Pavua Yezu mujikije Muyuki wende wa pa Mukuna, wakaya mu tshimenga tshia Kapênuma. Muomu amu, bamue bakulu ba bena Yuda bavua balua kudiye. Bavua babatume kudi muntu uvua kayi muena Yuda, mmumue ne: mfumu wa basalayi wa mu tshiluilu tshia bena Lomo, kamanda ka basalayi lukama.

Mfumu wa basalayi au uvua ne muena mudimu uvuaye munange bikole uvua usama wamba kufua. Nansha muvua mfumu wa basalayi eu muikale muntu wa bisamba bia bende, uvua ukeba bua Yezu amuambuluishe. Bena Yuda bakambila Yezu ne: muena mudimu wa muntu eu “mmulale mu nzubu bua disama dia mubidi mutekete, udi ukenga bikole bitambe.” (Matayi 8:6) Bakulu bena Yuda aba bavua bajadikila Yezu ne: kamanda ka basalayi aka nkakumbane bua kukambuluisha, bamba ne: “Mmunange tshisamba tshietu ne yeye muine uvua mutuibakile nsunagoga wetu.”​—Luka 7:4, 5.

Katupa kakese pashishe, Yezu kuya ne bakulu abu kua mfumu wa basalayi au. Pakafikaye pabuipi ne nzubu, mfumu au wakatuma balunda bende bua bamuambile ne: “Mukalenge, kuditatshishi to, bualu tshiena mukumbane bua kukubueja mu nzubu muanyi to. Ke bualu kayi tshivua mudimone mukumbane bua kulua kuudi.” (Luka 7:6, 7) Aa mmêyi a budipuekeshi avua muntu eu utu utumina bantu dîyi wamba! Adi aleja muvuaye mushilangane bikole ne bena Lomo badi benzela bapika malu ne tshikisu.​—Matayi 8:9.

Kakuyi mpata kamanda ka basalayi aka nkamanye ne: bena Yuda batu babenga kusomba ne bantu badi kabayi bena Yuda. (Bienzedi 10:28) Pamuapa bualu ebu ke buvua busake mfumu eu bua kutuma balunda bende bua bambile Yezu ne: “Amba dîyi, muena mudimu wanyi ondopibue.”​—Luka 7:7.

Yezu kukema pakumvuaye mêyi au, wamba ne: “Ndi nnuambila ne: nansha mu Isalele, tshiena muanji kusangana ditabuja dinene nunku to.” (Luka 7:9) Padi balunda ba mfumu wa basalayi bapingana, badi bapeta muena mudimu uvua usama bikole au ukadi mumvue bimpe.

Yezu ukavua muondopangane kabidi mu tshishima nunku, wakenza nunku musangu eu bua kujadikila bantu ne: bantu badi kabayi bena Yuda badi ne ditabuja nebapete mabenesha padiye wamba ne: “Bantu ba bungi nebafume ku est ne ku ouest, nebalue ne nebadiadije ku mêsa ne Abalahama, ne Izaka ne Yakoba mu Bukalenge bua mu diulu.” Netuambe tshinyi bua bena Yuda bavua kabayi ne ditabuja? Yezu wakamba ne: ‘Nebabimanshe pambelu mu mîdima. Muomu amu ke muikala miadi yabu ne disumakaja diabu dia mênu.’​—Matayi 8:11, 12.

Nunku, bavua ne bua kubenga bena Yuda ba ku mubidi bavua kabayi bitaba mpunga uvuabu babapeshe bobu kumpala bua kukokesha ne Kristo mu Bukalenge. Kadi nebitabe bua bantu ba bisamba bia bende badiadije ku mêsa mu ngumvuilu kampanda, “mu Bukalenge bua mu diulu.”