Taim Jisas i autim pinis Bikpela Tok Long Maunten, em i go long Kaperneam. Na sampela bikman bilong lain Juda i kam long em. Wanpela man bilong narapela lain i bin salim ol i go long Jisas, em ofisa bilong ami bilong Rom.

Ofisa i tingting planti, long wanem, wokboi bilong em i sik nogut tru na klostu em i laik i dai. Maski em i bilong narapela lain, em i askim Jisas long helpim em. Ol Juda i tokim Jisas olsem wokboi bilong ofisa i “paralais na slip i stap long haus, em i kisim taim stret. ” Ating em i pilim bikpela pen tru long bodi bilong em. (Matyu 8:6) Ol bikman bilong ol Juda i tokim Jisas olsem i gutpela em i helpim dispela ofisa bilong ami bilong Rom, long wanem, “em i save laikim lain bilong yumi na em i bin wokim sinagog long hia.”—Luk 7:4, 5.

Wantu tasol Jisas i go wantaim ol bikman long haus bilong ofisa. Taim ol i kamap klostu pinis, ofisa i salim sampela pren i kam long Jisas na tokim em olsem: “Bikman, maski long hatwok, mi no gutpela man inap long yu ken i kam long haus bilong mi. Olsem na long dispela as mi no kam long yu.” (Luk 7:6, 7) Ofisa i mekim pasin daun tru, maski em i save bosim bikpela lain ami! Dispela i soim olsem em i narapela kain long ol man bilong Rom, em ol i save mekim nogut long ol wokboi bilong ol.—Matyu 8:9.

Ofisa bilong ami i save olsem ol Juda i no save bung wantaim ol man bilong narapela lain. (Aposel 10:28) Olsem na em i salim ol pren bilong em i kam na tokim Jisas: “Yu mekim tok tasol na wokboi bilong mi i ken kamap orait.”—Luk 7:7.

Jisas i kirap nogut long harim dispela tok, na em i tok: “Mi tokim yupela: Mi no bin lukim wanpela man long Israel i gat bikpela bilip olsem dispela man.” (Luk 7:9) Taim ol pren i go bek long haus bilong ofisa, ol i lukim olsem dispela wokboi husat i bin sik nogut tru, nau em i kamap orait.

Taim Jisas i oraitim pinis wokboi bilong ofisa, em i tokim ol olsem bihain sampela man bilong ol narapela lain husat i bilip bai kisim ol blesing, em i tok: “Planti man bilong hap sankamap na hap san i go daun, ol bai kam na sindaun long tebol wantaim Abraham na Aisak na Jekop long Kingdom bilong heven.” Olsem wanem long ol Juda i no bilip? Jisas i tok ol “bai i go ausait long ples tudak. Long dispela hap ol bai krai na sikirapim tit bilong ol.”—Matyu 8:11, 12.

Olsem na ol Juda bilong skin em pastaim God i bin makim ol long mekim wok king wantaim Krais, God bai rausim ol. Na ol man bilong narapela lain bai “sindaun long Kingdom bilong heven.”