Jesusqa urqupi yachachiyta tukuruspanmi Capernaum llaqtamanña rirqa. Chaypi kachkaptinmi Jesusmanqa judiokunapa wakin autoridadninkuna asuykurqaku. Paykunataqa Roma nacionpi soldadonkunata huk kaqnin kamachiqmi kacharqa.

Chay soldadokunata kamachiqpaqa ancha kuyasqan serviqninmi wañuy patanpiña kachkarqa.  Serviqninqa ‘suchuyaruspam anchallataña ñakarichkarqa’ (Mateo 8:6). Soldadokunata kamachiqqa mana judio kachkaspanpas Jesuspa yanapakuynintam maskarqa. Payqa llampu sunqum karqa, chaymi judiokunapa autoridadninkunaqa Jesusta mañakurqaku chay kamachiqpa serviqninta hampinanpaq. Nirqakum: “Kuyanmi nacionninchikta, ruwarqataqmi yupaychana wasitapas”, nispa (Lucas 7:4, 5).

Chaymi Jesusqa autoridadkunawan kuska chay kamachiq runapa wasinman richkarqaku, ichaqa chayaykuchkaptinkuñam chay kamachiqqa kuyasqan runakunata kacharqa Jesusman kaynata ninankupaq: “Señor amaña hamuyñachu, ñuqaqa manam wasiyman yaykunaykipaq hinachu kani. Chayraykum kikiyqa maskaqniki mana hamurqanichu”, nispa (Lucas 7:6, 7). Chay runaqa soldadokunapa kamachiqnin kachkaspanpas manam hatun tukuqchu nitaq wakin llaqtamasinkuna hinaqa serviqninkunatapas ñakarichiqchu (Mateo 8:9).

Payqa yacharqam judio runakuna huk law nacionniyuqkunawan mana hukllawakusqankuta (Hechos 10:28). Chayraykuchusmi Jesusmanqa kuyasqan runakunawan kaynata nichirqa: “Rimariykuyá sirvientey sanoyarunanpaq hinaptinqa sanoyarunqam”, nispa (Lucas 7:7).

Chayta uyariruspanmi Jesusqa kusikuywan nirqa: “Nikichikmi: Kaynaña iñiyniyuq runataqa Israel runakunapipas manam tarirqanichu”, nispa (Lucas 7:9). Jesusman riqkunañataqmi wasiman kutiruspanku kamachiqpa serviqnintaqa sanotaña tarirurqaku.

Chay kutipim Jesusqa qawachirqa mana judio kaqkunapas Diospi iñispankuqa bendecisqa kanankumanta. Chaymi nirqa: “Intipa qispimunan hinaspa intipa siqaykunan lawmantam achka runakuna hamunqaku, hinaspankum hanaq pacha Diospa munaychakuyninpi Abrahanwan, Isaacwan hinaspa Jacobwan mesapi tiyaykunqaku”, nispa. Ichaqa mana iñiq judiokunamanta rimaspanmi Jesusqa nirqa: ‘Hawaman wischusqam kanqaku, chaypim waqaspa kirunkuta kirichichichinqaku’, nispa (Mateo 8:11, 12).

Jehova Diosqa judio runakunatam puntataqa akllarurqa munaychakuyninpi churin Jesuswan kuska kamachinankupaq, ichaqa Jesusta qipancharuspankuqa paykunapas Diospa qipanchasqanmi kananku karqa. Chaymi mana judio kaqkunapas akllasqaña kananku karqa Jesuswan kuska hanaq pachamanta kamachimunankupaq.