Jirkachö Yachatsikur usharirmi, Jesusqa Capernaum markata ëwakurqan. Tsëchö këkaptinnam, tröpakunata mandaq juk nacion nuna mandashqa kaptin, judïukunachö respetashqa nunakuna Jesus kaqta ëwayarqan.

Tröpakunata mandaq nunapa alläpa kuyashqa sirweqninmi pasëpa qeshyar wanïkarqanna. ‘Kuyukïta mana puëdirmi wayichö cämarëkarqan, y alläpa sufrikarqan’ (Mateu 8:6). Judïu mana karpis, tröpakunata mandaq nunaqa Jesuspa yanapakïnintam ashirqan. Judïukunachö respetashqa nunakunaqa, “pëqa kuyanmi nacionnintsikta, y pëmi Diosta adorana wayïkunata këchö sharkatsimushqa” nirmi yanapëkunampaq Jesusta mañakuyarqan (Lücas 7:4, 5).

Jesuswan judïukunachö precisaq nunakunam jinan höra tsë nunapa wayinman ëwayarqan. Chëkäyaptinnam, tröpakunata mandaq nunaqa Jesusta kënö niyänampaq amïgunkunata mandarqan: “Teytë, amana afanakallämïnatsu, porqui noqalläqa manam wayïman yëkamunëkipaqnötsu kallä. Tsëmi qamman shamoqpaqnötsu kallarqö” (Lücas 7:6, 7). Tröpakunata mandar yachakashqa karnimpis, tsë nunaqa alläpa humildi kanqantam rikätsikurqan. Jina tsëta ninqanwanqa, mana allipa tratakoq wakin Röma nunakunanö mana kanqantam rikätsikurqan (Mateu 8:9).

Tröpakunata mandaq nunaqa, musyarqanmi judïukuna juk nacion nunakunawan mana parlapänakuyanqanta (Hëchus 10:28). Itsa tsëchi Jesusta kënö niyänampaq amïgunkunata kacharqan: “Juk palabrallata niri, y sirwimaqnïqa kachakärinqam” (Lücas 7:7).

Jesusqa alläpam espantakurqan tsë nuna ninqampita, tsëmi kënö nirqan: “Këtam niyaq, manam ni juk nunatapis kënö jatun markäkïyoqtaqa ni Israel-llachöpis tarirqötsu” (Lücas 7:9). Tröpakunata mandaqpa amïgunkuna kutirirqa, kachakärishqatanam tsë sirwipakoqta taririyarqan.

Wakin nunakuna judïu mana këkarpis, markäkuyanqanrëkur mëtsika bendicionkunata chaskiyänampaq kaqtam Jesusqa cläru rikätsikurqan. Kënömi nirqan: “Inti yarqamunan lädupita y inti jeqanan lädupitam mëtsikaq shayämunqa, y ciëluchö Gobiernuchömi Abrahanwan, Isaacwan y Jacobwan juntu tëkur mësaman kinkishayanqa”. Peru ¿imaraq pasanqa mana markäkoq judïukunataqa? “Ampirëkaq waqtamanmi jitashqa kayanqa. Tsëchömi shonqunkunachö nanatsikur waqayanqa y kirunkunatapis ruchuchütsiyanqa” nirqanmi Jesusqa (Mateu 8:11, 12).

Diosqa judïukunatam puntata akrarqan Cristuwan juntu gobernayänampaq. Peru pëkuna mana munayaptinqa, mana judïu kaq nunakunam Diospa Gobiernunchö Jesuswan juntu gobernayanqa.