Mvuse ya na a mane saé mbo ésaé évete bezimbi, Yésus a kôlô Capernaoum a ke Naïn, tison é ne bebé kilimeta 32 e sud-ouest. A nji bo étam. A ne a beyé’é bé a ndulu bôte wo tôñe nye. Éko éziñe ngô’é é nto éyoñ a kui minlame mi ne fefele tison ba loone na Naïn. E valé, ba koon abui Bejuif é kele’e jame mbim. Ba soo mbim ésoé ndôman e tison na ba ke jame wô.

E môt a dañe wô’ô mintaé nlem nsamba ôte a ne nyia ésoé ndôman éte. A ne nkuse minga, a éyoñe ji, susu’a mon a be a bili é wuya. Tame simesan abim ane ba be nlatan; a too a bili ndi nlem ése na nnye a ye ba’ale nye éyoñ a ye bo nnôm. Ve éyoñe ji, nye fe a wuya. Za ñhe a zu li’i a ba’ale nye a su’u nye?

Éyoñe Yésus a yene minga ate, a wô’ô nleme mintaé amu beta njuk, a ôlun a bili. A jô nye a mbamba nlem a bifia bia ve nye ndi nleme na: “Te yôn.” Ve da, a nji su’u valé. A subu bebé a nambe énoñe mbim ô mbe ô bôô. (Luc 7:13, 14, Mfefé Nkôñelan) Aval a bo mam a mimboone mié mia bo na bôte ya tison be bili awu be tebe. Abui bôte da yiane sili na: ‘Jame te da tinan aya, a jé a kômbô bo?’

Jé bi ne jô a lat a bôte be ne a Yésus, mbe bete be nga yen ane a bo beta mesimba, a saék abui akon? A ne v’ane be nga’an teke tame yene Yésus a wômôlô’ô mbim. Akusa bo be nga wômôlô mimbim melu mvus, ye Yésus a ne fo’o ngule ya bo avale jam ete? (1 Bejô Bôt 17:17-23; 2 Bejô Bôt 4:32-37) Yésus a jô na: “A ndôman, me ajô wo na, Kôlô’ô si.” (Luc 7:14) Nye ve kôlô si a tebe, a taté fe na a kobô! Yésus a kee nye nyia wé, nlem ô ne nye njalan a mevak. A nji beta bo étam.

Éyoñe bôte ba yene na ndômane nyi e ne fo’o vevee, ba lu’u Yéhôva, Mvee ényiñ, be jô’ô na:  “Beta nkulu mejô a kuiya be bia.” A ba bevok ba yemelan atinane ya beta asimba Yésus ate, a ba jô na: “Zambe a zuya yene bôte bé.” (Luc 7:16) Été été, foé ya étua jam ete ja mane mialane si se, ja’a fe tison Yésus a nga yaé, e Nazareth, bebé kiliméta 10. Nkañete ôte wo ke kui Judée.

Jean Baptiste a nga’ane mimbôk, a a kômbô yeme mam Yésus a ne ngule ya bo. Beyé’é be Jean ba kañete nye mesimba Yésus a te bo. A yalane be aya?