Katapos ipahayag ni Jesus an iya Sermon ha Bukid, kumadto hiya ha syudad han Capernaum. Didto dinaop ha iya an pipira nga Judio nga katigurangan. Ginsugo hira han usa nga tawo nga iba an lahi—usa nga opisyal han kasundalohan han Roma.

An hinigugma nga surugoon han opisyal han kasundalohan may grabe nga sakit ngan tikamatay na. Bisan kon Hentil an opisyal, karuyag niya magpabulig kan Jesus. Ginsumatan hi Jesus han mga Judio nga an surugoon han opisyal “naghihinigda na la ha balay kay paralisado, ngan nag-aantos hiya hinduro,” bangin tungod ha duro nga kaul-ol. (Mateo 8:6) Ginpasarig hi Jesus han Judio nga katigurangan nga ini nga opisyal takos buligan, hira nagsiring: “Hinigugma niya an aton nasud ngan hiya an nagtindog han sinagoga dinhi.”—Lucas 7:4, 5.

Waray pag-iha, hi Jesus umupod ha katigurangan ngadto ha balay han opisyal. Han hirani na hira, an opisyal nagsugo hin kasangkayan niya basi magsiring: “Ginoo, ayaw na la pagpadayon, kay diri ako takos nga pakadtoon ka ha akon balay. Tungod hito waray ako dumaop ha imo.” (Lucas 7:6, 7) Iginpapakita gud hito an pagkamapainubsanon han usa nga opisyal nga hiara magsugo ha iba! Ngan iginpapakita hito nga iba gud hiya ha mga Romano nga mapintas an pagtratar ha mga surugoon.—Mateo 8:9.

Sigurado nga maaram an opisyal nga an mga Judio nalikay pakig-upod ha mga diri Judio. (Buhat 10:28) Posible nga ini an hinungdan kon kay ano nga ginsugo han opisyal an iya kasangkayan nga makimalooy kan Jesus: “Pagsiring la nga mag-oopay hiya, ngan matatambal na an akon surugoon.”—Lucas 7:7.

Han hinbatian ito ni Jesus, nahipausa hiya ngan nagsiring: “Susumatan ko kamo: Bisan ha Israel waray pa gud ako makakita hin sugad hini kadaku nga pagtoo.” (Lucas 7:9) Pagbalik han kasangkayan ha balay han opisyal, hinbaroan nira nga nag-opay na an uripon nga may grabe nga sakit.

Katapos magtambal ni Jesus, ginamit niya ito nga higayon basi pasarigon an mga diri Judio nga may pagtoo nga bibendisyonan liwat hira. Hiya nagsiring: “Damu tikang ha este ngan weste an makanhi ngan malingkod ha lamesa upod nira Abraham, Isaac, ngan Jacob ha Ginhadian han langit.” Kumusta man an mga Judio nga waray pagtoo? Hi Jesus nagsiring nga hira “ilalabog ngadto ha kasisidman ha gawas. Didto hira mananangis ngan mangingigot an ira mga ngipon.”—Mateo 8:11, 12.

Salit, isasalikway an mga Judio nga waray kumarawat han higayon nga magin bahin han Ginhadian kaupod han Kristo nga siyahan nga igintanyag ha ira. Pero an mga Hentil kakarawaton nga lumingkod ha iya lamesa, siring pa, “ha Ginhadian han langit.”