Ke Jesus ama akanam idem ọsọn̄ ofụn akwa owoekọn̄ oro, enye ọkpọn̄ Capernaum asan̄a n̄kpọ nte itiat 20 aka Nain. Enye isan̄ake ikpọn̄. Mbet esie ye ediwak mbon en̄wen ẹsan̄a ye enye. Etie nte mmọ ẹkpere Nain ke mbubreyo. Do ke mmọ ẹkụt nte mme Jew ẹmende okpo akparawa kiet ẹwọrọ ke obio ẹka ndibụk.

Eka akparawa oro enyene mbọm akan ke otu kpukpru owo emi ẹtienede ẹka ndibụk owo mi. Enye edi ebeakpa, ndien n̄kukụre eyen esie akpa emi. Eyen emi ikpọn̄ okosụhọ ọnọ enye ke ini ebe esie akakpade. Kere nte mma oro akamade eyen esie, kpukpru idotenyịn esie ekesịne ke idem eyen emi. Idahaemi eyen emi n̄ko akpa. Anie edidu ye enye ke ufọk, anie edin̄wam enye?

Ke ini Jesus okụtde mma oro, mbọm esie enen̄ede anam enye. Enye etịn̄ ikọ ye mma oro sụn̄sụn̄ edi enen̄ede ọdọn̄ enye esịt ete: “Kûtua aba.” Ekem Jesus anam n̄kpọ en̄wen. Enye asan̄a ekpere otụk n̄kpọ emi ẹdade ẹbiom okpo akparawa oro. (Luke 7:13, 14) Nte Jesus etịn̄de ikọ ye nte enye anamde n̄kpọ anam mbon emi ẹkemende okpo oro ẹka ndibụk ye mbon emi ẹkesan̄ade ye mmọ ẹtuak ẹda. Ekeme ndidi ediwak mmọ ẹtọn̄ọ ndikere ẹte: ‘Mbọk m̀mê nso ke enye aduak ndinam?’

Edi nso ke mbon emi ẹsan̄ade ye Jesus ẹkere? Mmọ ẹkụt nte enye anamde ikpọ utịben̄kpọ, nte enye ọkọkde nsio nsio udọn̄ọ, edi etie nte akananam mmọ ikwe enye anamde owo eset ke n̄kpa. Imọfiọk ke mme prọfet Abasi ẹma ẹsinam mme owo ẹset, edi ndi Jesus ekeme ndinam owo eset? (1 Ndidem 17:17-23; 2 Ndidem 4:32-37) Jesus ọdọhọ ke ọkpọsọn̄ uyo ete: “Akparawa, ndọhọ fi nte, Daha ke enyọn̄!” (Luke 7:14) Akparawa oro adaha ke enyọn̄ etetie onyụn̄ ọtọn̄ọ nditịn̄ ikọ. Jesus ayak enye ọnọ eka esie. Idem akpa mma emi tutu, owo ikemeke nditịn̄ adan̄a nte esịt enemde enye. Mma mbon afiak enyene owo, enye idịghe aba ikpọn̄.

 Ke ini mme owo ẹkụtde ke eyen oro eset, mmọ ẹtọn̄ọ nditoro Jehovah Abasi, Andinọ Uwem. Ndusụk mmọ ẹte: “Ẹmenam akwa prọfet adaha ada ke otu nnyịn.” Mbon eken ẹfiọk se edinam Jesus oro ọwọrọde, ntre mmọ ẹdọhọ ẹte: “Abasi ọmọwọn̄ọde ntịn̄enyịn ọnọ ikọt esie.” (Luke 7:16) Mbụk emi asuana ke kpukpru ebiet, ekesịm obio emana Jesus ko ke Nazareth emi odude n̄kpọ nte itiat itiokiet. Mbụk emi esịm usụk usụk Judea n̄ko.

John Andinịm Owo Baptism osụk odu ke ufọk-n̄kpọkọbi, enye enen̄ede oyom ndifiọk nte utom Jesus etiede. Mbet John ẹtịn̄ mme utịben̄kpọ emi Jesus anamde ẹnọ enye. Nso ke John anam ke ini okopde emi?