Zezi yoli sonja ya su kpɛn’n i junman difuɛ’n i juejue i osu w’a cɛman kpɛkun ɔ jasoli Kapɛɛnaɔmun lɛ ɔli Nainin. Klɔ nɲɔn sɔ mun be afiɛn ti nun kilo ablasan-nin-nɲɔn (32). Kɛ ɔ́ kɔ́’n, i sɔnnzɔnfuɛ mun nin sran kpanngban kpa wie mun ekun be su i su. Atrɛkpa’n, nnɔsua nun yɛ be mantannin Nainin klɔ’n niɔn. Be nin Zuifu kpanngban kpa be yiali. Be su kɔ asieliɛ su bé kó síe gbanflɛn kun.

Be nga be su kɔ asieliɛ su’n, be wla w’a bo be wun. Gbanflɛn’n i nin’n i liɛ’n, awlabɔɛ’n w’a kun i kpo. Afin ɔ ti angbeti, kpɛkun i wa kunngba cɛ ng’ɔ le i’n yɛ w’a wu lɛ-ɔ. Kɛ bla sɔ’n i wun wuli’n, i wla boli i wun. Sanngɛ kɛ mɔ i wa’n wo lɛ’n ti’n, i wla w’a bomɛn i wun w’a tratraman su. Nanwlɛ, ɔ klo ba sɔ’n i kpa yɛ ɔ fɛli i wla’n kwlaa guɛli i su. Afin ɔ se i wun kɛ cɛn wie lele’n, ba sɔ’n yɛ ɔ́ níɛn i lika-ɔ. ?Siɛn mɔ ba’n w’a wu’n, wan yɛ ɔ nin i bé trán-ɔn? ?Wan yɛ ɔ́ níɛn i lika-ɔ?

Zezi wunnin bla sɔ’n. Ɔ wunnin kɛ i wla w’a bo i wun dan, naan ɔ yo annvɔ dan. Ɔ kannin ndɛ kun kleli bla’n wɛtɛɛ su. Ndɛ sɔ’n guali bla’n i awlɛn su nzue. Ɔ seli i kɛ: “Muan ɔ nuan.” Kpɛkun ɔ yoli like kun ekun. Ɔ wunngeli be nga be suali fuɛn’n be wun lɔ, kpɛkun ɔ kannin kpata’n. (Liki 7:13, 14) Kɛ ɔ yoli sɔ’n, kpata’n i suafuɛ mun-o, be nga be ɔli be sunmanlɛ mun-o, be kwlaa be ka lɛ be jrannin. Sran kpanngban be usali be wun kɛ: ‘?Ngue ti yɛ ɔ seli bla’n sɔ-ɔ? ?Ngue yɛ ɔ su wa yo-ɔ?’

Be nga be su Zezi su’n, be wunnin kɛ Zezi yoli abonuan sa wie mun. I wie yɛle kɛ ɔ yoli tukpacifuɛ kpanngban be juejue. Sanngɛ be usa be wun kɛ: ‘?Ngue yɛ Zezi wá yó-ɔ?’ Atrɛkpa’n, be nin-a wunman kɛ w’a cɛn sran le. Be si kɛ laa blɛ nun’n, sran wie’m be cɛnnin nguan. Sanngɛ be usa be wun kɛ: ‘?Zezi kwla yo i sɔ’n wie?’ (1 Famiɛn Mun 17:17-23; 2 Famiɛn Mun 4:32-37) Zezi seli kɛ: “Gbanflɛn kan, n se wɔ kɛ, jaso!” (Liki 7:14) Bé nían-ɔn, gbanflɛn’n w’a jaso, kpɛkun ɔ su ijɔ. Yɛ Zezi fali ba’n mɛnnin i nin’n niɔn. Nanwlɛ, sa sɔ’n boli bla’n i nuan dan, kpɛkun ɔ yoli i fɛ lele tratrali su. Afin i ngunmin su tranman.

Kɛ sran’m be wunnin kɛ ba’n w’a cɛn sakpa’n, be manmannin Zoova m’ɔ man nguan’n. Be seli kɛ: “Ɲanmiɛn  nuan ijɔfuɛ dan kun w’a fite e afiɛn wa.” Wie’m be liɛ’n, kɛ be buli abonuan sa nga Zezi yoli’n i akunndan’n, be seli kɛ: “Ɲanmiɛn w’a kpɛ i ɲin i nvle’n su wa.” (Liki 7:16) Ndɛ sɔ’n w’a cɛman naan w’a tru klɔ nga be mantan lɛ’n be su. Atrɛkpa’n, be nga be tran Nazarɛti bɔbɔ’n, be tili i wie. Kusu nn lɛ nin Nazarɛti be afiɛn ti nun kilo 10. I kpa bɔbɔ’n, abonuan sa sɔ’n i ndɛ truli lele juli Zide mɛn’n nun lɔ. Mɛn sɔ’n wo Izraɛli nvle’n i ngua lɔ.

Kɛ ɔ́ yó sɔ’n, nn Zan Batɛmun yofuɛ’n te o bisua. I sɔnnzɔnfuɛ’m be ko kannin abonuan sa nga Zezi yo be’n kleli i bisua lɔ. Abonuan sa nga Zezi yoli be’n, be ti Zan i cinnjin kpa. ?Kɛ Zan tili ndɛ sɔ mun’n, ngue yɛ ɔ yoli-ɔ?