KAPITE 36
Neʼe Maʼu e He Pule Solia He Tui Malohi
-
ʼE FAKAMALOLO IA TE TAGATA FAIFEKAU ʼA TE PULE SOLIA
-
ʼE TAPUAKINAʼI ANAI IA NATOU ʼAE ʼE TUI
Hili tana Akonaki ʼi Te Moʼuga, neʼe alu ia Sesu ki te kolo ko Kapenaume. Neʼe ʼomai kia te ia he kau takitaki Sutea. Neʼe fekauʼi mai natou e he tagata neʼe mole ko he Sutea, kaʼe neʼe ko he tagata Loma, neʼe pule ki te kau solia ʼe toko 100.
Ko te tagata faifekau ʼofaina ʼa te pule solia ʼaia neʼe mahaki kovi pea neʼe kua vave mate. Logo la ko te pule solia ʼaia neʼe mole ko he Sutea, kaʼe neʼe ina kumi te tokoni ʼa Sesu. Neʼe ui age e te kau Sutea kia Sesu ko te tagata faifekau ʼa te tagata ʼaia neʼe ‘takoto ʼi tona loto fale he ʼe palalisia pea ʼe kovi ʼosi tona mamahi.’ (Mateo 8:6) Neʼe fakaha age e te kau takitaki Sutea kia Sesu neʼe tuha mo te pule solia ʼaia ke tokoni ki ai. Neʼe natou ui fenei: “ ʼE ʼofa ki tatatou hahaʼi pea ko ia totonu ʼae neʼe ina laga tomatou sinakoka.”—Luka 7:4, 5.
Neʼe alu atu aipe ia Sesu mo te kau takitaki ʼaia ki te ʼapi ʼo te pule solia. ʼI tanatou ovi atu ki te ʼapi, neʼe fekauʼi age e te pule solia ʼona kaumeʼa ke natou ui fenei kia Sesu: “Tagata, ʼaua naʼa ke fakakinakina, koteʼuhi ʼe mole tuha mo au ke ke hu ki toku loto fale. Koia neʼe au manatu ai ʼe mole tau mo au ke au alu atu kia te koe.” (Luka 7:6, 7) ʼE ke tokagaʼi te agavaivai ʼa te tagata ʼaia, ʼae neʼe mahani ʼi te fakatotonu ki ʼihi ke natou fai he ʼu gaue. Pea ʼe fakaha ai tona kehekehe mo te kau Loma, ʼae neʼe natou gaohi koviʼi te hahaʼi faifekau.—Mateo 8:9.
ʼE mahino ia, neʼe iloʼi e te pule solia ʼe mole felogoʼi te kau Sutea mo te hahaʼi ʼae ʼe mole Sutea. (Gaue 10:28) Ko te lagi tupuʼaga la ʼaia ʼo tana ui age ki ʼona kaumeʼa ke natou kole mamahi fenei kia Sesu: “Ke ke fai pe koe he fakatotonu pea ʼe malolo anai taku tagata faifekau.”—Luka 7:7.
Neʼe punamaʼuli ia Sesu ʼi tana logo ki te ʼu palalau ʼaia pea neʼe ina ui fenei: “ ʼE au tala atu kia koutou, maʼia ʼi Iselaele ʼe heʼeki au maʼu he tagata tui malohi feia.” (Luka 7:9) ʼI te toe liliu age ʼa te ʼu kaumeʼa ki te ʼapi ʼo te pule solia, neʼe natou maʼu atu kua lelei te tagata faifekau ʼae neʼe mahaki kovi.
ʼI te ʼosi fakahoko e Sesu ia te fakamalolo, neʼe ina fakaʼaogaʼi te faigamalie ʼaia moʼo fakamoʼoni ʼe maʼu anai e te hahaʼi tui ʼae ʼe mole Sutea he ʼu tapuakina, ʼo ina ui fenei: “Tokolahi ʼe ʼomai anai mai te potu esite mo te potu uesite pea mo natou kakai fakatahi anai mo Apalahamo pea mo Isaake pea mo Sakopo ʼi te Puleʼaga ʼo selo.” Kaʼe ʼe feafeaʼi anai ki te kau Sutea ʼae ʼe mole tui? Neʼe ui e Sesu “ ʼe li anai [natou] ki tuʼa, ki te fakapoʼuli. Pea ʼe natou fetagihi mo lotomamahi anai ʼi ai.”—Mateo 8:11, 12.
Koia, ʼe liakī anai te kau Sutea ʼae neʼe mole natou tali te faigamalie ʼaia neʼe ʼuluaki foaki age kia natou, ke natou kau fakatahi mo Kilisito ʼi te Puleʼaga. Kaʼe ʼe fakaafe anai te hahaʼi ʼae ʼe mole Sutea ke natou kakai fakatahi mo Kilisito, ko tona fakaʼuhiga, ke natou fakatahi mo ia “ ʼi te Puleʼaga ʼo selo.”