Omu Yesu akumishile kuhanjika Chihande chenyi ChahaPili, ayile kunganda yaKapelenau. Kuli ikiye kwejile vakulwane vamwe vavaYuleya. Vavatumine kuli kapitau kamaswalale kavaLoma wakumuyachi weka uze kapwile kaYuleyako.

Ngamba yayou kapitau, uze azangilenga chikuma, apwile nakuviza chikuma nakusaka kufwa. Numba tuhu ou kapitau apwile muka-lifuchi lyeka, oloze alembelele Yesu amukafwe. Vakulwane javaYuleya valwezele Yesu ngwavo ngamba yayou kapitau “nasavala muzuvo. Aviza musongo wakalepa, kaha ali nakuyanda chikuma,” pamo mwomwo yakukola chikuma. (Mateu 8:6) Ava vakulwane valwezele Yesu ngwavo, atelele kukafwa kapitau kamaswalale, mwomwo vambile ngwavo: “Azanga muyachi wetu, kaha ikiye nawa atungile sunangonga yetu.”—Luka 7:4, 5.

Nakulangisa chiku, Yesu ayile navo kuzuvo yauze kapitau. Omu vahetele kwakamwihi nazuvo, ou kapitau atumine masepa jenyi, nakwamba ngwenyi: “Ove Mwata, kanda uliyanjisako, mwomwo ami kangwatelamoko, kaweshi kuhasa kwingila muzuvo yamiko. Shikaho ngwamonanga ngwami kangwatelamoko kwiza kuli ove.” (Luka 7:6, 7) Ou kapitau wakuhana vakwavo jishimbi asolwele muchima wakulinyisa. Asolwele nawa nge alihandunwine navaLoma vaze vapwile namuchima wakuyanjisanga vandungo javo.—Mateu 8:9.

Kapitau kana atachikijile ngwenyi vaYuleya kavalivwasana navatu vakumafuchi ekako. (Vilinga 10:28) Echi pamo chikiko chamulingishile alweze masepa jenyi valweze Yesu ngwavo: “Ijiva kuhanjika kaha lizu, kaha ngamba yami mwahinduka.”—Luka 7:7.

Yesu alikomokelele hakwivwa mazu kana, kaha ambile ngwenyi: “Nangumilweza ngwami, chipwe vene muIsalele kangwawanyinemo mutu numba umwe ali nalufwelelo lwalunene nge eluko.” (Luka 7:9) Omu masepa jauze kapitau vakindulukile kuzuvo yenyi vawanyine uze ngamba nayoyo lyehi.

Omu Yesu okile uze ngamba yakapitau, asolwele nge vaka-mafuchi eka vaze vapwile nalufwelelo navakavakisula, kaha ambile ngwenyi: “Vatu vavavulu vakufuma kumututuko nakumulauko navakeza nakusendavala kumesa naApalahama naIsaka naYakova muWangana wamelu.” Nyi ngachilihi vaYuleya vaze kavapwile nalufweleloko? Yesu ambile ngwenyi, “navakavambila mumilima kuweluka. Mwamuze vene munavakapwanga nakulila nakulingenjunga kumazo.”—Mateu 8:11, 12.

Ngocho vaYuleya vaze vakanyine kutokwa chakukayula hamwe naKulishitu muWangana, navakavakana. Oloze vaka-mafuchi eka navakavetavila nakusendavala kumesa “muWangana wamelu.”