Ndék ngéda i mbus le a mélés ngwélél ñane bisônda, Yésu a nyodi i Kapernaum, a nke tison i Nain i i yé i 20 ma kilôméta i nwelmbok. A ta bé nyetama, banigil bé ni limut likeñi ba yé ni nye. I nene le ba mpam bebee ni Nain kôkôa i ma tagbe. Ha nyen ba mboma ngandak bôt ba Lôk Yuda ba bééga mim u mañge wanda u ba yé ke jô.

I nwet a nok ndutu ngandak, a yé nyañ hiloga. A yé yik muda. Nano yak pom yé man i nwo. Ngéda nlôm a bi wo, a bi yégla ndik i lok yé i. Hégda lelaa a bé gwés nye ngandak, a pidge le man nu nyen a ga tééda nye. Nano yak nye a nwo, njee a ga tééda nye?

Ngéda Yésu a ntehe muda nu, ñem u siida nye mu kiki a ntehe ndutu yé. Ni ngoo yosôna, Yésu a nkal nye le: “U ee ha bañ.” Ndi a mboñ iloo ha. A nke bebee ni nañi het mim u niñe, a tihba yo. (Lukas 7:13, 14) Liboñok li Yésu li ntinde bet ba bééga mim i telep. ‘Kii hala a nkobla? Kii a nsômbôl boñ?’ Ngandak i yé nhelek.

Inyu yap pes, i bôt ba nkiha ni Yésu, ba ba bi tehe nye a mélés bôt, ba nhoñol kii? I pot maliga, ba yé ngi tehe nye a ntugul mut. Hala a yé ntandaa ngéda nano le ba bi tugul ngim bôt, ndi baa Yésu a nla boñ ntén jam u? (1 Bikiñe 17:17-23; 2 Bikiñe 4:32-37) Yésu a nkal le: “A mañge wanda, me nkal we le: Telep!” (Lukas 7:14) Hala nyen i mbôña. Mañge wanda a nyén a bôdôl pot! Yésu a nti nye nyañ nu maséé ma nlo nol. A ta ha bé nyetama.

Kiki bôt ba ntehe le mañge wanda a  ntuge toi, ba bégés Nti Likébla li niñ le Yéhôva, ba kalak le: “Mpôdôl nunkeñi a mpam ipôla yés.” Kiki bape ba nok ngobol i jam lilam Yésu a mboñ, ba bôdôl kal le: “Nyambe a nyoñ ngéda ni litén jé.” (Lukas 7:16) Ñañ u ntôôwa ni nkoñ wonsôna, yak i Nasaret, i jôm li kilôméta het Yésu a bi néñél. Nwin u mbol yak i Yudéa i nwelmbok.

Yôhanes a ngi yii mok, ndi minson mi Yésu mi nlémél nye ngandak. Banigil bé ba ñañle nye mam ma hélha Yésu a mboñ. Kii Yôhanes a mboñ?