Yesu wati wamaliza Upharazgi waki wa Paphiri, wanguluta ku tawuni ya Kaperenao. Wati wafika kwenuku, wangukumana ndi ŵaraŵara ŵa Ayuda. Yiwu angutumika ndi mura wa asilikali Achiroma, yo wenga Myuda cha.

Mura wa asilikali mwenuyu wenga ndi mteŵeti waki yo wamuyanjanga ukongwa. Kweni pa nyengu iyi, mteŵeti waki wangutama ukongwa ndipu wenga pafupi kufwa. Chinanga kuti mura wa asilikali mwenuyu wenga Myuda cha, iyu wangupempha Yesu kuti wamuwovyi. Ŵaraŵara ŵa Ayuda angukambiya Yesu kuti mteŵeti wa mura wa asilikali “po wagone munyumba wayuka cha, wafwa viŵalu, ndipu wasuzgika ukongwa,” panyaki chifukwa cha urwirwi wo wavwanga. (Mateyu 8:6) Yiwu angukambiya Yesu kuti mura wa asilikali mwenuyu wenga wakwenere kumuwovya. Yiwu anguti: “Iyu watanja mtundu widu ndipuso ndiyu wakutizenge sinagogi.”—Luka 7:4, 5.

Pavuli paki, Yesu wangusoka ndi ŵaraŵara ŵa Ayuda ndi kuluta ku nyumba ya mura wa asilikali. Kweni ŵe pafupi kufika, mura wa asilikali mwenuyu wangutuma abwezi ŵaki kuchikambiya Yesu kuti: “Ada, mungasuzgikanga cha, nde wakwenere cha kuti yimwi mukasere munyumba yangu. Ndichu chifukwa chaki ndawona kuti nde wakwenere cha kuza kwaku yimwi.” (Luka 7:6, 7) Venivi, vilongo kuti munthu uyu wenga wakujiyuyuwa ukongwa chinanga kuti wenga ndi udindu wapachanya. Iyu wangulongo so kuti wenga wakupambana ndi Aroma anyaki wo achitiyanga nkhaza akapolu ŵawu.—Mateyu 8:9.

Mura wa asilikali mwenuyu waziŵanga kuti Ayuda achezanga cha ndi ŵanthu wo ŵenga Ayuda cha. (Machitidu 10:28) Panyaki ndichu chifukwa chaki iyu wangukambiya abwezi ŵaki kuti akakambiyi Yesu kuti: “Kambani ŵaka mazu ndipu chizgani mteŵeti wangu.”—Luka 7:7.

Yesu wanguzizwa ukongwa wati wavwa mazu ngenanga ndipu wangukamba kuti: “Nditikukambiyani, palivi munthu yo ndikumusaniyapu mu Isirayeli wachivwanu chikulu viyo.” (Luka 7:9) Abwezi a mura wa asilikali ŵati awere kunyumba, anguchisaniya kuti mteŵeti yuwa wangutama ukongwa wachira.

Yesu wati wachizga munthu mwenuyu, wenga ukaboni wakuti ŵanthu amitundu yinyaki wo ŵe ndi chivwanu azamutumbikika. Iyu wangukamba kuti: “Ŵanthu anandi azengi kutuwa kuvuma ndipuso kuzambwi kuzija pathebulu ndi Abrahamu, Isaki kweniso Yakobe mu Ufumu wakuchanya.” Nanga ntchinthu wuli cho chatingi chichitikiyengi Ayuda wo ŵengavi chivwanu? Yesu wangukamba kuti yiwu “azamuponyeka kubwalu ku mdima. Ndipu kweniko ndiku kwamuja kuliya ndi kukukuta minyu.”—Mateyu 8:11, 12.

Mwaviyo, Ayuda wo angukana mwaŵi wakuchilamuliya mu Ufumu ndi Khristu wo pakwamba ungupasika kwaku yiwu, nawu Chiuta wanguŵakana. Kweni mwaŵi wenuwu unguperekeka kwa ŵanthu amitundu yinyaki ko kwenga nge kuja pathebulu laku Yesu “mu Ufumu wakuchanya.”