaumi. Kuna bankuluntu ya nkaka ya Bayuda me kwisa na yandi. Mfumu mosi ya basoda ya Roma muntu me tinda bo; yandi kele muntu mosi ya nene.

Nsadi yina mfumu yai ya basoda ke zolaka mingi ke bela ngolo mpi ke zola kufwa. Ata mfumu yai kele Muntu ya Makanda, yandi me sosa lusadisu na Yezu. Bayuda yina yandi tindaka me zabisa Yezu nde nsadi ya mfumu yina “me lala na nzo sambu yandi lenda nikana ve, mpi yandi ke mona mpasi mingi kibeni,” ziku yandi ke niokwama ngolo. (Matayo 8:6) Bankuluntu ya Bayuda me songa Yezu nde yo me fwana nde yandi sadisa mfumu yai, bo me tuba nde: “Yandi ke zolaka dikanda na beto mpi yandi muntu tungaka sinagoga na beto.”—Luka 7:4, 5.

Na mbala mosi, Yezu me kwenda ti bankuluntu yina na nzo ya mfumu yina ya basoda. Ntangu bo ke zola kukuma pene-pene ya nzo, mfumu yango me tinda banduku na yandi na kusonga Yezu nde: “Mfumu, kudiyangisa ve, sambu mono me fwana ve na kukotisa nge na nzo na mono. Yo yina mono monaka nde mono me fwana ve na kukwisa na nge.” (Luka 7:6, 7) Ata mfumu yai me yikanaka kupesa bantu ya nkaka bansiku, yandi me monisa kibeni kudikulumusa na ntwala ya Yezu. Diaka, mambu yina yandi me tuba ke monisa nde yandi me swaswana kibeni ti bantu ya Roma yina ke sadilaka bansadi na bo mambu na nku yonso.—Matayo 8:9.

Ya kieleka, mfumu yai ya basoda me zaba nde Bayuda ke salaka ve kinduku ti bantu yina kele ve Bayuda. (Bisalu 10:28) Ziku ti mambu yai na mabanza, mfumu ya basoda me zabisa banduku na yandi na kulomba Yezu nde: “Tuba ngogo mosi sambu nsadi na mono kubeluka.”—Luka 7:7.

Yezu me yituka na kuwa mambu yai mpi yandi me tuba nde: “Mono ke tubila beno nde, mono me mona ve lukwikilu ya nene ya mutindu yai ata na Izraele.” (Luka 7:9) Ntangu banduku ya mfumu ya basoda me vutuka na nzo, bo me mona nde nsadi yina vandaka kubela ngolo me beluka.

Ntangu Yezu me belula nsadi yina, yandi me sadila dibaku yina sambu na kumonisa pwelele nde bantu yina kele ve Bayuda kansi ya kele ti lukwikilu, ta baka balusakumunu. Yandi me tuba nde: “Bantu mingi ya esti ti ya westi ta kwisa mpi ta vanda na mesa ti Abrahami, Izaki, mpi Yakobi na Kimfumu ya zulu.” Inki ta kumina Bayuda yina me konda lukwikilu? Yezu me tuba nde bo “ta losa [bo] na mpimpa na nganda. Kuna bo ta dilaka mpi ta kwetisaka meno.”—Matayo 8:11, 12.

Nzambi ta ndima ve bantu yina butukaka na dikanda ya Bayuda kansi buyaka dibaku ya kuyala ti Kristu na Kimfumu na yandi. Kansi, yandi ta pesa Bantu ya Makanda nzila ya kudia na mesa na yandi, disongidila “na Kimfumu ya zulu.”