Kayari na Sermon ed Palandey, linmay Jesus ed syudad na Capernaum. Sikatoy inasinggeran na pigaran mamatatken na saray Judio. Sikaray imbaki na lakin dumay lahi to​—Romanon opisyal na armada, odino senturion.

Say inad-aron lingkor na opisyal na armada et grabe so sakit to tan ngalngali la ompatey. Anggano aliwan Judio imay senturion, sikatoy manpapatulong ed si Jesus. Imbaga na saray Judio ed si Jesus a samay lingkor na laki et “agla makaalis ed abung ta paralitiko, tan naiirapan a maong.” (Mateo 8:6) Impaseguro ed si Jesus na mamatatken na saray Judio a say senturion et makanepegan a tulongan. Inkuan da: “Inaro toy nasyon tayo tan impaalageyan to kami na sinagoga.”​—Lucas 7:4, 5.

Kanian akilay Jesus ed saray mamatatken paonlad abung na opisyal. Nen asingger la ra, imbaki na opisyal iray kakaaro to pian ibagad si Jesus: “Katawan, agka la manaabala, ta agak manepeg a mamaloob ed sika diad abung ko. Ta agko impasen a manepeg ak ya ondago ed sika.” (Lucas 7:6, 7) Talagan mapaabeba ed satan ya imbaga to lapud apasal ya mangiganggan! Tan nanengneng ed satan ya sikatoy duma ed saray Romanon anggapoy panangasi dad saray aripen.​—Mateo 8:9.

Seguradon amta na senturion ya agmiuulop iray Judio ed saray aliwan Judio. (Gawa 10:28) Nayarin onia so iisipen na opisyal kanian impaibaga tod si Jesus: “Ibagam labat so salita a sikatoy natambal, tan onabig lay lingkor ko.”​—Lucas 7:7.

Mandinayew si Jesus ed nadngel to tan inkuan to: “Ibagak ed sikayo, anggan diad Israel et anggapoy aromog kon walaay onian kabiskeg na pananisia.” (Lucas 7:9) Kapawil na saray kakaaro na senturion ed abung to, naamtaan da ya inmabig la may aripen ya mansasakit.

Kayari na satan ya impamaabig nen Jesus, inusar to itan ya agawa pian ipaseguro a nabendisyonan iray aliwan Judio ya mangipanengneng na pananisia: “Dakel so onsabin manlapud bukig tan sagur a midungo ed si Abraham tan Isaac tan Jacob diad Panarian na tawen.” Saray andiay pananisian Judio ey? Imbaga nen Jesus ya sikaray “ibantak diad paway ya ambilbilunget. Ditan so pannangisan tan panngalatengetan na ngipen da.”​—Mateo 8:11, 12.

Kanian saray Judion agmangawat ed pankanawnawan inmunan inyopresi ed sikara pian magmaliw a kabiangan na Panarian nen Kristo et ipulisay. Balet, saray aliwan Judio et awaten ya midungo ed lamisaan to “diad Panarian na tawen.”