Naamana kwaamba Mulumbe wakwe Waacilundu, Jesu waunka kumunzi wa Kapernauma. Kali kooku, baalu bamwi baba Juda baboola kulinguwe. Batumwa amwaalumi wamusyobo umbi—silutwe wabasikalumamba bali 100, muna Roma.

Mubelesi wasilutwe wabasikalumamba ngwayandisya ulicisidwe kapati, ulaafwi kufwa. Nokuba kuti silutwe ooyu Muntu Wamasi, ulomba lugwasyo kuli Jesu. Ba Juda baambila Jesu kuti mubelesi wamwaalumi ooyu “ulilede muŋanda, ulilebukide mubili alimwi ulipengede kapati,” ambweni akaambo kakumvwa kucisa kapati. (Matayo 8:6) Baalu baba Juda bamukombelezya Jesu kuti silutwe ooyu uleelela kugwasyigwa, balaamba: “Nkaambo ulaciyanda cisi cesu alimwi nguwakayaka cikombelo cesu.”—Luka 7:4, 5.

Kakunyina akusowa ciindi, Jesu waunka abaalu aabo kuŋanda yasilutwe wabasikalumamba. Nobasika afwaafwi, silutwe watuma beenzinyina kuzyikwaamba kuti: “O Mwami, utalipenzyi pe, nkaambo tandeeleli kuti unjile muŋanda yangu. Nkakaambo kaako ncindatakalibona kuti ndileelela kuboola kulinduwe.” (Luka 7:6, 7) Eelo kaka ulalicesya mwaalumi ooyu uujisi nguzu zyakulailila bamwi! Alimwi eeci citondezya mbwaindene aba Roma bamwi ibeendelezya bazike calunya.—Matayo 8:9.

Cakutadooneka silutwe wabasikalumamba ooyu ulizyi kuti ba Juda tabayanzani abantu batali ba Juda. (Milimo 10:28) Ambweni kakayeeyede kaambo aaka, watuma beenzinyina kuzyikulomba Jesu kuti: “Koile kwaamba buyo jwi, eelyo mubelesi wangu ulapona.”—Luka 7:7.

Amvwe boobo, Jesu wagambwa, eelyo wati: “Ndimwaambile, nomuba mu Israyeli tandinajene muntu uulaalusyomo lupati luli boobu.” (Luka 7:9) Nobajokela kuŋanda yasilutwe wabasikalumamba, beenzinyina bajana kuti muzike iwacisidwe kapati uli kabotu, wayumya.

Jesu naacita maleele aaya aakuponya, wabelesya ciindi eeci kutondezya kuti bantu batali ba Juda pele ibalaalusyomo bayakulelekwa, wati: “Banji kuzwa kujwe akumbo bayooboola akukkala kutebulu antoomwe a Abrahamu, Izaka a Jakobo mu Bwami bwakujulu.” Ino mbuti kujatikizya ba Juda batakwe lusyomo? Jesu waamba kuti “bayoosowelwa anze mumudima. Ooko nkobaya kulilila akulumina ntwino.”—Matayo 8:11, 12.

Aboobo, ba Juda bazyalwe ibatacitambuli coolwe icasaanguna kupegwa kulimbabo cakuba mu Bwami antoomwe a Kristo bayakukakwa. Pele Bamasi bayootambulwa akuzumizyigwa kukkala kutebulu lyakwe lyacikozyanyo “mu Bwami bwakujulu.”