ជំពូកទី៣៦
មេទាហានដែលមានជំនឿយ៉ាងខ្លាំង
-
ខ្ញុំបម្រើរបស់មេទាហានម្នាក់បានត្រូវធ្វើឲ្យជាសះស្បើយ
-
អស់អ្នកដែលមានជំនឿនឹងទទួលពរ
ក្រោយពីថ្លែងសុន្ទរកថានៅលើភ្នំ លោកយេស៊ូធ្វើដំណើរទៅក្រុងកាពើណិម។ នៅទីនោះ ពួកបុរសចាស់ទុំខ្លះនៃជនជាតិយូដាបានមកជួបលោក។ ពួកគាត់បានត្រូវចាត់មកដោយបុរសម្នាក់ដែលមានមជ្ឈដ្ឋានខុសពីពួកគាត់។ បុរសនោះគឺជាមេទាហានជនជាតិរ៉ូម។
ខ្ញុំបម្រើសំណព្វចិត្តម្នាក់របស់មេទាហាននោះកំពុងឈឺធ្ងន់ជិតស្លាប់។ ទោះបីជាមេទាហាននោះជាជនជាតិដទៃក៏ដោយ គាត់ស្វែងរកជំនួយពីលោកយេស៊ូ។ ពួកបុរសចាស់ទុំជនជាតិយូដាប្រាប់លោកយេស៊ូថា ខ្ញុំបម្រើរបស់មេទាហាននោះ«កំពុងដេកនៅផ្ទះដោយសារកម្រើកមិនបាន ហើយក៏ឈឺចាប់យ៉ាងខ្លាំងផង»។ (ម៉ាថាយ ៨:៦) ពួកបុរសចាស់ទុំជនជាតិយូដាទាំងនោះពន្យល់លោកយេស៊ូថា មេទាហាននេះសមនឹងទទួលជំនួយពីលោក ដោយនិយាយថា៖ «គាត់ស្រឡាញ់ជនជាតិយើង ក៏បានសាងសាលាប្រជុំឲ្យយើងទៀតផង»។—លូកា ៧:៤, ៥
មិនយូរប៉ុន្មានក្រោយមក លោកយេស៊ូបានចេញទៅជាមួយនឹងពួកបុរសចាស់ទុំទាំងនោះ ហើយធ្វើដំណើរឆ្ពោះទៅផ្ទះរបស់មេទាហាន។ កាលដែលពួកគាត់ទៅជិតដល់ផ្ទះនោះហើយ មេទាហានបានចាត់មិត្តភក្ដិឲ្យទៅជម្រាបលោកថា៖ «មិនចាំបាច់[មក]ទេលោក ព្រោះខ្ញុំមិនសមនឹងទទួលលោកចូលមកក្នុងផ្ទះខ្ញុំឡើយ។ ហេតុនោះហើយបានជាខ្ញុំក៏មិនចាត់ទុកថា ខ្ញុំសមនឹងទៅជួបលោកដោយផ្ទាល់ដែរ»។ (លូកា ៧:៦, ៧) មេទាហាននេះដែលធ្លាប់តែបញ្ជាគេ ពិតជាមានចិត្តរាបទាបមែន! នេះបង្ហាញថាគាត់គឺខុសគ្នាពីជនជាតិរ៉ូមឯទៀតដែលប្រព្រឹត្តដោយគ្មានមេត្ដាទៅលើខ្ញុំបម្រើ។—ម៉ាថាយ ៨:៩
មេទាហាននោះច្បាស់ជាដឹងថា ជនជាតិយូដាមិនរាប់អានជនជាតិដទៃឡើយ។ (សកម្មភាព ១០:២៨) ប្រហែលជាមូលហេតុនោះហើយបានជាគាត់ចាត់មិត្តភក្ដិឲ្យទៅជម្រាបលោកយេស៊ូថា៖ «សូមលោកគ្រាន់តែមានប្រសាសន៍ប៉ុណ្ណោះ ដើម្បីឲ្យខ្ញុំបម្រើរបស់ខ្ញុំបានជាឡើងវិញ»។—លូកា ៧:៧
ពេលលោកយេស៊ូបានឮដូច្នេះ លោកកោតស្ងើចយ៉ាងខ្លាំង ហើយមានប្រសាសន៍ថា៖ «ខ្ញុំប្រាប់អ្នករាល់គ្នាថា ខ្ញុំមិនឃើញអ្នកណាមានជំនឿខ្លាំងយ៉ាងនេះទេ សូម្បីតែនៅស្រុកអ៊ីស្រាអែលក្ដី»។ (លូកា ៧:៩) កាលដែលមិត្តភក្ដិនោះត្រឡប់ទៅផ្ទះរបស់មេទាហានវិញ ពួកគាត់បានឃើញខ្ញុំបម្រើដែលឈឺធ្ងន់នោះបានជាសះស្បើយឡើងវិញហើយ!
ក្រោយពីលោកយេស៊ូបានធ្វើឲ្យខ្ញុំបម្រើនោះជាសះស្បើយ លោកប្រើឱកាសនោះដើម្បីបញ្ជាក់ថា ព្រះពេញចិត្តនឹងសាសន៍ដទៃដែលមានជំនឿ ហើយលោកឲ្យពរពួកគេ។ ម្ល៉ោះហើយ លោកយេស៊ូមានប្រសាសន៍ថា៖ «មនុស្សជាច្រើនពីតំបន់ខាងកើតនិងខាងលិច នឹងមកអង្គុយនៅតុជាមួយនឹងអាប្រាហាំ អ៊ីសាក និងយ៉ាកុបក្នុងរាជាណាចក្រស្ថានសួគ៌»។ ចុះយ៉ាងណាវិញចំពោះជនជាតិយូដាដែលគ្មានជំនឿ? លោកយេស៊ូបានប្រាប់ថា៖ «ពួកគេនឹងត្រូវបោះទៅខាងក្រៅ ដែលងងឹត។ ទីនោះពួកគេនឹងយំហើយសង្កៀតធ្មេញ»។—ម៉ាថាយ ៨:១១, ១២
ដូច្នេះ ជនជាតិយូដាដែលមិនទទួលយកឱកាសដែលព្រះបានផ្ដល់ឲ្យពួកគេមុន ក្នុងការគ្រប់គ្រងជាមួយនឹងគ្រិស្តក្នុងរាជាណាចក្រព្រះ នឹងបាត់បង់ឯកសិទ្ធិនោះ។ ប៉ុន្តែ សាសន៍ដទៃនឹងត្រូវអញ្ជើញឲ្យមកអង្គុយនៅតុជាមួយនឹងលោកយេស៊ូ«ក្នុងរាជាណាចក្រស្ថានសួគ៌»។