Yesu byo apwishishe kwamba Jashi ja pa Mutumba, watwelele mu muzhi wa Kapenama. Mu uno muzhi bakulumpe ba Bayudea baishile kwi aye. Bebatumine ku muntu wabujile wa mu kisaka kya Bayudea, wajinga mukulumpe wa bashilikale bena Loma.

Kalume wa mukulumpe wa bashilikale ye atemenwe wajinga pepi kufwa mambo wakolelwe bingi. Nangwa kya kuba uno mukulumpe wa bashilikale wajinga wa mu kisaka kikwabo, wakebelenga bukwasho kwi Yesu. Bayudea babuujile Yesu amba kalume wa mukulumpe wa bashilikale “walaalatu mu nzubo, wakolwa kikola kya kalepu, kabiji wamanama bingi,” kumwesha’mba wajinga mu misongo ikatampe. (Mateo 8:6) Bakulumpe ba Bayudea bamubuujile Yesu amba uno mukulumpe wa bashilikale wafwainwe kumukwasha. Balumbulwile’mba: “Watemwa bingi kisaka kyetu kabiji aye mwine ye witushimikijile nshinagoga.”—Luka 7:4, 5.

Ponkapotu Yesu wayile na bano bakulumpe ku nzubo ya mukulumpe wa bashilikale. Byo banangijilenga kwipi, mukulumpe wa bashilikale watumineko balunda nanji na kumwambila’mba: “Mwane amiwa kechi nafwainwa kya kuba’mba anweba mutwele mu nzubo yami ne. O ene mambo o naji kubujila kwiya ko muji.” (Luka 7:6, 7) Nangwa kya kuba uno mwanamulume wajinga na luusa lukatampe, bino byambo byanji byamwesheshe’mba wipelwile bingi. Kabiji bimwesha’mba uno muntu wapusene bingi na bena Loma bamanyikanga bazha.—Mateo 8:9.

Uno mukulumpe wa bashilikale wayukile’mba Bayudea kechi bapwanañananga na bantu babula Bayudea ne. (Byubilo 10:28) Kampe na mambo a kuyuka kino, mukulumpe wa bashilikale waambijile balunda nanji kuya na kubuula Yesu amba: “Ambaitu byambo ne kalume wami usakubukwa.”—Luka 7:7.

Yesu byo aumvwine kino, wakuminye bingi ne kwamba’mba: “Nemwambila namba: Kafwako nangwa umo mu Isalela ye nataanamo uji na lwitabilo lukatampe nobe luno ne.” (Luka 7:9) Balunda ba uno mukulumpe wa bashilikale byo babwelele ku nzubo yanji bataaine kalume wanji wakolelwe wabukwa.

Pa kupwisha kuba kino kya kukumya, Yesu walumbulwile kuba’mba bantu babula Bayudea baji na lwitabilo bakobilwa bibusa. Waambile’mba: “Bavula bakeya kufuma ku musela ne ku muzhika ne kwikala ku tebulu ne Abalahama, Izaka ne Yakoba mu Bufumu bwa mwiulu.” Nga Bayudea babujile lwitabilo? Yesu waambile’mba “Lesa ukebataya pangye mu mfishi. Mo mo bakajijilanga ne kushenka ku meno.”—Mateo 8:11, 12.

Onkao mambo, Bayudea babujile kunemeka bupe bo bebapeele bwa kwikala ne Kilishitu mu Bufumu bakebakana. Bino bantu ba mu bisaka bikwabo bakebatambwila kabiji bakekala ku tebulu wanji, ko kuba’mba “mu Bufumu bwa mwiulu.”