Bang’ golo twak e Got, Yesu wuok kae to odhi e taon mar Kapernaum. Ka en kanyo, moko kuom jodongo mag Jo-Yahudi biro ire. Ja-Rumi moro ma en jatend-askeche e ma oorogi.

Jatend-askecheno nigi jatich moro mohero. Kata kamano, jatijeno tuo ahinya kendo ochiegni tho. Kata obedo ni jatend-askecheno ok en Ja-Yahudi, odwaro ni mondo Yesu okonye. Jo-Yahudigo nyiso Yesu ni jatij ng’atno nindo “e ot nikech tuo mar abach kendo ochandore malit” ahinya. (Mathayo 8:6) Jodongo mag Jo-Yahudigo nyiso Yesu wach jatend-askecheno. Giwachone niya: “Jalo en ng’at mowinjore mondo itimne kamano nikech ohero ogandawa kendo en owuon nogeronwa sunagogi.”​—Luka 7:4, 5.

Yesu wuok mapiyo kanyachiel gi jodongogo ka gichomo od jatend-askecheno. Ka gichiegni chopo, jatend-askecheno oro osiepene mondo odhi owach ne Yesu kama: “Ruoth, kik ichandri nimar ok an ng’at mowinjore ma inyalo donjo e bwo tat oda. Nikech mano, ne aneno ni ok awinjora biro iri.” (Luka 7:6, 7) Mano kaka jal mong’iyo gi chiko ji wacho weche ma nyiso bolruok! Kendo wechego nyiso kaka jalo opogore ahinya gi Jo-Rumi mohero sando joma tiyonegi.​—Mathayo 8:9.

Onge kiawa ni jatend-askecheno ong’eyo ni Jo-Yahudi temoga ahinya mondo kik giriwre gi joma ok gin Jo-Yahudi. (Tich Joote 10:28) Nyalo bedo ni mano e momiyo jatend-askecheno oro osiepene ir Yesu mondo gisaye kama: “Wach awacha gimoro mondo imi jatijano ochang.”​—Luka 7:7.

Yesu wuoro wechego, omiyo owacho kama: “Awachonu ni, kata mana e Israel pok ayudoe yie maduong’ ma chal kama.” (Luka 7:9) Osiepe jatend-askecheno dok e ode, kae to giyudo ni jatich ma ne tuo ahinyano koro osechango.

Ka Yesu osetimo hono mar chango jatijno, otiyo gi thuolono e nyiso ni ibiro guedh kata joma ok gin Jo-Yahudi ma nyiso yie. Owacho kama: “Ji mathoth moa yo wuok-chieng’ gi yo podho-chieng’ nobi kendo ginibed piny e mesa gi Ibrahim kod Isaka gi Jakobo e Pinyruodh polo.” To nade Jo-Yahudi ma ok nyis yie? Yesu wacho ni joma kamago “ibiro wit oko e mudho. Kanyo e kama ywagruokgi kod muodo lekegi nobedie.”​—Mathayo 8:11, 12.

Kuom mano, Jo-Yahudi ma ok ti gi thuolo mokwongo ma osemigi mar bedo joma biro locho kanyachiel gi Kristo e Pinyruoth, ibiro wit oko. Kata kamano, joma ok gin Jo-Yahudi ibiro rwak mondo gibed piny e mesa “e Pinyruodh polo.”