I te otiga ne fai ne Iesu tena Lāuga i luga i te Mauga, ne fanatu a Iesu ki te fa‵kai ko Kapanaumi. I konā, ne olo atu a toeaina Iutaia ki a ia. Ne uga atu latou ne se tagata mai i se fenua fakaatea—se ofisa o kautau Loma.

Ne masaki malosi a te tavini pele a te ofisa o kautau kae ko pili aka eiloa o mate. E tiga eiloa a te ofisa o kautau se tino mai Fenua Fakaa‵tea, ne ‵sala atu eiloa a ia ki te fesoasoani o Iesu. Ne fai atu a tino Iutaia ki a Iesu me i te tavini a te tagata tenā, “telā e takato i te fale me ko ‵mate tena foitino, kae ko oko eiloa i te tigaina” kāti e logo‵mae malosi a ia. (Mataio 8:6) Ne fakatalitonu atu a toeaina Iutaia ki a Iesu me i te ofisa o kautau tenā, “e ‵tau eiloa o maua ne ia tou fesoasoani, me ko ia eiloa ko alofa ki te ‵tou fenua kae ne fakatu foki ne ia te motou sunako.”—Luka 7:4, 5.

E seki leva, kae ne olo atu a Iesu mo toeaina konā ki te fale o te ofisa o kautau. I te taimi ko pili atu ei latou, ne uga atu ne te ofisa o kautau ana taugasoa ke fai atu: “Tou ‵malu, sa vau, me e seai soku aoga ke ulu mai ei koe ki loto i toku fale. Tenā te pogai ne mafaufau ei au me e seai soku aoga ke fanatu au ki a koe.” (Luka 7:6, 7) Ko oko eiloa i te lasi o te loto maulalo o se tino telā ne masani o fakatonu atu ki nisi tino! Kae ko fakaasi mai ei te ‵kese o te tagata tenei mai i tino Loma kolā e fakasaua ne latou a pologa—Mataio 8:9.

E mautinoa eiloa me ne iloa ne te ofisa o kautau a te sē fesokotaki sāle o tino Iutaia mo tino kolā e se ne Iutaia. (Galuega 10:28) Ona ko te mea tenei, kāti ne fai atu te ofisa ki ana taugasoa ke fakamalosi atu penei ki a Iesu: “Fai aka fua sau pati, ko ‵lei ei taku tavini.”—Luka 7:7.

Ne ofo malosi a Iesu i te lagonaga ne ia o te mea tenei kae fai atu: “Au e fai atu ki a koutou, e seai eiloa se tino i Isalaelu kai maua ne au, e lasi penei tena fakatuanaki.” (Luka 7:9) I te lotou ‵fokiatuga ki te fale o te ofisa o kautau, ne iloa ei ne ana taugasoa me i te tavini telā ne masaki malosi ko ‵lei nei.

I te otiga ne fai ne Iesu a te faka‵leiga fakavavega tenā, ne fakaaoga ne ia te taimi tenei ke fakamautinoa atu ei, me ka maua foki ne tino kolā e se ne tino Iutaia a fakamanuiaga, ana muna: “E tokouke ka o‵mai mai i te saegala mo te togala kae ka ‵nofo i te taipola fakatasi mo Apelaamo, Isaako mo Iakopo i te Malo o te lagi.” Kae e a tino Iutaia kolā e se fakatuanaki? Ne fai mai a Iesu me “ka ‵pei ki tua i te pouliga. Ka ‵tagi mautuutu kae fai olotou lili i konā.”—Mataio 8:11, 12.

Tela la, ka ‵teke atu eiloa ki tino Iutaia faka-te-foitino kolā e se talia ne latou te avanoaga telā ne ofo muamua atu ki a latou ke fai mo vaega o te Malo fakatasi mo Keliso. Kae ka talia a tino mai Fenua Fakaa‵tea ke saga‵saga i tena taipola, e pelā eiloa mo “te Malo o te lagi.”