Be ni Yesu tsa asraafoiatsɛ lɛ tsulɔ lɛ sɛɛ lɛ, eshi Kapernaum kɛmiiya Nain. Nain yɛ Kapernaum wuoyi-anai, ni ekɛ lɛ teŋ jekɛ fe kilomitai 32. Jeee ekome pɛ enyiɛ. Ekaselɔi lɛ kɛ asafoku babaoo hu fata ehe. Eeenyɛ efee akɛ, amɛyashɛ Nain maŋ lɛ klotia gbɛkɛnaashi mli. Amɛkɛ yarafeelɔi saŋŋ ni ji Yudafoi kpe. Atere oblanyo ko ni egbo kɛjɛ maŋ lɛ mli kɛmiiya gɔɔ mli.

Mɔ ni yeɔ awerɛho fe fɛɛ yɛ mɛi lɛ ateŋ ji oblanyo lɛ mami. Eji okulafo, ni amrɔ nɛɛ bi kome pɛ ni eyɔɔ lɛ hu egbo. Be ni ewu gbo lɛ, kɛhooo lɛ, eshwɛ ebinuu ni esumɔɔ waa lɛ ni ekɛbaashɛje emii. Bo lɛ, kwɛ bɔ ni ebaasumɔ esane waa ehã, ejaakɛ ehiɛ kã nɔ akɛ lɛ ji mɔ ni baakwɛ lɛ wɔsɛɛ. Amrɔ nɛɛ, lɛ hu egbo. Namɔ eshwɛ ni baawo ehe sɔlɛ, ní eye ebua lɛ?

Be ni Yesu na yoo nɛɛ, emusuŋ tsɔ lɛ yɛ bɔ ni yoo lɛ yeɔ awerɛho waa kɛ bɔ ni enii efee mɔbɔ lɛ hewɔ. Ejɛ mlihilɛ mli ekɛ yoo lɛ wie bɔ ni baahã etsui anyɔ emli akɛ: “Kpa yaafo.” Kɛ̃lɛ, ekɛwaaa jɛmɛ. Etsi ebɛŋkɛ nɔ ni gbonyo lɛ kã nɔ lɛ, ni eta he. (Luka 7:13, 14) Bɔ ni efee enii ehã lɛ hã maŋbii ni yeɔ awerɛho lɛ wa damɔ shi amrɔ nɔŋŋ. Ekolɛ, mɛi pii bi amɛhe akɛ, ‘Mɛni etsɔɔ lɛ, ni mɛni ebaafee?’

Ni mɛi ni kɛ Yesu fãa gbɛ, ní amɛna ni efee naakpɛɛ nibii babaoo, ní etsa helai pii lɛ hu? Ekã shi faŋŋ akɛ, amɛnako ni Yesu etee mɔ ko shi dã. Eyɛ mli akɛ atee mɛi ashi jeeŋmɔ dani Yesu ba moŋ, shi ani lɛ hu ebaanyɛ efee nakai? (1 Maŋtsɛmɛi 17:17-23; 2 Maŋtsɛmɛi 4:32-37) Yesu wie akɛ: “Oblanyo, miikɛɛ bo akɛ, tee shi!” (Luka 7:14) Ni eba mli nakai. Oblanyo lɛ te shi eta shi, ni ebɔi wiemɔ! Yesu kɛ lɛ hã enyɛ ní naa ekpɛ ehe, shi nakai beiaŋ nɔŋŋ lɛ, emii eshɛ ehe waa lɛ. Agbɛnɛ, ehe efeŋ shoo dɔŋŋ.

Be ni mɛi lɛ na akɛ oblanyo lɛ eba wala mli lɛɛlɛŋ lɛ, amɛjie Yehowa, Wala-Hãlɔ lɛ, yi amɛkɛɛ: “Atee gbalɔ kpele ko shi yɛ wɔteŋ.” Mɛi komɛi kɔ naakpɛɛ nii ni Yesu fee lɛ sɛɛ, ni amɛkɛɛ:  “Nyɔŋmɔ egbala ejwɛŋmɔ kɛba emɛi lɛ anɔ.” (Luka 7:16) Etsɛɛɛ ni naakpɛɛ nii nɛɛ he amaniɛbɔɔ gbɛ shwã maji ni bɔle Nain lɛ amli, ni eeenyɛ efee akɛ anu he yɛ Yesu maŋ Nazaret, ní kɛ Nain jekɛmɔ aaafee kilomitai 10 lɛ hu mli. Anu he yɛ Yudea ni yɔɔ wuoyi tɔ̃ɔ lɛ po.

Yohane Baptisilɔ lɛ yɛ tsuŋwoo lɛ mli lolo, ni eesumɔ ni ele nibii ni Yesu feɔ lɛ. Yohane kaselɔi lɛ gba lɛ naakpɛɛ nii nɛɛ. Te efee enii yɛ he ehã tɛŋŋ?